ރާއްޖޭގައި މިއަހަރު އަލަށް 22 މީހަކަށް އެޗްއައިވީ ޖެހިފައިވާ ކަމަށާއި އަދި އެ ބަލި ގިނައިން ފެތުރިފައި ހުރީ ރައްކާތެރި ނޫން ގޮތުގައި ޖިންސީ ގުޅުން ހިންގުމުގެ ސަބަބުން ކަމަށް ހެލްތު މިނިސްޓަރު ގީލާ އަލީ މިއަދު ވިދާޅުވެއްޖެ އެވެ.
ރައީސް އޮފީހުން ބޭއްވި ޕްރެސް ކޮންފަރެންސްގައި "މިހާރު"ން ކުރި ސުވާލާ ގުޅިގެން މިނިސްޓަރު ވިދާޅުވީ ލޭ އަޅާ މީހުންނާއި މަސްތުވާތަކެތި ބޭނުންކުރާ މީހުންނަކީ އެޗްއައިވީގެ ނުރައްކާ އޮތް މީހުން ކަމަށެވެ. އަދި ބަލި މީހުންގެ ގަޔަށް ލޭ އެޅުމުގެ ކުރިން މުހިއްމު ޓެސްޓުތައް ހަދައި ރައްކާތެރިކަމުގެ ފިޔަވަޅު އަޅަމުންދާ ކަމަށް އޭނާ ވިދާޅުވި އެވެ.
މިނިސްޓަރު ވިދާޅުވީ އެޗްއައިވީއަށް ގިނައިން ޕޮޒިޓިވްވެފައި ތިބީ ރައްކާތެރި ނޫން ގޮތުގައި ޖިންސީ ގުޅުން ހިންގުމުގެ ސަބަބުން ބަލި ޖެހުނު މީހުން ކަމަށެވެ.
"ފުރިހަމައަށް ރައްކާތެރިނުވެ ޖިންސީ ގުޅުން ބޭއްވުމުގެ ސަބަބުން އެކަކު ގައިން އަނެކަކު ގަޔަށް އަރާ ބައްޔެއްގެ ގޮތުގައި މިހާރު ވެސް އެންމެ ކޮމަން މޯޑު އޮފް ޓްރާންސްމިޝަނަކީ ރާއްޖޭގައި ބަލި ޖެހިފައި ތިބި މީހުން،" އޭނާ ވިދާޅުވި އެވެ.
ރާއްޖެއިން އެޗްއައިވީގެ ކޭހެއް އެންމެ ފުރަތަމަ ފެނުނީ މީގެ 35 އަހަރު ކުރިން 1991 ވަނަ އަހަރު އެވެ. އޭގެފަހުން އެ ނަމްބަރުތައް އެވްރެޖުކޮށް އަހަރަކު 3-6 ގައި ހިފެހެއްޓިފައި އޮތުމަށްފަހު މިއަހަރު ވަނީ ރިކޯޑު މިންވަރަކަށް އެޗްއައިވީއަށް މީހުން ޕޮޒިޓިވްވެފަ އެވެ.
މިނިސްޓަރު ވިދާޅުވީ އެކަންކަމަށް މީހުން ހޭލުންތެރިކުރާނީ ބަލި ފެތުރޭ މިންވަރަށް ބަލައިގެންނެވެ.
"އަދިވެސް ދިވެހިރާއްޖެއަކީ ލޯ ޕްރިވެލެންޓް ކަންޓްރީއެއްގެ ގޮތުގައި ދުނިޔެއިން ފާހަގަކުރޭ. މާނައަކީ އާބާދީގެ 0.01 ޕަސެންޓޭ އަދިވެސް އެޗްއައިވީއަށް ހުށަހެޅި، އެޗްއައިވީއަށް ޑިޓެކްޓް ކުރެވެނީ،" މިނިސްޓަރު ވިދާޅުވި އެވެ.
އެޗްއައިވީއަށް ޕޮޒިޓިވްވުމުން އެ މީހަކަށް ދޭން ޖެހޭ ފަރުވާތަކާއި ކައުންސެލިން ފޯރުކޮށްދޭ ކަމަށާއި އަދި ދެމެހެއްޓެނިވި ގޮތެއްގައި އެ މަސައްކަތް ގެންދާ ކަމަށް ވެސް ގީލާ ވިދާޅުވި އެވެ.