ރާއްޖޭގައި އެޗްއައިވީ ޖެހޭ މީހުންގެ އަދަދު މި އަހަރު ރެކޯޑް މިންވަރަކަށް އިތުރުވެފައިވާކަން ހާމަވެއްޖެ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާރުޓީއައި މެދުވެރިކޮށް މިދިޔަ ޖުލައި މަހު "މިހާރު" އާ ހިއްސާކުރި މައުލޫމާތުތަކުން އެނގޭ ގޮތުން 1991 ވަނަ އަހަރުން ފެށިގެން މިދިޔަ އަހަރުގެ ނިޔަލަށް އެޗްއައިވީއަށް ޕޮޒިޓިވްވީ 54 މީހުންނެވެ. އެ ބަލީގައި އެހާތަނަށް 16 މީހަކު މަރުވެފައިވެ އެވެ. އެހެންވެ އެ ބަލި ޖެހުނު މީހުންގެ ތެރެއިން އެހާ ހިސާބަށް ދުނިޔޭގައި ތިބީ 38 މީހުންނެވެ.
ނަމަވެސް، ދިވެހިރާއްޖޭގެ އަޑުގެ ޕްރޮގްރާމެއްގައި ޕްރެޒެންޓަރަކު ކުރި ސުވާލާ ގުޅިގެން ހެލްތު މިނިސްޓަރު ގީލާ އަލީ މިދިޔަ އާދިއްތަ ދުވަހު ވިދާޅުވީ އެޗްއައިވީ ޖެހިގެން މިހާތަނަށް 76 ކޭސް ރިޕޯޓުކޮށްފައިވާ ކަމަށެވެ. އޭގެ ތެރެއިން ދުނިޔޭގައި ތިބީ 52 މީހުން ކަމަށް މިނިސްޓަރު ވިދާޅުވި އެވެ.
އެޗްޕީއޭއިން ކުރިން ހިއްސާކުރި މައުލޫމާތާއި މިނިސްޓަރު ދެއްވި ނަމްބަރުތަކަށް ބަލާއިރު، މި އަހަރު އެކަނި ވެސް އަލަށް 22 މީހަކަށް އެޗްއައިވީ ޖެހިގެން ރިޕޯޓުކޮށްފައިވެ އެވެ. މިއީ، އެ ބަލި ރާއްޖޭން ފެނުނު އަހަރުން ފެށިގެން މިހާތަނަށް އެންމެ ގިނަ މީހުން ބައްޔަށް ޕޮޒިޓިވްވި އަހަރެވެ.
ކުރިން އެޗްޕީއޭ އިން ހިއްސާކުރި މައުލޫމާތުނ އެނގޭ ގޮތުގައި މިދިޔަ އަހަރު އެޗްއައިވީއަށް ޕޮޒިޓިވްވީ ފަސް މީހެކެވެ. އެ ނަމްބަރުތަކަށް ބަލާއިރު، އެޗްއައިވީއަށް އެވްރެޖުކޮށް އަހަރަކު 3-6 މީހުން ޕޮޒިޓިވް ވެފައިވެ އެވެ.
އެޗްއައިވީއަށް އާއްމުން ހޭލުންތެރިކުރުވަން އެޗްޕީއޭއިން މިދިޔަ ބުރާސްފަތި ދުވަހު ސޯޝަލް މީޑިއާގައި ޕޯސްޓެއް ކޮށްފައިވެ އެވެ. ނަމަވެސް އެ ބަލި އިތުރުވާކަން ނުވަތަ ނޫންކަން ރަސްމީކޮށް އިއުލާނެއް ނުކުރެ އެވެ.
ގީލާ ވިދާޅުވީ ރާއްޖޭގައި އެ ބައްޔަށް މީހުން ހޭލުންތެރިކުރުވުމުގެ ނަތީޖާ ފެންނަ ކަމަށެވެ. އޭގެ ތެރެއިން، އެ ބަލި ފެތުރޭ ގޮތާއި އެޗްއައިވީގެ ފަރުވާ އޮތް މިންވަރު ވެސް ސާފުވާ ކަމަށް އޭނާ ވިދާޅުވި އެވެ.
އެއިޑްސް ޖެހެނީ ރައްކާތެރި ނޫން ގޮތުގައި ޖިންސީ ގުޅުން ހިންގުމާއި އެކަކު ބޭނުންކޮށްފައި ހުންނަ ކަށި ނުވަތަ ސިރިންޖު ބޭނުންކުރުން ފަދަ ކަންކަމުންނެވެ. ނަމަވެސް، ރާއްޖޭގައި އެ ބަލި އިތުރުވަނީ ކޮން ސަބަބަކާ ހުރެ ކަމެއް އަދި ސާފެއްނުވެ އެވެ.