ކޮވިޑް-19 ޖެހިގެން މަރުވާ ސްރީ ލަންކާގެ މުސްލިމުން ވެސް އަންދާލާތީ އެ މައްސަލަ ބޮޑުވެފައި ވަނިކޮށް، ކޮވިޑްގައި މަރުވާ ލަންކާ މުސްލިމުން ރާއްޖޭގައި ވަޅުލައިދޭން އެ ގައުމުން އެދެފި އެވެ.
ކޮވިޑް-19 ޖެހިގެން މަރުވާ މީހުން ވަޅުލުމުގެ ހުއްދައެއް އެ ގައުމުގައި ނޯވެ އެވެ. ރައްކާތެރިކަމުގެ ފިޔަވަޅެއްގެ ގޮތުން ކަމަށް ބުނެ، ބަލީގައި މަރުވާ އެންމެން ވެސް އަންދާލަނީ އެވެ. އެހެންވެ ލަންކާގެ މުސްލިމުންނާއި ކްރިސްޓިއަނުން ވެސް އަންނަނީ އެކަމާ ކަންބޮޑުވުން ފާޅުކޮށް އިހުތިޖާޖު ވެސް ކުރަމުންނެވެ.
ލަންކާގެ ނޫސްތަކުގައި ބުނެފައިވަނީ އެ ގައުމުގައި ކޮވިޑް-19 ޖެހިގެން މަރުވާ މުސްލިމުން ވަޅުލައިދޭން ތައްޔާރަށް އޮތް ކަމަށް ބުނެ ދިވެހި ސަރުކާރުން އެކަމުގައި އިސްނެގީ ކަމަށެވެ. ނަމަވެސް އެނގިފައިވާ ގޮތުގައި މިއީ ލަންކާ އިން ހުށަހެޅި ކަމެކެވެ. ރާއްޖޭގެ ފޮރިން މިނިސްޓްރީން ބުނީ އެކަމާ ބެހޭ ގޮތުން ފަހުން ބަޔާނެއް ނެރޭނެ ކަމަށެވެ.
ލަންކާގެ ސަރުކާރާ ހަވާލާދީ ލަންކާގެ ޑެއިލީމިރާ ނޫހުން މިއަދު ބުނީ އެ ގައުމުގެ މުސްލިމުން ރާއްޖޭގައި ވަޅުލުމުގެ ހުއްދަ، މިދިޔަ ހަފުތާގައި ދިވެހި ސަރުކާރުން ދީފައިވާ ކަމަށެވެ.
ލަންކާގެ ޕަބްލިކް ހެލްތު ސާވިސްގެ ޑެޕިއުޓީ ޑިރެކްޓަރު ޖެނެރަލް ޑރ. ހެމަންތާ ހެރަތު ވިދާޅުވި ކަމަށް ޑެއިލީ މިރާއިން ބުނީ، ލަންކާގައި މަރުވާ މުސްލިމުން ވަޅުލުމަށް ރާއްޖޭން އިސްނަގައި، އެކަމާ ގުޅޭ ހާއްސަ ގައިޑްލައިނެއް އެކުލަވާލުމަށް ހެލްތު މިނިސްޓްރީއަށް މިހާރު އަންގާފައިވާ ކަމަށެވެ.
"[ރާއްޖޭގެ] ފޮރިން މިނިސްޓްރީން ހެލްތު މިނިސްޓްރީގައި އެދިފައިވަަނީ އެކަމާ ގުޅޭ ގައިޑްލައިނެއް އެކުލަވާލައި އެކަން އިތުރަށް ބެލުމަށް. އޭރުން ލަންކާއަށް ވަކި ޖަވާބެއް ދެވޭނީ،" ޑރ. ހެރަތު ވިދާޅުވި އެވެ.
އޭނާ ވިދާޅުވީ ލަންކާގެ މުސްލިމުން ރާއްޖޭގައި ވަޅުލުމަށް ދިވެހި ސަރުކާރުން ބޭނުންވީ، ވަކި ރަށްތަކަކަށް ރާއްޖެ ބެހިފައި އޮތުމުން، މީހުން ވަޅުލުމުގެ މައްސަލަ ކުރިމަތި ނުވާނެތީ ކަމަށެވެ. އަދި ލަންކާގެ މީހުން ވަޅުލާނީ ވަކި ރަށެއްގައި ކަމަށް ވެސް ލަންކާގެ އޮފިޝަލް ވިދާޅުވި އެވެ.
އޭނާ ވިދާޅުވީ މިއީ ކުރެވިދާނެކަމެއް ކަން އަދި ބުނަން ނޭނގޭ ކަމަށާއި އެކަން ޔަގީންވާނީ، އެކަމާ ގުޅޭގޮތުން ރާއްޖޭން ތައްޔާރުކުރާ ގައިޑްލައިނަށް ބެލުމަށް ފަހުގައި ކަމަށެވެ.
ލަންކާގައި ކޮވިޑް-19 ފެތުރުން ކޮންޓްރޯލް ނުވެ އަދިވެސް އޮތީ ބޯޑަރު ބަންދުކޮށްފަ އެވެ. ނަމަވެސް އެ ގައުމުން އަންނަނީ ބޯޑަރު ހުޅުވައި ޓޫރިޒަމް އަލުން ފަށަން ތައްޔާރުވަމުންނެވެ.