މާލެ ސަރަހައްދުން އަތޮޅުތަކަށް ކުރު މުއްދަތަކަށް ދަތުރުކުރާ މީހުން ކޮވިޑް-19 އަށް ޓެސްޓްކޮށްގެން ނޫނީ ދަތުރު ނުކުރެވޭ ގޮތަށް އޮތް އޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިމުކަކަށް ގެނެސްފި އެވެ.
އެޗްޕީއޭ އިން މިއަދު ކުރި އިއުލާނެއްގައި ބުނި ގޮތުގައި މާލެ ސަރަހައްދުން އަތޮޅުތަކަށް ކުރުމުއްދަތަށް ދަތުރުކުރާ މީހުން ޕީސީއާރު ޓެސްޓްހަދަން ނުޖެހުމުގެ އިތުރުން ވެސް ބައެއް ލުއިތައް ވަނީ ދީފަ އެވެ. އެގޮތުން އެންމެ ބޮޑު ލުޔެއް ދިނީ ރާއްޖޭން ބޭރުން މާލެެއަށް އަންނަ މީހުންނަށެވެ. އެގޮތަށް އަންނަ މީހުން ޕީސީއާރް ޓެސްޓް ހަދައި ނެގެޓިވް ނަތީޖާއާ އެކު އައުމުން ކަރަންޓީނުވާން ނުޖެހޭނެ ކަމަށް އެ އިއުލާނުގައިވާ އާ އުސޫލުގައި ވެ އެވެ. އެ އުސޫލު ދިވެހިންގެ އިތުރުން، ވޯކް ވިސާގައި އަންނަ ބިދޭސީންނަށް ވެސް ހިނގާނެ އެވެ.
ޕީސީއާރް ނެގެޓިވް ނަތީޖާއާ އެކު ރާއްޖޭން ބޭރުން މާލެ ސަރަހައްދަށް އަންނަ މީހުން ކަރަންޓީނުވާން ނުޖެހޭ ގޮތަށް ހެދުމަށް ފަހު އެޗްޕީއޭގެ އިއުލާނުގައި ބުނީ އެގޮތަށް އަންނަ މީހުން 10 ދުވަސްވަންދެން، ގޭތެރޭގައި ވެސް މާސްކް އަޅައިގެން އުޅުމާއި ގޭގައި އެކަހެރި ތިބުން އެދެވިގެންވާ ކަމަށެވެ. މި ބަދަލު ގެނައުމުގެ ކުރިން ރާއްޖޭން ބޭރުން އައިސް މާލެ ސަރަހައްދުގައި ތިބި މީހުން ވެސް ކަރަންޓީނުން ދޫކޮށްްލާނެ އެވެ. އެކަމަކު އެމީހުން ދޫކޮށްލާނީ ޓެސްޓްކުރުމަށް ފަހުގަ އެވެ. އެެހެން ތިބި މީހުން ޓެސްޓްކުރުމުގެ އިންތިޒާމް ހަމަޖެއްސުމަށް ފަހު އަންގާނެ ކަމަށް އިއުލާނުގައި ބުންޏެވެ.
ރާއްޖޭން ބޭރުން އަންނަ މީހުން ކަރަންޓީނު ނުވާ ގޮތަށް ހަމަޖެއްސި ނަމަވެސް ބޭރުން އައިސް މާލެ ނޫން އެހެން ރަށްރަށާއި ރިސޯޓްތަކަށް ދަތުރުކުރާ މީހުން ކަރަންޓީނުވާން ޖެހެ އެވެ. މާލެ ސަރަހައްދަށް އަންނަ މީހުންގެ ތެރެއިން ވެސް ތައުލީމީ ދާއިރާގައި މަސަައްކަތްކުރާ މީހުންނާއި މީހުން ބަލަހައްޓާ މަރުކަޒުތަކުގައި މަސައްކަތްކުރާ މުވައްޒަފުން ކަރަންޓީނުވާން ޖެހޭނެ ކަަމަށް ވެސް އެޗްޕީއޭގެ އިއުލާނުގައި ބުންޏެވެ. އެމީހުން ކަރަންޓީނުން ދޫކޮށްލާނީ 10 ދުވަސް ވުމުން ޓެސްޓް ހަދައި، ކޮވިޑަށް ނެގެޓިވް ނަމަ އެވެ.
އެޗްޕީއޭގެ މިއަދުގެ އިއުލާނުގައިވާ ގޮތުން އެ އިއުލާނު ނުކުތުމާއި އެކު ކުރީގެ ދެ އެންގުމެއް ބާތިލުވާނެ އެވެ. އެއީ ރާއްޖޭގެ ގެސްޓްހައުސްތަކާއި ހޮޓާތަކަށް ބިދޭސީން ޗެކިން ކުރުން ހުއްޓައިލަން އަންގައި މާޗް 31 ގައި ނެރުނު އިއުލާނާއި ރިސޯޓްތަކާއި ސަފާރީތަކުން އެހެން ރަށްރަށަށް ދަތުރުކުރުން ހުއްޓައިލަން އަންގައި އޭޕްރިލް 10 ގައި ކުރި އިއުލާނެވެ.
ކޮވިޑް-19 ކޮންޓްރޯލްކުރަން އަޅާފައިވާ ފިޔަވަޅުތަކަށް އެޗްޕީއޭއިން ލުޔެއް ދީފައި މިވަނީ އެބަލީގެ ކޭސްތައް ވަރަށް މަދުވެފައިވާތާ ދުވަސްކޮޅެއް ވެފައި ވަނިކޮށެވެ. މިހާރު އާއްމުކޮށް ކޮންމެ ދުވަހަކު ވެސް ކޮވިޑްގެ އާ ކޭސްތައް ފެންނަނީ 20 އަށް ވުރެ ދަށުންނެވެ.
