ހިޔާ މަޝްރޫއުގެ ދަށުން ހަދާފައިވާ ފްލެޓްތަކުގެ ގްރައުންޑް ފްލޯގައި، އެކި ހިދުމަތްތައް ދިނުމަށް، ޖާގައަށް ކުރިމަތިލުމުގެ ފުރުސަތު ހުޅުވާލައިފި އެވެ.
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އިއްޔެ އިއުލާން ކުރި ގޮތުގައި، ފްލެޓްތަކުގެ އެންމެ ތިރީގައި ފަސް ހިދުމަތެއް ދެވޭނެ އެވެ. އެއީ ކްލިނިކާއި ބޭސް ފިހާރަ އާއި ކާބޯތަކެތި ވިއްކާ ކުދި ފިހާރަ ހިންގުމުގެ އިތުރުން ސުޕަމާކެޓާއި ކެފެޓީރިއާ ހިންގުމެވެ. އެފަދަ ތަންތަން ހިންގުމަށް ޝައުގުވެރިވާ ފަރާތްތަކުން، އަންނަ މަހުގެ 21 ގެ ކުރިން ބީލަން ހުށަހެޅުމަށް ވަނީ ހުޅުވާލައިފަ އެވެ.
އެޗްޑީސީގެ އިއުލާނުގައިވާ ގޮތުން، ހިޔާ ކޮމާޝަލް އިން ކްލިނިކް ހެދުމަށް، 2،196 އަކަފޫޓު ދޫކުރާއިރު ބޭސް ފިހާރަ ހިންގުމަށް 542 އަކަފޫޓު ދެ އެވެ. އަދި ސުޕަމާކެޓް ހިންގުމަށް ފްލެޓް ހަޔަކާއި 14 އިން، 3،200 އަކަ ފޫޓަށް ވުރެ ބޮޑު ޖާގައެއް ދޫކުރުމަށް ވަނީ ނިންމައިފަ އެވެ. ކެފެޓީރިއާ ހިންގުމަށް، ދެ ފްލެޓަކުން 900-1000 އަކަފޫޓުގެ ބިން ދޫކުރާއިރު، ކުދި ފިހާރަ ހިންގުމަށް ދެ ފްލެޓަކުން 1،000 އަކަ ފޫޓަށް ވުރެ ބޮޑު ޖާގަ ދޫކުރާނެ ކަމަށް އެޗްޑީސީން ބުންޏެވެ.
ހިޔާ ފްލެޓްތަކުގައި އަދި ދިރިއުޅެން ނުފެށި ނަމަވެސް، އެކަމަށް މިހާރު ގިނަ ތައްޔާރީތައް އަންނަނީ ވަމުންނެވެ. އެގޮތުން ދެވަނަ ފިޔަވަހީގެ 7،000 ހައުސިން ޔުނިޓުގެ ފެނާއި ނަރުދަމާ ނިޒާމް ގާއިމްކުރުމުގެ މަސައްކަތް މިހާރު އަންނަނީ ކުރަމުންނެވެ.
ހިޔާ މަޝްރޫއުގައި 16 ޓަވަރު އިމާރާތްކޮށްފައިވާ އިރު، ކޮންމެ ފްލޯއެއްގައި، 20 ފްލެޓް ހުރެ އެވެ. ކޮންމެ ފްލެޓެއްގައި މަދުވެގެން ފަސް މީހުން ދިރިއުޅޭނެ ކަމަށް އެޗްޑީސީން ލަފާކުރެ އެވެ. އެ އަދަދުން ބަލާއިރު އެއީ ފްލޯއެއްގައި 100 މީހުންނެވެ. އެހެންކަމުން ކޮންމެ ޓަވަރެއްގައި، ގާތްގަނޑަކަށް 2،400 މީހުން ދިރިއުޅުން އެކަށީގެންވެ އެވެ. މުޅި 16 ޓަވަރަށް ބަލާ ނަމަ އެ އަދަދު 40،000 އާ ކައިރިކުރާނެ އެވެ.
