މާލޭ ވިޔަފާރި ބަނދަރުގައި ބިއްލޫރި ޕެލެޓެއް ވެއްޓި އޭގެ ދަށުވެ ތާށިވި މީހާ ސަލާމަތްކޮށްގެން އައިޖީއެމްއެޗަށް ގެންގޮސްފި އެވެ.
އެކަމަކު މި ނުރައްކާތެރި އެކްސިޑެންޓްގައި އޭނާގެ ހާލަތާ ބެހޭ ގޮތުން އެމްއެންޑީއެފުން އެއްވެސް މައުލޫމާތެއް ނުލިބެ އެވެ.
ސޯޝަލް މީޑިއާގައި ދައުރުވަމުން ދާ ފޮޓޯތަކުން، އެމީހާ އޮތީ ބިއްލޫރިތަކުގެ ތެރޭގައި ވަރަށް ބޮޑަށް ތާށިވެފަ އެވެ. ފެންނަން އޮތް އަތަށް ވެސް ބޮޑެތި ގެއްލުންތަކެއް ލިބިފައިވާކަން، ފޮޓޯއިން އެނގެ އެވެ.
މި އެކްސިޑެންޓްގައި ދެ މީހަކު ޒަހަމްވި އެވެ. އެކަކު މީގެ ކުރިން ވަނީ ހޮސްޕިޓަލަށް ގެންގޮސްފަ އެވެ. އައިޖީއެމްއެޗް މީޑިއާ އިން ބުނީ ދެ މީހުންނަށް ވެސް މި ވަގުތު ދަނީ ފަރުވާ ދެމުން ކަމަށާއި އެ މީހުންގެ ހާލު ސާފު ނުވާ ކަމަށެވެ.
އެނގިފައިވާ ގޮތުގައި އެމްޕީއެލް ސަރަހައްދުގައި އެ ދެ މީހުން މަސައްކަތްކުރީ ކޮންޓޭނަރެއްގައި އޮތް ޕެލެޓް، ފޯކްލިފްޓުގެ އެހީގައި ބާލާށެވެ. އެކަމަކު އެ ނަގަން އުޅެނިކޮށް އެ ވެއްޓުނީ، އޭރު ކޮންޓޭނަރުގައި ތިބި ދެ މީހުންގެ ގައި މައްޗަށެވެ.
މިރޭ އަށެއް ޖަހަން ކައިރިވެފައި ހުއްޓާ ހިނގި ހާދިސާގެ މަންޒަރު ދުށް މީހުން ބުނާ ގޮތުން، ބިއްލޫރިތަކުގެ ދިގުމިނުގައި ފަސްވަރަކަށް ފޫޓު ހުންނާނެ އެވެ.
"ޕެލެޓުގެ ދަށުގައި އޮތް މީހާ އޮތީ ވަރަށް ބޮޑަށް ޒަހަމްވެފައި،" ސިފައިންގެ މަސައްކަތުން އޭނާ އޭގެ ދަށުން ނެރުމުގެ ކުރިން ވާހަކަ ދެއްކި މީހަކު ބުންޏެވެ.
އެމްއެންޑީއެފުން މީޑިއާތަކަށް ދިން މައުލޫމާތުތަކަށް ބަލާއިރު، ކޮންޓެއިނަރު ތެރޭގައި ތާށިވި މީހާ ނެގީ، ބޭރުން ކޮންޓޭނަރު ކަފާލައިގެންނެވެ.
މާލޭގެ ވިޔަފާރި ބަނދަރުގައި ދޭތެރެ ދޭތެރެއިން ނުރައްކާތެރި އެކްސިޑެންޓްތައް ހިނގަ އެވެ. އެންމެ ފަހުން ބޮޑު ހާދިސާއެއް ހިނގީ ސެޕްޓެމްބަރު 2017 ގަ އެވެ. ބޯޓަކަށް ކޮންޓެއިނަރުތަކެއް އަރުވަން އުޅެނިކޮށް ކޮންޓެއިނަރެއްގައި ފައި ތާށިވުމުން، އެމްޕީއެލްގެ މުވައްޒަފެއްގެ ކަނާތު ފައި ބުރިކޮށްލަން ޖެހުނެވެ. އޭނާގެ އެ އޮޕަރޭޝަން ކުރީ، އިތުރު ފަރުވާއަށް އިންޑިއާއަށް ފޮނުވުމުން، ޓްރިވެންޑްރަމްގެ ކިމްސް ހޮސްޕިޓަލްގަ އެވެ.
