ގއ. މާމެންދޫގައި ރޭ ހިންގި ފުރަތަމަ މާރާމާރީއާ، އަހްމަދު އުދައްޔު 17ގެ މަރާ ދެމެދު ވާނީ ގާތްގަނޑަކަށް 45 މިނެޓެވެ. ދެ ގްރޫޕުގެ ދެމެދުގައި އޮންނަ އަހަރުތަކެއް ވީ ބަދަލު ހިފުމުގެ ރޫހުން ލޭ ކެކިގަތީ އެވެ.
މާމެންދޫން "މިހާރު"އާ ވާހަކަ ދެއްކި މީހުން މިއަދު ބުނީ އުދައްޔު އާއި އޭނާގެ ބޭބެ ފިރުޝާން ޒާހިރު ހިމެނޭ ގްރޫޕާއި އެ ރަށުގެ އެހެން ގްރޫޕަކާ ދެމެދު ރޭ ފުރަތަމަ މާރާމާރީ ހިންގީ ރަށުގެ ގެސްޓްހައުސްއެއްގެ ކައިރީގައި ކަމަށެވެ. އެ މާރާމާރީގައި އެއްވެސް މީހަކަށް އަނިޔާއެއް ނުވެ އެވެ. އެކަމަކު ޒުވާނުން ހިމެނޭ ދެ ގްރޫޕުގެ މާރާމާރީ ނިމުނީ ބޮޑު ފައިޓެއް އޮންނާނެ ކަމުގެ އިންޒާރު އެއް ބަޔަކު އަނެއް ބަޔަކަށް ދެމުންނެވެ.
"އޭގެ ގާތްގަނޑަކަށް 40 މިނެޓް ފަހުން ރަށުގެ ބޮޑު މަގު، ހަތަރު އަނގޮޅި ކަންމަތީގައި މާރާމާރީ ހިންގައި ވަޅި ޖެހީ،" ރަށުގެ އިސް ބޭފުޅަކު ވިދާޅުވި އެވެ.
އޭނާ ވިދާޅުވި ގޮތުގައި މި ދެ ގްރޫޕަކީ އެއް ބަޔަކު ހިތްހަމަނުޖެހޭ ކަމެއް އަނެއް ބަޔަކު ކުރާއިރަށް މީގެ ކުރިން ވެސް ބަދަލު ހިފަން މާރާމާރީ ހިންގާފައިވާ ބައެކެވެ.
ގއ. މާމެންދޫ ހެލްތު ސެންޓަރުން ބުނި ގޮތުގައި އުދައްޔު އެތަނަށް ގެންދިޔަ އިރު ބުރަކަށީގައި ވަޅީގެ ތިލަ ހުއްޓެވެ. ހަމަލާދިނީ ތިލައިގައި ތިން އިންޗި ހުރި ވަޅިއަކުންނެވެ. ހަށިގަނޑުން ފޭބި ލޭތަކުން ހެލްތު ސެންޓަރު ތެރޭގައި އޮތީ ކޯރު ދެމިފަ އެވެ. އެތަނުގެ ޑޮކްޓަރާއި ނަރުހަކާ އެކު ވަގުތުން، ވިލިނގިލީގައި ހުންނަ އަތޮޅު ހޮސްޕިޓަލަށް އުދައްޔު ފޮނުވާލީ ހާލު ސީރިއަސް ކަމުން ކަމަށް ހެލްތު ސެންޓަރުން ބުންޏެވެ.
އޭރު އުދައްޔުގެ ބޭބެ ފިރުޝާން ވެސް އޮތީ ފަރުވާއަށް މާމެންދޫ ހެލްތު ސެންޓަރަށް ގެންގޮސްފަ އެވެ. އޭނާ އަށް ވެސް ހަމަލާދިނީ ބުރަކައްޓަށެވެ. ދެ މީހުން ވިލިނގިލީ ހޮސްޕިޓަލަށް ގެންދިޔައީ ވަކިންނެވެ. އެއީ، ދަތުރުކުރަން އޮންނަ ސިއްހީ މަރުކަޒުގެ ލޯންޗުގެ ޖާގަ ކުޑަކަމުންނެވެ.
ވިލިނގިލީ ހޮސްޕިޓަލްގެ އޮފިޝަލަކު ވިދާޅުވީ އުދައްޔުގެ ފުރަގަހުން ފުއްޕާމެއާ ދިމާލަށް ތަކުރާރުކޮށް ވަޅި ހަރާފައި ހުރި ކަމަށެވެ.
"އެއް ފަހަރަކު ދެ ފަހަރަކު ނޫން. ވަރަށް ގިނަ ފަހަރަށް އެއް ތަނަކަށް ވަޅި ހަރާފައި ހުރީ. މިކޮޅަށް ގެނެވުނު އިރު އޮތީ މަރުވެފައި،" އޮފިޝަލް ވިދާޅުވި އެވެ.
މާމެންދު އާއި ވިލިނގިއްޔާ ދެމެދު ލޯންޗުގައި ހޭދަވާނީ ގާތްގަނޑަކަށް 10 މިނެޓެވެ.
"މިކޮޅުގައި ފަރުވާ ދީފައި، [ފިރުޝާން] މިހާރު ވަނީ ތިނަދޫ ހޮސްޕިޓަލަށް ބަދަލުކޮށްފައި. އަޅުގަނޑަށް މައުލޫމާތު ލިބެނީ ހާލު ރަނގަޅުވަމުން އަންނަ ކަމަށް،" އޭނާ ވިދާޅުވި އެވެ.
ލަފާކުރަނީ މަސްތުވާތަކެތީގެ މައްސަލައެއް ކަމަށް!
ކައުންސިލުން ބުނިގޮތުގައި ދެ ގްރޫޕްގައި ހިމެނޭ ގާތްގަނޑަަކަށް 10 މީހުން (ކުޑަކުދިން ވެސް ހިމެނޭ ގޮތަށް) މަރާމާރީ ހިންގި ސީދާ ސަބަބެއް ނޭނގެ އެވެ.
އެކަމަކު ރަށުގެ ބައެއް މީހުން ލަފާކުރާ ގޮތުގައި ސަބަބު ގުޅިފައި އޮތީ މަސްތުވާތަކެއްޗާ އެވެ. ދެ ގްރޫޕުން ރޭ ހަމަލައަށް ނުކުތް އިރު ވެސް ބައެއް މީހުން ތިބީ ހަމަހޭވެރިކަމުގައި ނޫން ކަމަށް ވެ އެވެ. އެ މީހުންގެ ތެރޭގައި މަސްތުވާތަކެތި ބޭނުންކުރުމާއި އޭގެ ވިޔަފާރިކުރާ ކަމުގެ ތުހުމަތުކުރާ މީހުން ތިބި ކަމަށް "މިހާރު"އަށް ވާހަކަ ދެއްކި މީހުން ބުނެ އެވެ.
ކައުންސިލުން ބުނީ ފުރަތަމަ މާރާމާރީ ފުލުހުންނަށް ރިޕޯޓްކުރި ކަމަށެވެ. އެކަން ތަހުގީގުކުރަން ފުލުހުން ހަރަކާތްތެރިވި ކަމުގެ މައުލޫމާތު ވެސް ލިބުނު ކަމަށް ކައުންސިލުން ބުންޏެވެ.
"އޭގެ ގިނަ އިރުތަކެއް ނުވަނީސް އުދައްޔުއަށް ހަމަލާދިނީ،" ކައުންސިލަރަކު ވިދާޅުވި އެވެ.
ފުރަތަމަ މާރާމާރީގައި އުދައްޔުގެ ރުޅި ކޮންޓްރޯލް ނުވެ ގެއަށް ދިޔައީ ވަޅިއެއް ހޯދަން ކަމަށް ވެސް ބައެއް މީހުން ބުނެ އެވެ. އޭނާ މަރާލީ ގެއިން ގެންދިޔަ ވަޅިން ކަމަށް ބުނާ މީހުން ވެސް އުޅެ އެވެ. ބޭބެ ފިރުޝާނަށް ހަމަލާދިނީ އަނެއް ގްރޫޕުން ގެންގުޅުނު ވަޅިއަކުންނެވެ.
އުދައްޔު މަރާލި މާރާމާރީގެ ތަހުގީގު ފުލުހުން އަންނަނީ ކުރަމުންނެވެ. އުދައްޔުގެ ބުރަކަށީގައި ހުރި ވަޅި ވެސް މިހާރު އޮތީ ފުލުހުންގެ ބެލުމުގެ ދަށުގަ އެވެ.
މި މައްސަލައިގައި ތިން މީހަކު މިހާރު ވަނީ ހައްޔަރުކޮށްފަ އެވެ. އެމީހުންގެ އުމުރަކީ 18، 23 އަދި 27 އަހަރެވެ.
މާރާމާރީ ތަހުގީގު ކުރަން ފުލުހުންގެ ޚާއްސަ ޓީމެއް މިހާރު ތިބީ މާމެންދޫގަ އެވެ.