މާމެންދޫ މާރާމާރީ: އިތުރު ދެ މީހަކު ހައްޔަރުކޮށްފި

ގއ. މާމެންދޫގައި ރޭ ކުއްޖެއްގެ ގަޔަށް ވަޅި ހަރައި، މަރާލުމުގެ ތުހުމަތުގައި އިތުރު ދެ މީހަކު ފުލުހުން މިއަދު ހައްޔަރުކޮށްފި އެވެ.

އުމުރުން 17 އަހަރުގެ އަހުމަދު އުދައްޔު މަރާލީ، ދެ ގުރޫޕެއްގެ ދެމެދުގައި ހިނގި ހަމަނުޖެހުމެއްގަ އެވެ. އެ މައްސަލައާ ގުޅިގެން މިހާތަނަށް، މިއަދު ވަނީ ތިން މީހަކު ހައްޔަރުކޮށްފަ އެވެ. އެއީ މުޅިން ވެސް އެ ރަށުގެ ޒުވާނުންނެވެ.

ފުލުހުން މިރޭ ބުނިގޮތުގައި މައްސަލައިގެ ތުހުމަތުގައި ފަހުން ހައްޔަރު ކުރީ، 18 އަހަރުގެ ކުއްޖަކާއި 25 އަހަރުގެ ފިރިހެނެކެވެ.

މާރާމާރީގައި އުދައްޔު މަރާލި އިރު، އޭނާގެ ބޭބެއަށް ވެސް ވަޅިން ހަމަލާދީ ވަނީ ވަރަށް ބޮޑަށް ޒަހަމްކޮށްލާފަ އެވެ. އެކަމަކު އޭނާގެ ހާލު މިހާރު ރަނގަޅެވެ.

ހޯމް މިނިސްޓަރު އިމްރާން އަބްދުﷲ މިރޭ ވަނީ، އުދައްޔުގެ މަރަށް އިންސާފު ހޯދައިދޭން މަސައްކަތް ކުރައްވާނެ ކަމަށް ވިދާޅުވެފަ އެވެ. އޭނާ ވިދާޅުވީ ރާއްޖޭގެ ފަސްގަނޑުގައި މި ފަދަ ޖަރީމާތައް ހިންގުމަކީ ސަރުކާރުން ތަހައްމަލް ކުރާނެ ކަމެއް ނޫން ކަމަށާއި އުދައްޔުގެ މަރަށް އިންސާފު ހޯދުމަށް ފުލުހުން އަޅަން ޖެހޭ ކޮންމެ ފިޔަވަޅެއް އަޅާނެ ކަމަށެވެ.

އުދައްޔު މަރުވީ، މާމެންދޫގައި ރޭ ހިންގި ދެ ވަނަ މާރާމާރީގަ އެވެ. އެންމެ ފުރަތަމަ މާރާމާރީގައި އުދައްޔު އާއި އޭނާގެ ބޭބެ ފިރުޝާން ޒާހިރު ވެސް ބައިވެރިވި އިރު، އޭނާ މަރުވީ އޭގެ ބަދަލު ހިފުމަށް ދިން ހަމަލާތަކުގަ އެވެ. މާމެންދޫގައި މި ފަހަކަށް އައިސް ގޭންގު މާރާމާރީ އާއި މަސްތުވާތަކެއްޗާ ގުޅުން ހުރި ކުށްތައް ވަނީ އިތުރުވެފަ އެވެ.