އައިޖީއެމްއެޗުގެ މުވައްޒަފުންގެ ޕާކިން ޒޯނަށް ވަންނަ ތަނުގައި ހަރުކޮށްފައި ހުރި އޮޓޯ އިން ތިރިވެ މައްޗަށް އަރާ "ގޭޓް އާމް" ބޮލަށް ވެއްޓެން އުޅުމުން ސިއްސައިގެން ގޮސް ސައިކަލުން ވެއްޓި، ނަރުހެއްގެ ބައެއް ތަންތަން އިއްޔެ ބިނދިއްޖެ އެވެ.
އިއްޔެ ހެނދުނު ހިނގި މި އެކްސިޑެންޓްގައި ބޮޑަށް ޒަހަމްވީ ސައިކަލްގެ ފަހަތުގައި އިން ނަރުހެވެ. އެކަމަކު ސައިކަލް ދުއްވަން އިން ނަރުހަށް ވެސް އަނިޔާތަކެއް ލިބުނު ކަމަށް، މައުލޫމާތު ހުރި ބައެއް މީހުން ބުންޏެވެ.
ދެ ނަރުހުން ތިބި ސައިކަލްގެ ކުރިން ދެ ސައިކަލެއް ޕާކިން ޒޯނަށް ވަން އިރު ގޭޓް އާމް ރަނގަޅަށް މަސައްކަތްކުރި އެވެ. ދެ ނަރުހުންގެ ސައިކަލް ގޭޓް ހުރަސްކުރަން ދިޔަ އިރު ވެސް ގޭޓް އާމް ހުރީ މައްޗަށް އަރައިފަ އެވެ. އެކަމަކު އެ ހިސާބަށް ސައިކަލް އަރާ ހަމަވި ވަގުތު ކުއްލިއަކަށް ގޭޓް އާމް ތިރިއަށް ވެއްޓެ އެވެ. އެއިން ސަލާމަތްވާން ފަހަތުގައި އިން ނަރުސް އަތް ވެސް މައްޗަށް ނަގަ އެވެ.
"މިހާރު"އާ ވާހަކަ ދެއްކި، މައުލޫމާތު ހުރި މީހަކު ނަން ނުޖަހަން ޝަރުތުކޮށް، ބުނީ ފަހަތުގައި އިން ނަރުސް ސިއްސައިގެން ދިއުމާ އެކު، ދުއްވަން އިން ނަރުހަށް ކޮންޓްރޯލްނުވެ، އެތަނަށް ސައިކަލް ވެއްޓުނީ ކަމަށެވެ.
ވީޑިއޯ އިން ފެންނަ ގޮތުގައި އެ ވަގުތު އެތަނުން ހިނގާފައި ހުރަސް ކުރި އެހެން ނަރުހަކު އެމީހުން ނަގަން ދެ އެވެ. އޭރު ފަހަތުގައި އިން ނަރުސް، ތެދުވަން އުޅޭ ތަންކޮޅު ވެސް ފެނެ އެވެ. ސައިކަލް އޭރު އޮތީ، ދުއްވަން އިން ނަރުސްގެ ގައި މަތީގަ އެވެ.
ފަހަތުގައި އިން ނަރުހުގެ ވާތު ފައިގެ ކަކޫ ދަށުން ކަށިގަނޑެއް ބިނދުމުގެ އިތުރުން ކަނާތުގެ ކުޑަވާ އިނގިލި ވެސް ބިނދިފައިވާ ކަމަށް، "މިހާރު"އާ ވާހަކަ ދެއްކި މީހާ ބުންޏެވެ.
ބައެއް މީހުން ބުނި ގޮތުގައި މިއީ އެގޮތަށް ގޭޓް އާމްގެ ސަބަބުން އެތަނުގައި އެކްސިޑެންޓް ހިނގި ފުރަތަމަ ފަހަރެއް ވެސް ނޫނެވެ. މި ފަހުން ހަމަ އެކަހަލަ ގޮތަކަށް އެކްސިޑެންޓްވެ، މީހަކަށް ފަރުވާ ދޭން ޖެހުނު ކަމަށްވެ އެވެ.
މި ހާދިސާއާ ބެހޭ ގޮތުން އައިޖީއެމްއެޗުން ވަކި އެއްޗެކޭ ނުބުނެ އެވެ.