ކޮވިޑް-19 ޖެހުމަށް ފަހު އެ ބަލިން ރަނގަޅުވާ މީހުންނަށް ވެސް އެ ބަލި ޖެހުމުގެ ފުރުސަތު އޮންނާނެ ކަމަށް ކްލިނިކަލް ގޮތުން ބަލަން ފަށައިފި އެވެ.
ކޮވިޑް-19 އާ ބެހޭ ގޮތުން ސޯޝަލް މީޑިއާގައި އަބަދުވެސް މައުލޫމާތު ދެއްވާ އައިޖީއެމްއެޗްގެ އެތެރެހަށީގެ ޑޮކްޓަރު މުހައްމަދު އަލީ ކުރެއްވި ޓްވީޓެއްގައި ވިދާޅުވި ގޮތުގައި ކޮވިޑަކީ އެއްފަހަރަށް ވުރެ ގިނައިން ޖެހޭ ބައްޔެއްގެ ގޮތުގައި މި ބަލީގެ ކްލިނިކަލް ސްޕެކްޓްރަމް އަށް މިހާރު ވަނީ އިތުރުކޮށްފަ އެވެ.
ޑޮކްޓަރު ލިޔުއްވާފައިވާ ގޮތުގައި ކޮވިޑް ޖެހި ރަނގަޅުވުމަށް ފަހު ވެސް ކޮވިޑްގެ އަލާމާތްތައް އަލުން ފެންނަން ފަށައިފި ނަމަ، އެހެން ދިމާވާ އިތުރު ސަބަބެއް ނޭނގޭ ނަމަ ކޮވިޑަށް ޓެސްޓުކުރަންވާނެ އެވެ.
މި ޓްވީޓާ ގުޅިގެން މީހަކު ކޮށްފައިވާ ސުވާލެއްގެ ޖަވާބުގައި ޑޮކްޓަރު ވިދާޅުވީ ކޮވިޑް ޖެހި ރަނގަޅުވުމަށް ފަހު ބައްޔަށް ޕޮޒިޓިވް ކަމަށް ދެއްކިޔަސް އެ މީހެއްގެ ކިބައިން ބަލީގެ އަލާމާތްތައް ނުފެންނަ ނަމަ އަދި ރިކަވަރީގައި ހުންނަ އިރު އެ މީހެއްގެ ފަރާތުން އެހެން މީހުންނަށް ބަލި ފެތުރުމުގެ ފުރުސަތު ނޯންނަ ކަމަށެވެ.
ކޮވިޑުން ރަނގަޅުވެފައިވާ މީހުންނަށް ވެސް އަލުން އެ ބަލި ޖެހޭކަން މިހާރު އެނގުނަސް ޑޮކްޓަރުން ޔަގީންކަން ދެއްވާ ގޮތުގައި ބަލިން ރައްކާތެރިވާން ވެކްސިން ޖަހާފައިވާ ނަމަ ބަލި ޖެހުމުގެ ފުރުސަތު ވެސް އަދި ބަލީގައި ފުރާނައަށް ނުރައްކާވާ ހިސާބަށް ދިއުމުގެ ފުރުސަތު ވެސް އެތައް ގުނައަކަށް ކުޑަކޮށްދެ އެވެ. އަދި ވެކްސިން ޖެހުމަށް ފަހު ވެސް ބަލިން ރައްކާތެރިވުމުގެ ފިޔަވަޅުތަކާ އެކު އުޅުމަށް ލަފާދެ އެވެ.
ކޮވިޑް ވައިރަސްގެ އެކި ވޭރިއަންޓްތަކާ އެކު ބަލި ފެތުރޭ ގޮތާއި ބަލީގައި މީހުންނަށް މެދުވެރިވާ ކަންކަމަށް ވަނީ ބަދަލުތައް އައިސްފަ އެވެ.
ރާއްޖޭގައި ކޮވިޑް ފެތުރެން ފެށި ފަހުން ބަލީގެ ހާލަތު މިހާ ބޮޑަށް ގޯސްވި ދުވަސްވަރެއް ނާދެ އެވެ. ކޮންމެ ދުވަހަކު އަލަށް ހާހަކަށް ވުރެ ގިނަ ކޭސް ފެންނަމުން ދާއިރު ކޮންމެ ދުވަހަކު މި ބަލީގައި އެތައް ބަޔަކު މަރުވެ އެވެ. އެހެންވެ ބަލިން ރައްކާތެރިވެގެން އުޅުމަށް ކުރެވެން ހުރި ހުރިހާ ކަމެއް ކުރަން ސިއްހީ އިދާރާތަކުން އަންނަނީ ކެނޑިނޭޅި އިލްތިމާސްކުރަމުންނެވެ.
ކޮވިޑް ޖެހިފައި މިހާރުވެސް 23،000 އަށް ވުރެ ގިނަ މީހުން ރާއްޖޭގައި ތިބި އިރު ބަލީގައި މިހާތަނަށް މަރުވި މީހުންގެ އަދަދު ވަނީ 130 އަށް ވުރެ މައްޗަށް ގޮސްފަ އެވެ.
