ހުޅުމާލޭ މެޑިކަލް ފެސިލިޓީގައި އޮތް ބަލި މީހަކަށް އަނިޔާކުރި މައްސަލާގައި ހައްޔަރުކުރި ބިދޭސީ މީހާގެ ބަންދަށް 15 ދުވަސް އިތުރުކޮށްފި އެވެ.
ހުޅުމާލޭގައި ގާއިމް ކޮށްފައިވާ ކޮވިޑް-19 ފެސިލިޓީގައި އޮޮތް އުމުރުން ދުވަސްވީ ބަލިމީހަކަށް ބިދޭސީއަކު ހަމަލާދޭ މަންޒަރު ފެންނަ ވީޑިއޯއެއް އިއްޔެ އާންމުވުމާ އެކު، އެ މީހާ ވަނީ ހައްޔަރުކޮށްފަ އެވެ. އެ މީހާއަކީ ބަލި މީހާ ބެލުމާ ހަވާލުވެ ހުރި ބަންގްލަދޭޝްގެ ރައްޔިތެކެވެ.
ފުލުހުން ބުނީ އޭނާ 15 ދުވަހަށް ބަންދުގައި ބަހައްޓަން ކޯޓުން މިއަދު އަމުރު ކޮށްފައިވާ ކަމަށެވެ.
އާންމުވެފައިވާ ވީޑިއޯއިން ފެންނަ ގޮތުގައި ބަލި މީހާގެ މޫނުމަތީގައި އޭނާ ބާރަށް ޖެހުމާ އެކު އެ މީހާ ރޯން ފަށަ އެވެ. އެ މީހާ ރޯން ފެށުމުން އޭނާއާ ދިމާލަށް ބާރަށް އެއްޗެއް ބުނެ، އިންޒާރު ދޭ ތަން ވެސް ފެނެ އެވެ.
