އިންޓެލިޖެންސް އޮޑިޓް: ފުރަތަމަ މަރުހަލާގެ ނިންމުންތައް މި މަހުގެ ނިޔަލަށް ނިމޭނެ

ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓް ހަމަލައާ ގުޅިގެން، އިންޓެލިޖެންސްގެ އޮޑިޓެއް ހެދުމަށް އެކުލަވައިލި ހާއްސަ ކޮމިޓީން، ޕްރިމިލިނަރީ ފައިންޑިންސް ނުވަތަ ފުރަތަމަ މަރުހަލާގެ ހޯދުންތައް މި މަހުގެ ނިޔަލަށް ރައީސް އިބްރާހިމް މުހައްމަދު ސޯލިހަށް ހުށަހަޅާނެ ކަމަށް ރައީސް އޮފީހުން މިއަދު ބުނެފި އެވެ.

މިދިޔަ މަހުގެ ހަ ވަނަ ދުވަހުގެ ރޭ 8:30 ވާން އުޅެނިކޮށް، ނަޝީދުގެ ގެކޮޅު ގ. ކެނެރީގެ އިން ނުކުމެވަޑައިގެން ކާރުކޮޅަށް އަރައިވަޑައިގަންނަވަނިކޮށް، އައިއީޑީއެއް ގޮއްވައިލި މައްސަލާގައި ސަލާމަތީ ބާރުތަކުން ބުނެފައި ވަނީ އެފަދަ ހަމަލާއެއް ދޭން އުޅޭ ކަމެއް އެނގިފައި ނުވާ ކަމަށެވެ.

އެއީ އިންޓެލިޖެންސްގެ ވަރަށް ބޮޑު ފެއިލިއާއެއް ކަމަށް ނިންމަވައި، އިންޓެލިޖެންސްގެ އޮޑިޓެއް ހެދުމަށް ރައީސް އިބްރާހިމް މުހައްމަދު ސޯލިހު ކޮމިޓީއެއް އެކުލަވައިލެއްވީ މިދިޔަ މަހުގެ 15 ގަ އެވެ.

އެ ކޮމިޓީގެ މަސައްކަތްތަކާ ގުޅޭ ގޮތުން "މިހާރު" އިން ސުވާލު ކުރުމުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، އިންޓެލިޖެންސް އިދާރާތަކުގައި މިހާރު ގާއިމު ކޮށްފައިވާ އިޖުރާއަތްތައް އެ ކޮމިޓީން މިހާރު މުރާޖައާ ކޮށްފައިވާ ކަމަށާއި މިވަގުތު ކުރިޔަށް ގެންދަނީ ކަމާ ގުޅުން ހުރި އިދާރާތަކާ ބައްދަލު ކުރުން ކަމަށެވެ.

"ކޮމިޓީގެ ހޯދުންތައް ރައީސަށް ހުށަހަޅާނަން. ޕްރިލިމިނަރީ ފައިންޑިންސް މި މަހުގެ ނިޔަލަށް ނިމޭނެ ކަމަށް އުންމީދު ކުރަނީ،" މަބްރޫކް ވިދާޅުވި އެވެ.

ނަޝީދަށް ހަމަލާއެއް ދޭން އުޅޭ ކަމުގެ މައުލޫމާތު ލިބިފައި ނުވާ ކަމަށް ސަލާމަތީ ބާރުތަކުން ބުނި ނަމަވެސް، އެ މަނިކުފާނަށް ބަޔަކު ހަމަލައެއް ދޭން އުޅޭ ކަމުގެ މައުލޫމާތު އާންމު މީހެއްގެ ފަރާތުން ލިވިވަޑައިގަތުމާ އެކު، އެކަން ޑިފެންސް މިނިސްޓަރު މާރިޔާ އަހުމަދު ދީދީ އަށް ހިއްސާ ކުރެއްވި ކަމަށް 241 ކޮމިޓީގައި ހިމެނިވަޑައިގަންނަވާ، ހުޅުދޫ ދާއިރާގެ އެމްޑީޕީގެ މެމްބަރު އިލްޔާސް ލަބީބު ވަނީ ވިދާޅުވެފަ އެވެ.

މާރިޔާ ވެސް ވަނީ ނަޝީދަށް ހަމަލަދޭން އުޅޭ ކަމުގެ މައުލޫމާތު މެމްބަރެއްގެ ފަރާތުން އެނގިވަޑައިގަތުމުން ނަޝީދުގެ ސެކިއުރިޓީ ވަރުގަދަ ކުރަން އެމްއެންޑީއެފަށް އަންގަވާނެ ކަމަށް އިލްޔާސްގެ އަރިހުގައި ވިދާޅުވެފަ އެވެ.

ނަމަވެސް ނަޝީދަށް ހަމަލާ ދިން މަންޒަރު އެރި ސީސީޓީވީ ފުޓޭޖްތަކުން ފެންނަ މަންޒަރުތަކަށް ބަލާއިރު، އެ މަނިކުފާނަށް ދީފައި އޮތީ ހައި ސެކިއުރިޓީއެއް ނޫން ކަމަށް ބުނެ ގިނަ ބަޔަކު ވަނީ މާރިޔާ އަށް ފާޑު ކިޔައިފަ އެވެ. އަދި އޭނާގެ އިސްތިއުފާ އަށް ވެސް އެމްޑީޕީގެ ތެރެއިން ދަނީ ގޮވަމުންނެވެ.

ރައީސް އެކުލަވައިލެއްވި ކޮމިޓީގެ އިތުރުން ރައްޔިތުންގެ މަޖިލީހުގެ 241 ކޮމިޓީން ވެސް އަންނަނީ އިންޓެލިޖެންސް ފެއިލްވި ސަބަބުތައް ބަލަމުންނެވެ.