ހިޔާ މަޝްރޫއުގެ ދަށުން އަޅާފައިވާ ފްލެޓް ލިބުނު މީހުންގެ ތެރެއިން ފްލެޓް އެއްބަސްވުމުގައި ސޮއިކުރުމަށް ތާވަލުކޮށް އާންމުކުރި ލިސްޓުގައި ހިމެނުނު 300 އެއްހާ މީހުން ސޮއިކުރަން އަދިވެސް ނާންނަ ކަމަށާއި ސަބަބެއް ނެތި އެއްބަސްވުމުގައި ސޮއިކުރަން ނައި ނަމަވެސް ފިނިޝިން މުއްދަތު އިތުރުކޮށް ނުދޭނެ ކަމަށް އެޗްޑީސީން މިއަދު ބުނެފި އެވެ.
ޖުލައި މަހުގެ 14 ވަނަ ދުވަހުން ފެށިގެން ފްލެޓް އެއްބަސްވުމުގައި ސޮއިކުރަން ފަށާފައިވާއިރު މިހާތަނަށް 3،200 މީހުންނާ އެކު އެއްބަސްވުމުގައި ސޮއިކޮށް ތަޅުދަނޑި ވަނީ ހަވާލުކޮށްފަ އެވެ. ފްލެޓް ލިބުނު ހާހެއްހާ މީހުން މައުލޫމާތު ފޯމު ފުރުމަށް ފަހު އަދި ހުށައެއްނާޅަ އެވެ.
ފްލެޓް ލިބުނު މީހުނާ އެކު މިމަހުގެ 18 ގައި އެއްބަސްވުމުގައި ސޮއިކުރުމުގެ ފުރަތަމަ ބުރު ނިންމުމަށް އެޗްޑީސީން ވަނީ އަމާޒު ހިފައިފަ އެވެ.
ހުރަވީ ސްކޫލުގައި ނޫސްވެރިންނާ ބައްދަލުކުރައްވައި އެޗްޑީސީގެ މެނޭޖިން ޑިރެކްޓަރު ސުހައިލް އަހުމަދު ވިދާޅުވީ ލިސްޓު އާންމުކުރުމުން ވެސް ފްލެޓް އެއްބަސްވުމުގައި ސޮއިކުރަން ނާދެވެނީ ކީއްވެކަން އަންގާފައި ނުވާ ކަމަށެވެ. އެކަމަކު ސަރުކާރު ބަންދު ގިނަ ދުވަސް ލިބުމުން މީހުންނަށް ނާދެވުނީ ކަމަށް ވެދާނެ ކަމަށް ވެސް ސުހައިލް، ވިދާޅުވި އެވެ.
ސުހައިލް ވިދާޅުވީ އެކި ސަބަބުތަކާ ހުރެ އެއްބަސްވުމުގައި ސޮއިނުކުރެވި ތިބި މީހުންނަށް ހާއްސަކޮށް ދެވަނަ ބުރެއް ފެށުމަށް ތައްޔާރުވެފައިވާ ކަމަށާއި މި މަސް ނިމުމުގެ ކުރިން ދެވަނަ ބުރުގެ ސޮއިކުރުން ވެސް ނިންމާލެވޭނެ އެވެ.
"ދެން އެހާ ތަނަށް އަޅުގަނޑުމެން ބަލާނީ ޓައިމް ވެސް ދެވިފައޭ އޮންނާނީ ހުރިހާ ފަރާތްތަކަށް ސޮއިކުރަން." ސުހައިލް، ވިދާޅުވި އެވެ.
ސުހައިލް ވިދާޅުވީ ސެޕްޓެމްބަރު އެއް ވަނަ ދުވަހުން ފެށިގެން ފިނިޝިންް މަސައްކަތް ނިންމަން ދޭ ހަތަރު މަސް ގުނަންފަށާނެ ކަމަށެވެ. އެކަމަކު އިތުރު ސަބަބެއް ނެތި ސޮއިނުކޮށް ތިއްބި މީހުންނަށް އިތުރު މުއްދަތެއް ނުލިބޭނެ ކަމަށް އޭނާ ވިދާޅުވި އެވެ.
"ހަމަ ހަތަރު މަސް ލިބޭނީ. ސެޕްޓެމްބަރު އެކަކުން ފެށިގެން ހަތަރު މަހުގެ މުއްދަތު ލިބޭނީ. ގަބޫލުކުރެވޭ އުޒުރަކާ އެއްކޮށް ސޮއިކުރަން ނާދެވޭ ނަމަ، އަޅުގަނޑުމެން ގަބޫލުކުރާނަން،" ސުހައިލް ވިދާޅުވި އެވެ.
ސުހައިލް ވިދާޅުވި ގޮތުގައި މިހާރު ވެސް ތާވަލުކޮށްފައިވާ ގޮތަށް މިމަހުގެ 17 ވަނަ ދުވަހު ފްލެޓްތަކަށް ކަރަންޓު ގުޅައި ނިމޭނެ އެވެ. އޭރުން އޭގެ ފަހުން ފްލެޓުގެ މަސައްކަތް ކުރުމަށް އެތަނަށް މީހުންނަށް ވަދެވޭނެ ކަމަށް އޭނާ ވިދާޅުވި އެވެ.
"ސަތާރައިގެ ފަހުން ފްލެޓްތަކަށް އެބަ ކަރަންޓު ދެވޭ. ދެވުނީމަ ދެން ހަމަ ހުރިހާ ބޭފުޅުންނަށް ވެސް ވަދެވޭނެ."
ބޮކި، ފަންކާ، އަދި ތަށިމުށި ވެސް ނުޖަހައި ހަވާލުކުރާ މި ފްލެޓްތައް ނިންމުމަށް ކުރިން ދޭން ނިންމީ ތިން މަސް ނަމަވެސް މިހާރު ނިންމާފައި ވަނީ ހަތަރު މަސް ދުވަސް ދިނުމަށެވެ. އެގޮތަށް ނިންމުމުން ޑިސެމްބަރު މަހުގެ ނިޔަލަށް ފްލެޓުން އެއްވެސް ކުއްޔެއް އަދި ފީއެއް ވެސް ނުނަގާނެ އެވެ. އެކަމަކު މި ތަންތަނުގެ މަހު ކުއްޔާއި ސާވިސް ފީއަށް މަހަކު 8،500ރ. ނަގަން ސަރުކާރުން ވަނީ ނިންމައިފަ އެވެ.
އެ އަދަދު ބޮޑުވެގެން ފްލެޓް ލިބުނު ގިނަ ބަޔަކު ކުލި ކުޑަކޮށްދޭން ގޮވާލި ނަމަވެސް އެޗްޑީސީން ބުނެފައި ވަނީ ފްލެޓް އެޅުމަށް ނެގި ލޯނު އަނބުރާ ދެއްކޭނީ މިހާރު ކަނޑައަޅާފައިވާ ވަރަށް ކުލި ނަގައިގެން ކަމަށެވެ.