މެންޓަލް ހެލްތުގެ ދާއިރާއިން މަތީ ތައުލީމު ހާސިލްކުރަން ސަރުކާރުން 30 ސްކޮލަޝިޕް ދެނީ

ރާއްޖޭގައި ނަފްސާނީ މައްސަލަތައް ހައްލުކުރުމުގައި އެހީވާނެ މީހުން އުފެއްދުނމަށް، އެ ދާއިރާއިން މަތީ ތައުލީމު ހާސިލްކުރުމަށް ސަރުކާރުން 30 ސްކޮލަޝިޕް ދޭން ނިންމައިފި އެވެ.

ނޭޝަނަލް ސްކިލްސް ޑިވެލޮޕްމެންޓް މާސްޓަ ޕްލޭން އިފްތިތާހުކުރުމަށް ހޮޓެލް ޖެންގައި މިއަދު ބޭއްވި ރަސްމިއްޔާތުގައި ރައީސް އިބްރާހިމް މުހައްމަދު ސޯލިހު ވިދާޅުވީ އިގުތިސާދީ އަދި އިޖުތިމާއީގޮތުން ރާއްޖެއަށް އަންނަ ބަދަލުތަކަށް ބަލާއިރު، މީހުން ބިނާކުރަންޖެހޭ ވަރަށް ގިނަ ދާއިރާތައް އެބަހުރި ކަމަށެވެ. އޭގެ ތެރެއިން ވެސް، މެންޓަލް ހެލްތަކީ ވަރަށް ހާއްސަ އިސްކަމެއްދީގެން މީހުން ބިނާކުރަން ޖެހިފައިވާ ދާއިރާއެއް ކަމަށް ރައީސް ވިދާޅުވި އެވެ.

އެހެންވެ، ކްލިނިކަލް ސައިކޮލޮޖީ، ޕްރޮފެޝަނަލް ކައުންސެލިން އަދި އެޑިކްޝަން ސްޓަޑީޒް ހިމެނޭގޮތަށް މާސްޓާސް ފެންވަރުގެ 30 ސްކޮލަޝިޕަށް ވަރަށް އަވަހަށް ހުޅުވާލާނެ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި، މީހުން ބިނާކުރުމަށް ދައުލަތުން ކުރާ މަސައްކަތުގެ ނަތީޖާ މިއަދު ނުފެނިދާނެ އެވ، ނަމަވެސް މިއަދު މި ކުރާ ގޮވާމުގެ ފޮނިިމީރުކަން މާދަމާގެ ދިވެހި މުޖުތަމައުން ފެންނާނެކަން ޔަގީން ކަމަށް ވެސް ރައީސް ވިދާޅުވި އެވެ.

އެ މަނިކުފާނު ވިދާޅުވީ މީހުން ބިނާކުރުމަކީ ގައުމުގެ ކުރިމަގަށްޓަކައި ރައްކާކުރެވޭ ވަރަށް އަގުބޮޑު ރައުސްމާލެއް ކަމަށެވެ. އެކަމަށް ސަރުކާރުން ކުރަމުން އަންނަ މަސައްކަތުގައި ހުރިހާ ބެލެނިވެރިން އެއްބާރުލުންދީ، ސަރުކާރުން ފަހިކޮށްދޭ އެ ފަދަ ފުރުސަތުތަކުގެ ބޭނުން ހިފައި ގައުމުގެ ތަރައްގީގައި މިހާރަށްވުރެ ފުޅާ ދާއިރާއެއްގައި ބައިވެރިވެރިވުމަށް ރައީސް އިލްތިމާސްކުރެއްވި އެވެ.

ފަސް އަހަރު ދުވަހަށް ތައްޔާރުކޮށްފައިވާ މާސްޓަ ޕްލޭނުގައި ރާއްޖޭގެ ވަޒީފާގެ ބާޒާރަށް އެންމެ ބޮޑަށް މީހުން ބޭނުންވެފައިވާ ހުރިހާ ދާއިރާތަކާއި ރާއްޖޭގެ މީހުން ތަމްރީނު ކުރަމުން އަންނަ ދާއިރާތަކާ ދެމެދު އޮތް ހުސްކަން ކުޑަކުރެވިގެންދާނެ އެވެ.

ރައީސް ވިދާޅުވީ ފަންނީ ވަޒީފާތަކަށް ތަމްރީނު ލިބިފައިވާ ދިވެހީން ހޯދަން ކުރިމަތިވެފައިވާ ދަތިތަކަށް ސްކިލްސް ޑިވެލޮޕްމެންޓް ޕްލޭނުގެ ސަބަބުން ލުއި ލިބިގެންދާނެ ކަމަށެވެ. ފަންނީ ވަޒީފާތަކަށް ގެންނަ ބިދޭސީންގެ އަދަދު ވެސް ދަށްވެގެންދާނެ ކަމަށާއި އިގުތިސޯދީގޮތުން މިހާރު ކުރިމަތިވަމުންދާ ބޮޑެތި ގޮންޖެހުންތަކަށް ހައްލެއް ލިބިގެން ދާނެ ކަމަށް ވެސް ވިދާޅުވި އެވެ.

"އަޅުގަނޑުމެން މި އަންނަނީ ރާއްޖޭގެ ހުރިހާ އަތޮޅެއްގައި ތަރައްގީގެ ވަރަށް ގިނަ މަސައްކަތްތަކެއް ކުރަމުން. ރާއްޖޭގެ ހުރިހާ ރަށެއްގައި ފެނާއި ނަރުދަމާ ނިޒާމު އެބަ ގާއިމްކުރަން. އިތުރު ސަރަހައްދީ ވައިގެ ބަނދަރުތައް އެބަ ހަދަން. ޓާޝަރީ ފެންވަރަށް ފަސް ހޮސްޕިޓަލެއް ވެސް އެބަ ތަރައްގީކުރަން. ހުރިހާ ރަށެއްގެ އިންޖީނުގެތައް ޒަމާނީ ފެންވަރަށް އެބަ ބަދަލުކުރަން. މީގެ އިތުރުން ވެސް އެތައް މަސައްކަތްތަކެއް އެތައް ޕްރޮގްރާމްތަކެއް ރާއްޖޭގެ އެކި ކަންކޮޅުތަކުގައި އެބަ ހިންގަން،" ރައީސް ވިދާޅުވި އެވެ.

"މިއިން ކޮންމެ މަޝްރޫއެއް ނިމޭއިރު، ރަށްރަށުގައި އުފެދިގެންދާނީ އެތައް ވަޒީފާއެއް. މިއިން ކޮންމެ މަޝްރޫއަކާއެކު އުފެދޭ މުއައްސަސާތައް ހިންގުމަށްޓަކައި ކިޔަވައިގެން ތިބި ފަންނީ މީހުން ބޭނުންވާނެ. އެ ތަންތަން މަރާމާތުކޮށް ބެލެހެއްޓުމަށްޓަކައި ވެސް ހުނަރުވެރި ފަންނީ މީހުން ބޭނުންވާނެ. އެ ތަންތަން މަރާމާތުކޮށް ބެލެހެއްޓުމަށްޓަކައި ވެސް ހުނަރުވެރި ފަންނީ މީހުން ބޭނުންވާނެ،"