ހދ. ނޮޅިވަރަމްގައި ކޮވިޑްގެ ހާލަތު ވަރަށް ބޮޑަށް ގޯސް ކަމަށާއި ހަފުތާއެއްގެ ތެރޭގައި އެ ރަށުން 147 މީހަކު އެ ބައްޔަށް ޕޮޒިޓިވް ވެފައިވާ ކަމަށް އެރަށު ކައުންސިލުން މިއަދު ބުނެފި އެވެ.
ކޮވިޑާ ހެދި، މިދިޔަ މަހު 28 ގައި ނޮޅިވަރަމް މޮނިޓަރިން އަށް ލީ ފަހުން މިހާރު ހަފުތާއެއް ވެފައިވާއިރު، އެ ފިޔަވަޅު އެޅީ ރަށުގެ ފްލޫ ކްލިނިކަށް ދެއްކި މީހަކު ކޮވިޑަށް ޕޮޒިޓިވްވުމާ ގުޅިގެންނެވެ.
މީޑިއާ ކޯޑިނޭޓަރު މުހައްމަދު މުސްތަފާ ވިދާޅުވީ، ރަށް މޮނިޓަރިން އަށް ލީ ދުވަހުން ފެށިގެން އިއްޔެއާ ހަމައަށް ހަފުތާއެއް ވެފައިވާއިރު، ނޮޅިވަރަމްގެ 147 މީހަކު ކޮވިޑަށް ޕޮޒިޓިވްވެފައިވާ ކަމަށެވެ. އަދި މި ވަގުތު އެ ރަށުގެ 107 ގެ މޮނިޓަރިންގެ ހާލަތުގައިވާ ކަމަށް އޭނާ ވިދާޅުވި އެވެ.
ނޮޅިވަރަމުން ކޮވިޑަށް ޕޮޒިޓިވްވި މީހުންގެ ތެރޭގައި އުމުރުން 10 އަހަރުން ދަށުގެ 51 ކުއްޖަކު ހިމެނޭއިރު، 10 އަހަރުން މަތީގެ 96 މީހަކަށް ވެސް އެ ބަލި ޖެހިފައިވާ ކަމަށް މުސްތަފާ ވިދާޅުވި އެވެ. މީގެ ތެރޭގައި މާބަނޑު 10 މީހަކާއި ހައި ރިސްކު ކެޓަގަރީގައި ހިމެނޭ 10 މީހަކު ހިމެނޭ ކަމަށް އޭނާ ވިދާޅުވި އެވެ. އަދި ޕޮޒިޓިވްވި މީހެއްގެ ހާލަތު ދެރަވެގެން އެ މީހާ ށ. ފުނަދޫ ކޮވިޑް ފެސިލިޓީ އަށް ބަދަލު ކޮށްފައިވާ ކަމަށް މުސްތަފާ ވިދާޅުވި އެވެ.
ނޮޅިވަރަމްގެ ސިއްހީ މަރުކަޒުގެ އެމްބިއުލެންސް ހަލާކުވެ، ހިދުމަތް ނުދެވޭތާ އެތަކެއް ދުވަހެއް ވެފައިވާ ކަމަށް ވެސް އޭނާ ވިދާޅުވި އެވެ. މިކަމުގެ ސަބަބުން ބަލި މީހުން މަރުކަޒަށް ގެންދަން ޖެހިފައިވަނީ ރައްޔިތުން އަމިއްލަ އަށް ޕިކަޕުގައި ނުވަތަ ސައިކަލުގައި ކަމަށް އޭނާ ވިދާޅުވި އެވެ.
މުސްތަފާ ވިދާޅުވިގޮތުގައި، ސިއްހީ މަރުކަޒުގެ މުވައްޒަފަކު ކޮވިޑަށް ޕޮޒިޓިވް ވެފައި ވާތީ، އެ ތަނުގެ މުވައްޒަފުން މަސައްކަތް ކުރަން ޖެހިފައިވަނީ ކުއްލި ހާލަތުގަ އެވެ. މިއާއެކު މަރުކަޒުގައި މަސައްކަތް ކުރާ މުވައްޒަފުން ބަލިވުމުގެ ކުރިން އިތުރު އެހީތެރިކަން ފޯރުކޮށްދީ، މަރުކަޒަށް އިތުރު ނަރުހުން ހަމަޖައްސައިދިނުމަކީ ކުރުން ލަސްވެފައިވާ ކަމެއް ކަމަށް އޭނާ ދެކެވަޑައިގަންނަވަ އެވެ.
މުސްތަފާ ވިދާޅުވީ، މިހާތަނަށް އެ ރަށުން 555 ސާމްޕަލް ނަގާފައިވާއިރު، ސާމްޕަލްތައް ނެގުމަށް ސިއްހީ މަރުކަޒުގެ މުވައްޒަފުން ދަތުރުކުރަން ޖެހިފައި ވަނީ އެ މީހުންގެ އަމިއްލަ ވެހިކަލްތަކުގައި، އަމިއްލަ ޖީބުން ޕެޓްރޯލަށް ހަރަދު ކޮށްގެން ކަމަށެވެ. އަދި ހާލަތުގެ ގޮތުން އިތުރު އެހީއަށް ބޭނުންވުމުން ސިއްހީ މަރުކަޒުގައި ވޮލެންޓިއާކޮށް، މަސައްކަތް ކޮށްދޭނެ ބަޔަކު ހޯދުމަށް މިހާރު ވެސް އެ މަރުކަޒުން އިއުލާނު ކޮށްފައި ވެ އެވެ.
ކޮވިޑްގެ ހާލަތާ ގުޅިގެން ނޮޅިވަރަމްގެ މީހުން ގޭގައި ތިބެން ޖެހިފައިވާއިރު، އެކި މީސްމީހުންގެ މަސައްކަތްތައް ހުއްޓި، ގިނަ ބައެއްގެ އާމްދަނީ ލިބުން މެދުކެނޑިފައިވާ ކަމަށް މުސްތަފާ ވިދާޅުވި އެވެ.
އެހެންވެ، ކުޅުދުއްފުށީގެ ދެ ފިހާރައަކުން ނޮޅިވަރަމަށް 1.2 ޓަނުގެ ރޯމަސް ހަދިޔާކޮށްފައި ކަމަށް މުސްތަފާ ވިދާޅުވި އެވެ.