މަނީ ލޯންޑަރިންގެ ކުށށް ސާބިތުވެ ޖަލަށް ލާފައި ވަނިކޮށް، ގޭބަންދަށް ބަދަލުކޮށްފައިވާ ކުރީގެ ރައީސް އަބްދުﷲ ޔާމީނަށް އިންސާފު ހޯދައިދޭން ގޮވާލައި ކުރި މުޒާހަރާގައި އެ މަނިކުފާނު ގޭގައި ހުންނަވައިގެން މިއަދު ބައިވެރިވެ ވަޑައިގެންފި އެވެ.
ޕީޕީއެމް އޮފީސް ދޮރުމަތިން ޕީޕީއެމް/ޕީއެންސީގެ ސަޕޯޓަރުން ފެށި މުޒާހަރާ ކާނިވަލާ ހިސާބުން ފުލުހުން ހުއްޓުވުމުން މުޒާހަރާގެ ބައިވެރިން، ޕީޕީއެމްގެ އޮފީސް ކައިރީ، ބޮޑުތަކުރުފާނު މަގުގައި ހުންނަ ޔާމީންގެ ގެކޮޅު ކައިރިއަށް އެއްވި އެވެ. އެއާ އެކު ޔާމީން ކުޑަދޮރުކޮށް ބޭރަށް ބޯދިއްކުރައްވައި ޕީޕިއެމްގެ ދިދައަކާއި ގައުމީ ދިދައެއް ސަޕޯޓަރުންނަށް ވިހުރުއްވި އެވެ. އަދި އެ މީހުންނަށް އަތްޕުޅުން އިޝާރާތް ކުރައްވައި ވާހަކަފުޅުތަކެއް ދައްކަވާތީ ވެސް ފެނުނެވެ.
ގާތްގަނޑަކަށް 10 ވަރަކަށް މިނިޓް ވަންދެން ޔާމީން ވަނީ މިއަދުގެ މުޒާހަރާގެ ބައިވެރިންނާ، ގެކޮޅުގެ ކުޑަދޮރުން ބޭރަށް ބޯދިއްކުރައްވައި އަތްޕުޅުން އިޝާރާތް ކުރައްވަން ހޭދަކުރައްވައިފަ އެވެ.
ފަސް އަހަރުގެ ޖަލު ހުކުމެއްގައި ހުންނެވި ނަމަވެސް ޔާމިން ހުންނެވީ ޖަލުގައި ކޮވިޑް ފެތުރުމުން ގޭ ބަންދަށް ބަދަލުކޮށްފަ އެވެ. މިގޮތަށް ބަންދުކޮށްފައި ތިބޭ، ހުކުމް ތަންފީޒުކުރާ މީހުން ސިޔާސީ ހަރަކާތްތަކުގައި ބައިވެރިވުމަކީ މަނާކޮށްފައި އޮންނަ ކަމެކެވެ.
