އެމްއެމްޕީއާރުސީގެ ބޮޑު ހިޔާނާތުގެ ފައިސާގެ ތެރެއިން 35 މިލިޔަން ރުފިޔާ، ރައީސް އިބްރާހީމް މުހައްމަދު ސޯލިހު ނަންގަވާފައިވާ ކަމަށް ކުރީގެ ޓޫރިޒަމް މިނިސްޓަރު އަލީ ވަހީދު ކުރެއްވި ތުހުމަތު ބަލަން ގޮވާލައި ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ މިއަދުގެ ޖަލްސާ އަށް އެޖެންޑާ ނުކޮށް ބޭރުކޮށްލައިފި އެވެ.
މަޖިލީހުގެ މިއަދުގެ ޖަލްސާގައި މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފް ވިދާޅުވީ އޭނާ ހުށަހެޅުއްވި ކުއްލި މައްސަލަ މަޖިލީހަށް މިއަދު އެޖެންޑާނުކުރެއްވީތީ ހިތާމަކުރައްވާ ކަމަށެވެ.
އެނގިފައިވާ ގޮތުގައި މަޖިލީހުގެ ސެކްރެޓޭރިއަޓުން އެ މައްސަލަ ބަލައިނުގަތީ ކުއްލި މައްސަލަ ހުށަހެޅުމުގެ ގަވައިދަށް ނުފެތޭތީ އެވެ. ކުއްލި މައްސަލައެއް ހުށަަހެޅޭނީ މަޖިލީހުގެ ގަވައިދު ބުނާ ގޮތުން، ހިނގަމުންދާ ކަމަކާ ގުޅޭ ހަގީގަތެއްގެ މައްޗަށް ބިނާކޮށްގެންނެވެ. އެކަމަކު އާދަމް ޝަރީފް ހުށަަހެޅުއްވި މައްސަލަ މައިގަނޑު ގޮތެއްގައި ބިނާކުރައްވާފައި އޮތީ އަލީ ވަހީދު ކުރެއްވި ތުހުމަތުތަކަށެވެ.
ކުރީގެ ނައިބު ރައީސް އަހުމަދު އަދީބު ދިރިއުޅުއްވި އެޕާާޓްމަންޓަކުން ކަޅު ދަަބަހެއްގައި ރައީސް 35 މިލިޔަން ރުުފިޔާ ގެންދެވި ކަމަށް ޓޫރިޒަމް މިނިސްޓަރު އަލީ ވަހީދު ރޭ ކުރެއްވި ތުހުމަތާ ހަވާލާދެއްވައި އާދަމް ޝަރީފް ހުށަހެޅުއްވި ކުއްލި މައްސަލަައިގައި ގޮވައިލެއްވީ އެ މައްސަލަ ތަހުގީގުކުރުމަށާއި ތަހުގީގުކުރިއަށްދާ އިރު މަގާމުގެ މަސްއޫލިއްޔަތު ތަކުން އެމަނިކުފާނު އެކަހެރިވެވަޑައިގެންނެވުމަށެވެ.
ފުލުހުންނާއި އެންޓިކޮރަޕްޝަން ކޮމިޝަނުން އެ ތުހުމަތު ތަހުގީގުކުރުމަށް ވެސް ކުއްލި މައްސަަލައިގައި އޭނާ ގޮވައިލެއްވި އެވެ.
އެމްއެމްޕީއާރުސީގެ ފައިސާއިން ރައީސް 35 މިލިޔަން ރުފިޔާ ނެންގެވި ކަމަށް ތުހުމަތުކުރައްވައި އަލީ ވަހީދު ރޭ ވިދާޅުވީ ރައީސް އެފައިސާ ގެންދެވިކަން ސާބިތުވާނެ ސީސީޓީވީ ފުޓޭޖް ހުންނާނެ ކަމަށެވެ.
ރޭޕްގެ ތުހުމަތަށް މަގާމުން ވަކިކޮށް ދައުވާ އުފުލާފައި ވަނިކޮށް ރާއްޖޭން ބޭރަށް ވަޑައިގެން ގިނަ ދުވަސްތަކެއް ވަންދެން އުޅުއްވުމަށް ފަހު ރޭ ބޭއްވި މީޑިއާ ބްރީފިންގައި ސަރުކާރަށް ގިނަ ތުހުމަތުތަކެއް ކުރެއްވި އެވެ.