ތިމާވެށީގެ ސަބަބުން ރާއްޖެ ފަދަ ކުދި ޖަޒީރާތައް މިއަދު ނެތިދާ ނަމަ، ބޮޑެތި ބައްރުތަކަށް ވެސް އެ ނުރައްކާތެރިކަން މާދަމާ ކުރިމަތިވާނެ ކަމަށް ވިދާޅުވެ، އދ.ގެ އާއްމު މަޖިލީހުގައި ރައީސް އިބްރާހީމް މުހައްމަދު ސޯލިހު، މުޅި ދުނިޔެ އަށް ވަރުގަދަ އިންޒާރެއް މިއަދު ދެއްވައިފި އެވެ.
"ކުދި ޖަޒީރާތައް ނެތި ދަނީ މިއަދު އައި ތިމާވެށީގެ ސަބަބަކުން ކަމުގައި ވާ ނަމަ، ބޮޑެތި ބައްރުތަކުގެ ފަހަތުން ހަމަ އެ ސަބަބު މާދަމާ އަންނާނެ،" އާންމު މަޖިލީހުގެ 76 ވަނަ ބައްދަލުވުމުގައި ދިވެހި ބަހުން ކުރެއްވި ތަގުރީރުގައި ރައީސް ވިދާޅުވި އެވެ.
"ދިވެއްސަކަށް ދިރިނޫޅެވި، ދިވެހިރާއްޖެ އަށް ދެމިނޯވެވުނު ދުނިޔެއަކު އެހެން ގައުމަކަށް ވަކި އޮވެވޭނެ ކަމުގެ ޔަގީންކަމެއް ނޯންނާނެ."
މުޅި ދުނިޔެ އަށް ތިމާވެއްޓާ ގުޅޭ ވަރުގަދަ މެސެޖެއް ދެއްވަމުން ރައީސް ވަނީ ތިމާވެއްޓަށް ލިބޭ ގެއްލުމުގެ އަގު އިންސާނިއްޔަތަށް ވަރަށް ބޮޑު ކަމަށާއި އެކަމަކީ ދިރާސާތަކާ އިލްމީ ހަގީގަތްތަކާއި ސައިންޓިފިކް ރައުޔު ވެސް ހެކިދޭ ކަމެއް ކަމަށް ވިދާޅުވެފަ އެވެ.
އިންޓަގަވާމެންޓަލް ޕެނަލް އޮން ކްލައިމެޓް ޗޭންޖް އިން ދާދި ފަހުން އެކުލަވައިލި ރިޕޯޓުގައި ހުރި ކަންބޮޑުވުންތަކާއި އިންޒާރުތަކުގެ ވާހަކައަކީ ދިވެހިން އެ ވާހަކަތައް ދައްކާތާ އެތައް ދުވަހެއް ވެފައިވާ ވާހަކަތަކެއް ނަމަވެސް އެއްވެސް ވަރަކަށް އެކަމަށް ސަމާލުކަން ނުދެވި، އިވޭ ހުސް އަޑުތަކެއްގެ ގޮތުގައި ދޫކޮށްލާފައިވާ ވާހަކަތަކެއް ކަމަށް ރައީސް ވިދާޅުވި އެވެ.
އެ ރިޕޯޓުގައިވާ ގޮތުން މިދިޔަ 15 އަހަރަކީ 19 ވަނަ ގަރުނުގެ މެދު ތެރެއިން ފެށިގެން މިހާތަނަށް ދުނިޔެ ތަހައްމަލުކުރި އެންމެ ހޫނު ގަދަ ފަސް އަހަރެވެ. އަދި 1901 އިން 1970 އާ ދެމެދަށް އަޅާބަލާއިރު ކަނޑުގެ ލޮނުގަނޑު އުފުލޭ ނިސްބަތް ތިން ގުނަ އިތުރުވެފައިވާއިރު ދުނިޔޭގެ ހޫނުމިނުން 1.1 ޑިގްރީ ސެލްސިއަސް އުފުލިފައިވާ ކަމަށް މި ރިޕޯޓްގައިވެ އެވެ.
"އެ ރިޕޯޓްގައި ފާހަގަކޮށްފައިވާ ކަންކަމުގެ ތެރެއިން ކަންބޮޑުވާން ޖެހޭ މާ ބޮޑު އެހެން ކަމެއްވޭ. އެއީ ރިޕޯޓްގައި ފާހަގަކޮށްފައިވާ ކަންކަން ހައްލު ކުރުމަށް އިންސާނުންނަށް ވަގުތު ކުޑަތަންވެފައިވާ ކަމުގެ އިންޒާރު،" ރައީސް ވިދާޅުވި އެވެ.
"ކުރަން ޖެހުނު ކަންކަން ނުކޮށް ތިބުމުގެ ސަބަބުން އެއްވެސް ކަމެއް ދެން އިތުރަށް މާދަމައަށް ލަސްކުރެވެން ނެތްކަމުގެ ބިރުވެރި ހަބަރު."
ރައީސް ވިދާޅުވީ ދުނިޔެ ހޫނުވުން 1.5 ޑިގްރީ ސެލްސިއަސްގައި ހިފެހެއްޓުމަށްޓަކާ މިހާރު ޖައްވަށް ބޭރުކުރާ ގެނދަބުޅީގެ މިންވަރު 2030 އާ ހަމައަށް 45 ޕަސެންޓް ދަށްކުރަންޖެހޭ ކަމަށެވެ. އެކަމަކު، އެ އަމާޒަށް ވާސިލުވެވެން އޮތީ 2050 ގެ ނިޔަލަށް މުޅި ދުނިޔެ ނެޓްޒީރޯ ހާސިލު ކޮށްގެން ކަމަށާއި އެކަމަކީ އިންސާނީ ނަސްލު ނެތިދިއުން ނުވަތަ މާހައުލީ ނިޒާމަށް ބަދަލުު ގެންނަން ޖެހޭ ކަމުގެ އަޑު އަހަން ޖެހިފައިވުން ކަން ފާހަގަކުރެއްވި އެވެ.
އެ އަމާޒަށް ވާސިލު ނުވެވިއްޖެ ނަމަ، ރާއްޖެއާ ރާއްޖެ ފަދަ ނާޒުކު ތިމާވެއްޓެއް އޮތް ގައުމުތަކުގެ ފަހު މަރުހަލާ ސިފަކޮށްދެނީ، ގައުމު ގެއްލިދިއުން ނުވަތަ ރެފިއުޖީންނަށް ބަދަލުވުން ނޫނީ އަމިއްލަވަންތަކަން ނެތި ދިއުން ކަމަށް ވެސް ރައީސް ވިިދާޅުވި އެވެ.
އެ މެސެޖު ދެއްވިއިރު، ރައީސް ވަނީ މޫސުމީ ބަދަލާ ގުޅިގެން ކުރިމަތިވެފައިވާ ހާލަތު ސިފަކޮށްދީ، ދިވެހި ތުއްތު ކުދިން އެމަނިކުފާނަށް ލިޔުއްވި ސިޓީ އދ. ގެ އާންމު މަޖިލީހުގައި މުޅި ދުނިޔެ އަށް ދައްކަވާލައްވައިފަ އެވެ. އެ ސިޓީތަކަކީ ގައުމުގެ ނާޒުކު ތިމާވެއްޓާ ގުޅޭ ގޮތުން އެ މަޖިލީހަށް ހުށަހަޅައިދިނުން އެދި އެމަނިކުފާނާ ހަވާލުކުރި ސިޓީތަކެކެވެ.
އދ. ގެ އާންމު މަޖިލީހުގެ 76 ވަނަ ސެޝަންގެ ރައީސްގެ ހައިސިއްޔަތުން ރާއްޖޭގެ ފޮރިން މިނިސްޓަރު އަބްދުﷲ ޝާހިދު ރިޔާސަތު ބެލެހެއްޓެވި ޖަލްސާގައި ރައީސް ވިދާޅުވިގޮތުގައި ސަލާމަތުގެ އައްސޭރި އަށް ވާސިލުވުމުގެ އުންމީދު މުޅިން ގެއްލިގެނެއް ނުދެ އެވެ. މޫސުމަށް އަންނަ ބަދަލުތަކާ ގުޅޭގޮތުން އަމަލު ކުރަމުން އަންނަ ދުވަސްވީ ސިޔާސަތުތަކަށް އިންގިލާބީ ބަދަލެއް ގެނައުން ވަރަށް މުހިންމު ކަމަށާއި ގައުމުތަކުން ބޭރުކުރާ ވިހަ މާއްދާތައް މަދުކުރުމަށް އަޅަންޖެހޭ ފިޔަވަޅުތައް ވަރުގަދަކުރަން ޖެހޭ ކަމަށް އެ މަނިކުފާނު ވިދާޅުވި އެވެ.
މޫސުމީ ގެއްލުމުން ދިފާއުވުމުގެ ގާބިލްކަމާއި މާލީ ތަނަވަސްކަން ނެތް ގައުމުތަކަށް، ތަނަވަސް ގައުމުތަކުން ކުރާ ހޭދަ އާއި ދޭ އެހީ އިތުރު ކުރުމަށާއި އިއާދަ ކުރަނިވި ހަކަތަ އަށް ހިޖުރަ ކުރުމަށް ކުރާ މަސައްކަތް އެއީ ކޮންމެ ދުވަހަކު ކުރާ ކަމަކަށް ހަދަންޖެހޭ ކަމަށް ވެސް ރައީސް ވިދާޅުވި އެވެ.
"މޫސުމީ ބަދަލުތަކާ ގުޅޭ މި ޝަކުވާ އާއި ކުރާ ވަކާލާތުގައި އަމާން ދީ ފަހަށް ޖެހުމަކީ ދިވެހިންނަށް އޮތް އިހްތިޔާރެއް ނޫން. ތިމާވެށީގެ ގެއްލުންތަކާއި އޭގެ ގޮންޖެހުމުން ދުނިޔެ އަށް ލިބިދިން ފިލާވަޅުގެ މިސާލީ ވާހަކަ އަކީ ދިވެހިރާއްޖޭގެ ވާހަކަ ކަމުގައި ވުމަށް ރުހިގެން ތިބެވޭކަށް ނެތް،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި މިހާރު ރާއްޖެއިން އަމާޒު ހިފާފައި ވަނީ، ބައިނަލްއަގްވާމީ މުޖުތަމައުގެ އެހީއާ އެކު 2030 އަށް ނެޓްޒީރޯ އަށް ވާސިލުވުމަށެވެ.