ހުން އައުން، ރޯގާ، އަދި ކެއްސުންް ފަދަ އަލާމާތްތައް ފެންނަ މީހުންނަށް ހާއްސަ ފްލޫ ކްލިނިކެއް އަޖީއެމްއެޗުން ހަދައި އެފަދަ ބަލި މީހުން މި ވަގުތު އައިޖީއެމްއެޗްއަށް ދިއުމުގެ ބަދަލުގައި ކްލިނިކަން ދާން އެ ހޮސްޕިޓަލުން މިއަދު އެދެފި އެވެ.
އައިޖީއެމްއެޗްގެ ފްލޫ ކްލިނިކް ހެދީ އެފްއޭއެމްގެ ކުރީގެ އިމާރާތުގައި ކަމަށެވެ.
އެތަނުގައި މާދަމާއިން ފެށިގެން ކޮންމެ ދުވަހެއްގެ ހެނދުނު 8:30 އިން ރޭގަނޑު 10:00 އަށް ހިދުމަތް ދޭނެ ކަމަށް އައިޖީއެމްއެޗުން ބުންޏެވެ.
ހުން ރޯގާ އަދި ކެއްސުމުގެ އަލާމާތެއް ހުރި މީހަކު ހޮސްޕިޓަލަށް ދިޔަ ކަމުގައި ވިޔަސް ފްލޫ ކްލިނަކަށް ދާން އިރުޝާދު ދޭނެ ކަމަށް ވެސް ހޮސްޕިޓަލުން ބުންޏެވެ.
މިދިޔަ ތިން މަހުގެ ތެރޭގައި ރާއްޖޭގައި އަރިދަފުސް ރޯގާ އާއި ވައިރަލް ހުން އިތުރުވެފައިވާ ކަމަށް މި މަހުގެ ތެރޭގައި އެޗްޕީއޭއިން ވަނީ ބުނެފަ އެވެ. އެހެންވެ އެ ބަލިތަކުން ރައްކާތެރިވުމަށް ސަމާލުވުމަށް އެ އެޖެންސީން ވަނީ އެދިފަ އެވެ.
ކޮވިޑް ވެސް ފެތުރޭ އިރު، އާދައިގެ ރޯގާ އާއި ކޮވިޑްގެ އަލާމާތްތައް އެއްގޮތްކަމުން މިކަމުގައި ވެސް ސަމާލުވެ ކޮވިޑާ މެދު ފަރުވާ ކުޑަ ނުކުރުމަށް ވެސް އިލްތިމާސްކުރެ އެވެ.