ހިޔާ ފްލެޓްތަކުގަައި މީހުން އުޅެން ފެށި ފަހުން، އުފެދޭ ކުނިވާ ޒާތުގެ ކުނި އެޅުމަށް ހަ ސަރަހައްދެއްގައި އެޗްޑީސީން ޑަސްބިން ބަހައްޓައި ކުނި ނެގުމުގެ މަސައްކަތް އެ ކުންފުނިން ފަށައިފި އެވެ.
އެޗްޑީސީން ބުނީ "ހިޔާ"ގެ 16 ޓަވަރުގައި ހުރި 6،720 ފްލެޓްގެ ތެރެއިން މިހާރު މީހުން އުޅެމުން އަންނަ ފްލެޓްތަކުގައި އުފެދޭ ކުނި ވެމްކޯ އަށް އުކާލެވޭނީ މި މަހުގެ 17 ވަނަ ދުވަހުން ފެށިގެން ކަމަށެވެ.
އެހެންވެ ވެމްކޯ އިން އެ މަސައްކަތް ފަށަންދެން ކުނި އުކާލުމަށް ފްލެޓްތައް ސަރަހައްދުގައި ހަ ޑަސްބިނެއް ބަހައްޓާފައި ހުރިއިރު އެ ފްލެޓަކާ އެންމެ ކައިރީގައި ހުރި ޑަސްބިނަށް ކުނި އެޅުމަށް އެޗްޑީސީން އެދެ އެވެ.
ކުނި ނެގުމަށް ހަމަޖެހިފައި ވަނީ ކޮންމެ ދުވަހެއްގެ ވެސް ހެނދުނު 8:00 އިން މެންދުރު 12:00 އާ ދެމެދު އެވެ. އެހެންވެ ފްލެޓްގައި އުޅޭ މީހުން އެ ވަގުތަށް ކުނި ނެރި ޑަސްބިނަށް އެޅުމަށް އަންގަ އެވެ.
އެޗްޑީސީން އެދެނީ ފްލެޓްތައް ހިމެނޭ ސަރަހައްދުގައި ވެސް ފްލެޓުން އުފެދޭ ކުނިތައް ނެރެފައި ނުބެހެއްޓުމަށް އިލްތިމާސްކޮށްފަ އެވެ.
ހިޔާ ފްލެޓްގައި އުޅޭ މީހުން ކުނި އަޅަން ޑަސްބިން ބެހެއްޓިއިރު ފްލެޓްގައި އުޅޭ މީހުން އުފައްދާ ކުނިވާ ޒާތުގެ ކުނި ނުނަގާތީ އެ މީހުން ކުނި ނެރެނީ ފްލެޓްގެ ތިރިއަށެވެ. އެތަނުގައި ގިނަ ދުވަސްތަކެއް ވަންދެން ކުނި ހުރުމުގެ ސަބަބުން ފުޅަ އަޅާފައި ހުރި މަންޒަރު ވެސް ފެނުނެވެ.