ޝަރީއަތް ނިމެންދެން މާލޭ ޖަލުގައި ބަންދުކޮށްފައި ހުރި މީހަކު މަރުވި ހާދިސާގައި ޖަލު ބަހަލަހައްޓާ މީހުންގެ އިހުމާލެއް ނެތް ކަމަށް ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެ އެވެ.
ރައްޔިތުންގެެ މަޖިލީހުގެ މިއަދުގެ ޖަލްސާގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުން އިމްރާން ވިދާޅުވީ މ. މަލަސް، މާލެ، އިސްމާއީލް ޝަބީން، 46، މަރުގައި އެއްވެސް ފަރާތެއްގެ އިހުމާލެއް އޮތްތޯ ބެއްލެވި އިރު، އެފަދަ ރިޕޯޓެއް ނެތް ކަަމަށެވެ. އޭނާ ވިދާޅުވީ ގައިިދީއަކު މަރުވުމުން އެ މައްސަލަ ތިން ގޮތަކަށް ބަލާ ކަމަށާއި އެކަމުގައި ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) ވެސް ބައިވެރިވާ ކަަމަށެވެެ. ނަަމަވެސް ޝަބީންގެ މަރުގެ މައްސަލަ އެ ނިޒާމުގެ ތެރެއިން ބަލައި ނިމިފައިވާކަން ނުވަތަ ނޫންކަން އޭނާ ވިދާޅެއް ނުވެ އެވެ.
"އަޅުގަނޑު ބަަލައިފިން. އެކަމުގައި [މާލޭ ޖަލުގައި ހުރި ގައިދީއަކު މަރުވި މައްސަލައިގައި] އެއްވެސް ފަރާތަކުން ފަރުވާކުޑަކޮށްގެން، އަދާކުރަން ޖެހޭ ޒިންމާއެއް އަދާނުކޮށްގެން އަދި އެއްވެސްް ފަރާތަކުން ޒިންމާވާންޖެހޭ ފަަދަ ކަމެއް އޮވެގެން، މައްސަަލަ ދިމާވެފައި އޮތް ކަަމަށް ގަބޫލުކުރެވޭނެ އެއްވެސް ރިޕޯޓެއް ނެތް،" އިމްރާން ވިދާޅުވި އެވެ.
ޝަބީންގެ މަރުގެ މައްސަލައިގައި އިމްރާނާ މިއަދު ފުރަތަމަ ސުވާލުކުރެއްވީ ފޮނަދޫ ދާއިރާގެ އެމްޑީޕީ މެމްބަރު މޫސާ ސިރާޖެވެ. ޝަބީންގެ ވަކީލާ ހަވާލާދެއްވައި ސިރާޖް ވިދާޅުވީ އޭނާ މަރުވީ ބޭސްފަރުވާއަށް ސަލާން ޖެހުމުން ވެސް ފަރުވާ ނުލިބި ވަނިކޮށް ކަމަށެވެ.
"އަޅުގަނޑު ޝަބީންގެ ވަކީލާ ވާހަކަ ދައްކައިލި އިރު ޖަލުތަކާ ހަވާލުވެ ހުރި ނޫރާއާ ބައްދަލުކޮށް މިކަމުގެ ވާހަކަ ދެކެވުނު ކަމަށް އެބަ ބުނޭ،" ސިރާޖް ވިދާޅުވި އެވެ.
އަޅުގަނޑު ބަަލައިފިން. އެކަމުގައި [މާލޭ ޖަލުގައި ހުރި ގައިދީއަކު މަރުވި މައްސަލައިގައި] އެއްވެސް ފަރާތަކުން ފަރުވާކުޑަކޮށްގެން، އަދާކުރަން ޖެހޭ ޒިންމާއެއް އަދާނުކޮށްގެން އަދި އެއްވެސްް ފަރާތަކުން ޒިންމާވާންޖެހޭ ފަަދަ ކަމެއް އޮވެގެން، މައްސަަލަ ދިމާވެފައި އޮތް ކަަމަށް ގަބޫލުކުރެވޭނެ އެއްވެސް ރިޕޯޓެއް ނެތް: އިމްރާން
ގައިދީން ބޭސްފަރުވާއަށް ސަލާންޖަހަން ޖެހެނީ ކީއްވެތޯ އާއި ފަރުވާ ނުލިބުމުގެ މައްސަލަ ހައްލުނުކުރެވެނީ ކީއްވެތޯ ވެސް އޭނާ ސުވާލުކުރެއްވި އެވެ. "ވާނުވާ ބަންދު" ގެ މައްސަލަ (ޝަރީއަތް ނިމެންދެން ބަންދުކޮށްފައި، ޝަރީއަތް ކުރިއަށް ނުގޮސް ބަންދުގައި ބައިތިއްބާ މައްސަލަ) ހައްލުކުރަން މިހާތަނަށް ކުރެއްވީ ކޮން މަސައްކަތެއްތޯ ވެސް ސިރާޖް ސުވާލުކުރެއްވި އެވެ.
އިމްރާން ވިދާޅުވީ ޖަލުގައި ތިބި ގައިދީންނަށް ބޭސްފަރުވާކުރުމުގެ އިންތިޒާމް ހަމަޖެހިފައި ހުންނާނެ ކަމަށާއި ވާނުވާ ބަންދުގެ މައްސަލައިގައި އެޓާނީ ޖެނެރަލް އިބްރާހީމް ރިފްްއަތާއި ޕްރޮސެކިއުޓާ ޖެނެރަލް ހުސައިން ޝަމީމާ އެކު ގިނަ ބައްދަލުވުންތަކެއް ބާއްވަވާފައި ވާނެކަމަށެވެ.
"އަޅުގަނޑުމެންނަށް، މި ސަރުކާރު އައިފަހުން ކުރެވުނު އެއްކަމެއް އެބަ އޮތް. ގާތްގަނޑަކަށް އަށް އަހަރު ނުވައަހަރު، ދިހަ އަހަރު ވެފައި ތިބި ފަރާތްތަކުގެ މައްސަލައަށް މިހާރު ވާނީ ހައްލެއް ގެނެވިފައި. ފަހަރެއްގައި ދެމީހެއް ތިންމީހެއް ނޫޅޭނެޔޭ ދަންނަވާކަށް ނުކެރޭނެ،" އޭނާ ވިދާޅުވި އެވެ.
އެ މައްސަލަ ހައްލުކުރަން މެދުކެނޑުމެއް ނެތި މިހާރުވެސް އޭޖީއާއި ޕީޖީއާ އެކު މަޝްވަރާތައް ކުރަމުން އަންނަ ކަަމަށާއި އެކަމުގައި އެންމެ ބޮޑަށް ޒިންމާ ނަންގަވަން ޖެހިވަޑައިގަންނަވާ ފަރާތަކީ ޕީޖީ ކަމަށް ވެސް އިމްރާން ވިދާޅުވި އެވެ.