ކުޅިވަރާއި މިއުޒިކްގައި މަޝްހޫރު ތަރަބޫޒް ރިޒާ ނިޔާވެއްޖެ

ތަރަބޫޒުގެ އަހުމަދު ރިޒާގެ ކުރީގެ ފޮޓޯއެއް. ފޮޓޯ: ސޯޝަލް މީޑިއާ (ރަންޒަމާން)

24 ނޮވެމްބަރ 2021 - 16:45

ކުޅިވަރާއި މިއުޒިކްގެ ދާއިރާ އިން ގިނަ ހިދުމަތްތަކެއް ކޮށްފައިވާ ތަރަބޫޒު އަހުމަދު ރިޒާ އުމުރުން 67 އަހަރުގައި މިއަދު ނިޔާވެއްޖެ އެވެ.

އޭނާގެ ދަރިފުޅު މުހައްމަދު ޝިފާން "މިހާރު" އަށް ވިދާޅުވީ ބައްޕަ ނިޔާވީ ހިތުގެ ބައްޔަކަށް ފަރުވާ ކުރާތާ ގިނަ ދުވަސްތަކެއްވީ ފަހުން ކަމަށެވެ. ހިތުގެ ބޮޑެތި އޮޕަރޭޝަންތަކެއް ކޮށް، ތިން ވޭލެއް ބަދަލުކޮށްފައިވާ ކަމަށާއި ފަހުން ބަލަހައްޓަމުން އައީ ގޭގައި ކަމަށް ވެސް އޭނާ ވިދާޅުވި އެވެ.

إِنَّا لِلّهِ وَإِنَّـا إِلَيْهِ رَاجِعونَ

My dad Ahmed Riza ( Tharabooz Riza ) has returned to Allah swt just moments ago. May Allah swt forgive his sins, widen his grave and bless his soul with jannathul firdhaus pic.twitter.com/SSfQTR34QH
— Nihu Riza (@NihuRiza) November 24, 2021

"ފަނަރަ ވަރަކަށް އަހަރު ވެއްޖެ މިހާރު ބައްޕަ ބަލިވެ އުޅޭތާ. ކާޑިއޯ މައްސަލަތަކެއް ހުރީ. ހިތުގެ ތިން ވޭލު ބަދަލުކޮށްފައި ހުންނާތީ ވަރަށް ބަލައިގެން ގޭގައި އުޅުނީ،" ވާހަކަ ދެއްކުންތެރިކަމުގެ ރޮނގުން ގައުމީ އިނާމު ހާސިލުކުރައްވާފައިވާ ޝިފާން ވިދާޅުވި އެވެ.

އޭނާ ވިދާޅުވިގޮތުގައި ރިޒާ އައިޖީއެމްއެޗަށް ރޭ ގެންދިޔައީ މާބޮޑަށް ހާލު ދެރަވެގެންނެވެ. އެ ހޮސްޕިޓަލަށް ގެންދިއުމާ އެކު އޭނާ އަށް ފަރުވާ ދެމުން އައީ ވެންޓިލޭޓަރުގެ އެހީގަ އެވެ.

ރިޒާ އަކީ ބޮޑުބެރު ޖެހުމާއި ލަވަކިޔުމުގެ ދާއިރާގައި މަޝްހޫރު ފަންނާނެކެވެ. އަދި އޭނާއަކީ 1980ގެ އަހަރުތަކާއި 1990ގެ އަހަރުތަކުގައި ފުރަތަމަ ޑިވިޝަނުގެ ފުޓުބޯޅަ މެޗުތަކުގައި ލައިންސްމަންކަން ވެސް ކުރި މީހެކެވެ.