ކުރިއަށް އޮތް ތިން ހަފުތާ ތެރޭގައި ރާއްޖޭގައި ވަރަށް ބޮޑަށް އަނެއްކާވެސް ކޮވިޑް-19 ފެތުރޭނެ ކަމަށް ސިއްހީ މާހިރުން ލަފާކޮށްފައިވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ނ. އަތޮޅުގެ ފަސް ރަށަކަށް އެ މަނިކުފާނު މިއަދު ފެއްޓެވި ދަތުރުފުޅުގައި، މެންދުރުފަހު ލަންދު އަށް ވަޑައިގެން އެ ރަށުގެ ބަނދަރު ރަސްމީކޮށް ހުވުމަށް ބޭއްވި ރަސްމިއްޔާތުގައި ރައީސް ވިދާޅުވީ ހަލުވިކަމާ އެކު ދުނިޔޭގައި މިހާރު ފެތުރެމުންދާ ކޮވިޑްގެ އާ ވޭރިއަންޓް "އޮމިކްރޮން" އާ ގުޅިގެން، ރާއްޖޭގެ ސިއްހީ މާހިރުންނާ އެކު އިއްޔެ މަޝްވަރާ ބައްދަލުވުމެއް ބޭއްވި ކަމަށެވެ.
"ސިއްހީ މާހިރުން އަޅުގަނޑުމެންނަށް ލަފާ ދެއްވީ ކުރިއަށް މި އޮތް ތިން ހަފުތާ އަކީ އަނެއްކާ ވެސް ވަރަށް ބޮޑަށް ރާއްޖޭގައި ކޮވިޑް ފެތުރިގެން ދިއުމުގެ ފުރުސަތު އޮތް ކަމަށް،" ރައީސް ވިދާޅުވި އެވެ.
"އެއީ މި ވޭރިއެންޓް މިހާރު ރާއްޖެއިން ފެނިފައިވާތީ."
ސިއްހީ މާހިރުން އެދިވަޑައިގަތީ ކުރިއެކޭ ވެސް އެއްގޮތަށް މި ބަލިމަޑުކަމަށް ހާއްސަ ސަމާލުކަމެއް ދެއްވުމަށް ކަމަށް ރައީސް ވިދާޅުވި އެވެ.
ރާއްޖޭގައި އޮމިކްރޮނަށް ފުރަތަމަ ފަހަރަށް ޕޮޒިޓިވްވީ އއ. އަތޮޅު ސޭންޑީސް ބަތަލާ ރިސޯޓަށް އައި ސައުތު އެފްރިކާގެ ޓޫރިސްޓެކެވެ. އޭނާ ކޮވިޑަށް ޕޮޒިޓިވްކަން އެނގުނީ މިދިޔަ ނޮވެމްބަރު މަހުގެ 27 ގަ އެވެ. އޭގެ ފަހުން ކޮވިޑަށް ޕޮޒިޓިވްވާ ރޭޓް 66 ޕަސެންޓް އިތުރުވެފައިވެ އެވެ.
ގާތްގަނޑަކަށް ހަތަރު މަސް ފަހުން ރާއްޖޭގައި އަނެއްކާ ވެސް ކޮވިޑްގެ ކޭސްތައް މައްޗަށް ދާން ވަނީ ފަށައިފަ އެވެ. އިއްޔެ އެކަނި ވެސް ވަނީ ރިކޯޑް އަދަދަކަށް މީހުންނަށް މި ބަލި ޖެހިފަ އެވެ. އިއްޔެ މުޅި ރާއްޖެއިން 242 މީހަކަށް ކޮވިޑް ޖެހުނެވެ.
މި ދުވަސްވަރު ރާއްޖޭގައި ބޭރަން ހިންގުމާއި ހޮޑުލުން ވެސް ވަނީ އިތުރުވެފަ އެވެ.