"މި މޭޒުގައި ތިބެފައި އެ ދިޔައީ ތިން ޕާޓީގެ މީހުން. ވޯޓުގެ ފޯރި އޮތަސް ސިޔާސީ ވާދައިގައި ރުޅިވެރިކަމެއް ހިތްހަމަނުޖެހުމެއް މި ރަށަކު ނޯންނާނެ. އެންމެން ވެސް ހަމަ ގަދަ އަށް ވޯޓު މަސައްކަތް މި ކުރަނީ," މަރޮށި ކައުންސިލް ރައީސް އަލީ މުހައްމަދު ވިދާޅުވި އެވެ.
އޭނާ ވިދާޅުވެދެއްވީ އިންތިހާބުތަކުގައި އެއީ މި ރަށުގެ އާއްމު ހާލަތު ކަމެވެ. މި އިންތިހާބުގައި އެކަންޏެއް ނޫނެވެ. ހުރިހާ އިންތިހާބުތަކެއްގައި ވެސް މަރޮށީގެ ރައްޔިތުން މި ނަމޫނާ ދައްކަ އެވެ.
ކޮމަންޑޫ ދާއިރާގައި މާދަމާ އޮންނަ ބައިި އިލެކްޝަނުގެ ވާދަވެރި ވޯޓަށް މި ރަށުގައި ވެސް ކެމްޕެއިނުގެ ހުރިހާ ކަމެއް ބާރަށް އެބަ ހިންގަ އެވެ. އެމްޑީޕީގެ ކެންޑިޑޭޓް މުހައްމަދު ރާޝިދާއި ޕީޕީއެމްގެ ކެންޑިޑޭޓް މޫސާ ފަތުހީގެ އިތުރުން އެމްއެންޕީގެ ކެންޑިޑޭޓް އަބްދުލްހަންނާނުގެ ޓީމުތައް މަރޮށީގައި އެބަތިއްބެވެ.
ފިކުރު ތަފާތުވިޔަސް އެއްބަޔަކު އަނެއް ބައަކަށް އިހްތިރާމްކޮށްގެން އުޅެވެން ޖެހޭނެ. -- ކައުންސިލް ރައީސް
މި ތިން ކެންޑިޑޭޓުން ނިސްބަތްވާ ޕާޓީގެ އިސް ބޭފުޅުން ވެސް މި ރަށުގައި ތިބޭތާ މަހެއްހާ ދުވަސް ވަނީ އެވެ. ވޯޓު ހޯދަންދޮރުން ދޮރަށް ހިނގަ އެވެ. ޕާޓީ ބައްދަލުވުންތައް ބާއްވައި އެ ބައެއްގެ ފިކުރު ކުރިއަރުވަން މަސައްކަތް ވެސް ކުރެ އެވެ.
އެކަމަކު މި ރަށުގައި އުނދަގޫ ކަމަކީ، ތާއީދު އޮތީ ކޮން ބަޔަކަށް ކަން ހިސާބު ޖެހުން ކަމަށް ބައެއް މީހުން ބުންޏެވެ.
"ނޭނގޭ އެހެން ބުނާކަށް މި ފަހަރު ވެސް. މި ރަށުގެ ކޮންމެ ގެއަކަށް ކޮންމެ ޕާޓީއެއްގެ މީހަކަށް ވެސް ވަދެވޭނެ. ތާއީދު ބޮޑީ ކޮން ބަޔަކަށް ކަން ސާފުކޮށް ބުނަން ނޭނގެނީ ސިޔާސީ ކަންކަމުގައި އެހާ ވަރަށް އުޅެން ބޭނުންވާ ބަޔަކު ވެސް ތިބީމާ," މި ރަށުގެ އަންހެނަކު ބުންޏެވެ.
އިލެކްޝަންސް ކޮމިޝަނުން އާއްމު ކޮށްފައިވާ ލިސްޓުގައިވާ ގޮތުން ފޯކައިދު އާއި މަރޮށި އަދި ކޮމަންޑޫން 3،000 އަށް ވުރެ ގިނަ މީހުންނަށް ވޯޓު ލުމުގެ ހައްގު ލިބިގެން ވެ އެވެ. އެއީ، ކޮމަންޑޫން 1،409 އާއި ފޯކައިދޫން 1،204 އާއި މަރޮށިން 703 މީހުންނަށެވެ.
މިދިޔަ އިންތިހާބުތަކުގައި ވެސް ނަތީޖާ ބަދަލުވުމުގައި މަރޮށީ ވޯޓުގެ ހިއްސާ ބޮޑެވެ.
މި ދާއިރާގެ 2019 ގެ މަޖިލިސް އިންތިހާބުގައި ޕީޕީއެމާއި ޕީއެންސީ ވާދަކޮށް ގިނަ ވޯޓު ހޯއްދެވީ އެ ގޮނޑި ފުރުއްވި ކުރީގެ މެމްބަރު ހުސައިން ވަހީދެވެ. އެކަމަކު އޭގެ ފަހުން ބޭއްވި ލޯކަލް ކައުންސިލް އިންތިހާބުގައި ތިން ގޮނޑިއާ އެކު މެޖޯރިޓީ ދިނީ އިދިކޮޅު ޕީޕީއެމަށެވެ.
ކައުންސިލްގެ ރައީސް ވިދާޅުވި ގޮތުގައި މި ރަށުގެ މަންޒަރު ތަފާތު ވަނީ ސިޔާސީ ކަންކަމުގައި ހައްދުފަހަނާއަޅައި ނުދާތީ އެވެ. މިއީ 2008 ވަނަ އަހަރުން ފެށިގެން މިހާތަނަށް ބޭއްވި ހުރިހާ އިންތިހާބުގައި ވެސް ރައްޔިތުން ތިބީ އެގޮތުގައި ކަމަށް އޭނާ ވިދާޅުވި އެވެ.
ޖުމްލަ އާބާދީގައި ހާހެއްހާ މީހުން ހިމެނޭ ރަށުގެ ރައްޔިތުންނަށް ތައުރީފު ކުރައްވަމުން ކައުންސިލަރު ވިދާޅުވީ ރާއްޖެ އަށް ގެންނަން ބޭނުންވާ ޑިމޮކްރަސީއަކީ އެއީ ކަމަށެވެ. ސިޔާސީ ވާދަވެރިކަމާއި ނަފްރަތުގައި ހައްދުފަހަނާޅައި ނުދިއުމެވެ.
"ފިކުރު ތަފާތުވިޔަސް އެއްބަޔަކު އަނެއް ބައަކަށް އިހްތިރާމް ކޮށްގެން އުޅެލެވެން ޖެހޭނެ," އޭނާ ވިދާޅުވި އެވެ.
ކައުންސިލަރުގެ އެ ވާހަކައާ އެ މޭޒުގައި އިންނެވި އެހެން ރަށެއްގެ ކައުންސިލަރު ވެސް އެއްބަސްވެވަޑައިގަތެވެ.
އޭނާ ވިދާޅުވީ ސިޔާސީ ކަންކަމުގައި "މި ރަށް ހަމަ ތަފާތު" ކަމަށެވެ.
އެ ވާހަކައަށް ބާރު ދެއްވަން ދެއްކެވި މިސާލަކީ ސިޔާސީ ވާދައިގައި ބައެއް ރަށްރަށުގައި އެއް ބަޔަކު އަނެއް ބަޔަކަށް އުޅެން ދަތިވާ ހިސާބަށް ކަންކަން ގޮސްފައި ހުރުމެވެ. ފިކުރު ތަފާތުވެއްޖެ ނަމަ ވޯޓުތަކާ ގުޅިގެން އާއިލީ މަސްލަހަތު ގެއްލިފައި ވެސް އެބަހުއްޓެވެ.
އާއިލާ ތެރެއިން ހިތްހަމަނުޖެހުމެއް އަތުވެދާނެ ކަމުގެ ބިރަށް އެ މީހާގެ ހިޔާލާއި ފިކުރު ހިފަހައްޓާލައިގެން ތިބެން ޖެހޭނެ ކިތަންމެ ފަހަރުތަކެއް ވެސް އާދެ އެވެ.
މަރޮށީގައި އެކަން ނޯންނަނީ, ކައުންސިލަރު ވިދާޅުވި ގޮތުގައި, މީހުން ހޭލުންތެރި ކަމުންނެވެ. އެކަކު އަނެކަކުގެ ހިޔާލާއި ފިކުރަށް އިހްތިރާމް ކުރަން ދަންނާތީ އެވެ.
ދިރިއުޅޭ އާބާދީ މަދު މި ރަށުގައި ކުށް މަދެވެ. މަސްތުވާތަކެއްޗާއި ވައްކަމާއި ފޭރުން ފަދަ އަމަލުތަކުގެ ރެކޯޑެއް ނޯވެ އެވެ.
"ތިން ހަތަރު މަސް ދުވަހު އައިސް އުޅުނަސް ނުފެންނާނެ މި ރަށުގެ ކުއްޖަކު މަސްތުވާތަކެތީގައި ޖެހި މަގުމަތީގައި ހުންނަން ޖެހިފައި އުޅޭ ތަނެއް. ބޯވަ ނަގަން ފީނަން އެހެން ރަށްރަށުގެ މީހުން މި ރަށަށް އައިސް ކޯލާވޯޓަރު އެއްޗެހި ގަންނަން އެހިޔަސް މައްސަލަ ޖައްސާނެ" އޭނާ ވިދާޅުވި އެވެ.
"ހަމަޖެހުމާއި އަމާންކަމާ އެކު ދިރިއުޅުމަށް ލޯބިކުރާނެ."
މި ވޯޓު މާދަމާ ނިމުމުން ސިޔާސީ ފޯރި މަރޮށީގައި މި ވަގުތަށް ނިމުނީ އެވެ. މި ރަށުގެ މީހުންގެ މެދުގައި އޮންނާނީ އެއް ރޫހެކެވެ. އެކަކު އަނެކަކު ހާލު ބަލައި އެކުވެރިކަމުގެ ގުޅުމެއް ކަމުގެ 100 ޕަސެންޓް ޔަގީކަން ކައުންސިލްގެ ރައީސަށް އެބައޮތެވެ.