ޑީއެންއޭއަކީ އޭގެ މައްޗަށް އެކަނި ބިނާކޮށް ރޭޕްގެ ކުށް ސާބިތު ކުރެވޭނެ ހެއްކަކަށް ނުވިޔަސް، އެއަށް ބާރުދޭނެ އިތުރު ހެކި ހުރި ނަމަ ކުށް ސާބިތު ކުރެވޭނެ
ސުޕްރީމް ކޯޓު -- ފޮޓޯ/މިހާރު
15 ފެބުރުއަރީ 2022 - 14:29
17 comments
ރިސޯޓެއްގައި މަސައްކަތްކުރި ސައުތު ކޮރެއާ އަންހެނަކު ގްރޫޕަކުން ރޭޕްކުރި މައްސަލާގައި 15 އަހަރަށް ޖަލަށްލި މީހާގެ ޖަލު ހުކުމް ސުޕްރީމް ކޯޓުން މިއަދު ދަމަހައްޓައި، ރޭޕްގެ ކުށްތައް ސާބިތު ކުރުމާ ބެހޭ ވަރުގަދަ އުސޫލުތަކެއް އެ ކޯޓުން މިއަދު ކަނޑައަޅައިފި އެވެ.
ފެބްރުއަރީ، 2015 ގައި ރިސޯޓެއްގެ ކޮޓަރިއެއްގައި ނިދާފައި އޮއްވާ އެ އަންހެން މީހާ ރޭޕްކުރީ ތިން މީހަކު ވެގެން އޭނާ އަށް ބިރު ދައްކައި، އޭނާ ބަނުމަށް ފަހު އެވެ. އެ މައްސަލާގައި ތިން މީހެއްގެ މައްޗަށް ދައުވާ ކުރިއަސް، ހައި ކޯޓުގައި މިދިޔަ އަހަރު ކުށް ސާބިތުވީ އެންމެ މީހެއްގެ މައްޗަށެވެ.
ކުށް ސާބިތުވި މީހާގެ ފަރާތުން އެ މައްސަލަ އިސްތިއުނާފް ކުރުމުން ސުޕްރީމް ކޯޓުން މިއަދު ކުރި ހުކުމުގައި ވަނީ އަންހެން މީހާގެ ކުރިމަތި ފަރާތުން ނެގުނު ޑީއެންއޭ އާއި ކުށް ސާބިތުވި މީހާގެ ސްޕާމް ހެޑް ޑީއެންއޭ ދިމާވާ ކަމަށެވެ. އަދި އެތަނުން އޭނާގެ ޑީއެންއޭ ފެންނަން ޖެހުނު ސަބަބެއް އޭނާ ބުނެދެވިފައި ނުވާއިރު އަންހެން މީހާ ކިޔައިދޭ ކިޔައިދިނުމާއި ހާދިސާ ހިނގި ކޮޓަރިން ފެނުނު އެހެން ހެކިތައް ދިމާވާ ކަމަށް ހުކުމް އިއްވަވަމުން ފަނޑިޔާރު ހުސްނުއްސުއޫދު ވިދާޅުވި އެވެ.
އެގޮތުން ކޮޓަރިން ފެނުނު ބާލީސް އުރަތަކުން އެ މައްސަލާގައި ތުހުމަތު ކުރެވުނު އެހެން މީހުންގެ ޑީއެންއޭ ފެނިފައިވެ އެވެ. އަދި އެ މީހުން އެ އަމަލު ހިންގުމަށް ފަހު ތަޅުންގަނޑު މައްޗަށް ފެން އެޅި ކަމަށް އަންހެން މީހާ ބުނާއިރު ތުހުމަތު ކުރެވުނު އެހެން މީހެއްގެ ފިންގަޕްރިންޓް އެ ކޮޓަރިން ފެނުނު ފެންތަށްޓަކުން ފެނިފައިވާތީ އެއީ ތަޅުންގަނޑު މައްޗަށް ފެން އަޅަން އެ މީހުން ގެންގުޅުނު ތަށި ކަމަށް ބެލެވޭ ކަމަށް ވެސް ފަނޑިޔާރު ވިދާޅުވި އެވެ.
ރޭޕް ވިކްޓިމްގެ ބަހަށް އިސްލާމީ ޝަރީއަތުގައި ދޭ ބުރަދަން
ފަނޑިޔާރު ސުއޫދު ވިދާޅުވީ ރޭޕްގެ ކުށްތައް ހިންގަނީ ސިއްރުން ކަމަށް ވާތީ އެފަދަ މައްސަލަތައް ސާބިތު ކުރުމުގައި ލުއި މިންގަނޑެއް، ޖިންސީ ކުށުގެ ގާނޫނުގައި އެބައޮތް ކަމަށެވެ. އެހެންވެ، ރޭޕްގެ ޝިކާރައަކަށްވާ މީހާގެ ބަހަކީ އެންމެ މައިގަނޑު އަސާސް ކަމަށް ބަލަންޖެހޭ ކަމަށާއި އަދި އޭނާގެ ބަހަށް ބާރުދޭ ހެކި ހުރި ނަމަ ކުށް ސާބިތު ކުރެވޭނެ ކަމަށް ފަނޑިޔާރު ސުއޫދު ވިދާޅުވި އެވެ. އަދި އެކަމަށް ބާރު ދިނުމުގެ ގޮތުން، ކީރިތި ރަސޫލާގެ ޒަމާނުގައި ހިނގި ހާދިސާއެއްގައި އަމަލު ކުރެއްވި ގޮތް ފަނޑިޔާރު ފާހަގަ ކުރެއްވި އެވެ.
ޖިންސީ ގޯނާ އާއި ރޭޕްއާ ދެކޮޅަށް ބޭއްވި މުޒާހަރާއެއް --- ފޮޓޯ/މިހާރު
ކީރިތި ރަސޫލާގެ ޒަމާނުގައި އަނދިރި ތަނެއްގައި އަންހެނަކާ ގަދަކަމުން ޖިންސީ ގުޅުން ހިންގި ފިރިހެން މީހަކު އަތުލައިގަނެ، ރަސޫލާ އަރިހަށް ގެންދެވުމުން އަންހެން މީހާގެ ބަހާއި ދެން ހުރި ހެކިތަކަށް ކީރިތި ރަސޫލާ ބުރަވެ ވަޑައިގެން އެ ފިރިހެން މީހާ ރަޖަމް ކުރަން އަމުރު ކުރެއްވި ކަމަށް ފަނޑިޔާރު ސުއޫދު ވިދާޅުވި
ކީރިތި ރަސޫލާގެ ޒަމާނުގައި އަނދިރި ތަނެއްގައި އަންހެނަކާ ގަދަކަމުން ޖިންސީ ގުޅުން ހިންގި ފިރިހެން މީހަކު އަތުލައިގަނެ، ރަސޫލާ އަރިހަށް ގެންދެވުމުން އަންހެން މީހާގެ ބަހާއި ދެން ހުރި ހެކިތަކަށް ކީރިތި ރަސޫލާ ބުރަވެ ވަޑައިގެން އެ ފިރިހެން މީހާ ރަޖަމް ކުރަން އަމުރު ކުރެއްވި ކަމަށް ފަނޑިޔާރު ސުއޫދު ވިދާޅުވި އެވެ. އަދި އެ ހާދިސާއިން އިލްމުވެރިން ނަންގަވާ ދަލީލަކީ ރޭޕްގެ މައްސަލަތަކުގައި އަންހެން މީހާގެ ބަހަށް ބުރަދަން ދިނުމުގެ އުސޫލު ކަމަށް ފަނޑިޔާރު ވިދާޅުވި އެވެ.
"މި ހާދިސާގައި ހަތަރު ހެކިން ދެއްކުމަށް ކީރިތި ރަސޫލާ އެ އަންހެން މީހާގެ މައްޗަށް އަންގަވައިފައެއް ނުވޭ. އަދި އަންހެން މީހާގެ މައްޗަށް ގަޒްފު އަދަބު ވެސް ދެއްވާފައެއް ނުވޭ،" ފަނޑިޔާރު ސުއޫދު ވިދާޅުވި އެވެ.
މީގެ އިތުރުން އިސްލާމީ އުއްމަތުގެ ދެވަނަ ޚަލީފާ އުމަރުގެފާނުގެ ޒަމާނުގައި ހިނގި ހާދިސާއަކުން ވެސް ފަނޑިޔާރު ސުއޫދު މިސާލު ނެންގެވި އެވެ. އެއީ ވަރަށް ނިދި ގަދަ ކަމަށް ބުނާ އަންހެނަކު ނިދާފައި އޮއްވާ ފިރިހެނަކު އޭނާއާ ގަދަކަމުން ޖިންސީ ގުޅުން ހިންގީ ކަމަށާއި އެއީ ކާކުކަން ނޭނގޭ ކަމަށް ބުނުމުން އުމަރުގެފާނު އެ އަންހެެން މީހާގެ ބަސް ގަބޫލު ކުރެއްވި ހާދިސާ އެކެވެ. އެކަމުން ވެސް އެނގެނީ ރޭޕްގެ ޝިކާރައަކަށްވާ މީހާގެ ބަހަށް ދޭ ބުރަދަން ކަމަށް ފަނޑިޔާރު ސުއޫދު ވިދާޅުވި އެވެ.
"މިއިން އެނގެނީ ރޭޕްގެ ކުށުގެ އަނިޔާ ލިބޭ މީހުންގެ ހެކިބަހަށް އިސްލާމީ ޝަރީއަތުގައި ދެވިފައިވާ ބުރަދަން،" ފަނޑިޔާރު ސުއޫދު ވިދާޅުވި އެވެ.
ޑީއެންއޭ އަށް ބާރު ދޭ އެހެން ގަރީނާ ހުންނަން ޖެހޭނެ
ތިން ފަނޑިޔާރުންގެ އިއްތިފާގުން ހުކުމް އިއްވަވަމުން ފަނޑިޔާރު ސުއޫދު ވިދާޅުވީ ޑީއެންއޭއަކީ އޭގެ މައްޗަށް އެކަނި ބިނާކޮށް ރޭޕްގެ ކުށް ސާބިތު ކުރެވޭނެ ހެއްކަކަށް ނުވިޔަސް، އެއަށް ބާރުދޭނެ އިތުރު ހެކި ހުރި ނަމަ ކުށް ސާބިތު ކުރެވޭނެ ކަމަށެވެ. އެގޮތުން ރޭޕް ކުރުމުގެ ނިޔަތް އޮތްކަމުގެ ގަރީނާ އާއި ކުށް ކުރަން ފުރުސަތު ލިބުނު ކަމުގެ ގަރީނާ އާއި އެ އަމަލު ހިންގީ ރުހުމެއް ނެތިކަމުގެ ގަރީނާ ހުރި ނަމަ ރޭޕްގެ ކުށް ސާބިތު ކުރެވޭނެ ކަމަށް ފަނޑިޔާރު ވިދާޅުވި އެވެ.
ރިސޯޓުގެ ކޮޓަރި ސާފުކުރަން މަސައްކަތް ކުރި އެ ފިރިހެން މީހާގެ މަސައްކަތްތަކާ ބެހޭގޮތުން އެ އަންހެން މީހާ ރިސޯޓުގެ ވެރިންނަށް ކުރިން ޝަކުވާ ހުށަހަޅާފައިވެ އެވެ. އެހެންވެ، ފަނޑިޔާރު ސުއޫދު ވިދާޅުވީ އެއީ އޭނާގެ ކުށުގެ ނިޔަތް އޮތްކަމަށް ބާރު ލިބޭ ގަރީނާއެއް ކަމަށެވެ. އަދި އޭނާ ރިސޯޓުގައި ނިދާ ސަރަހައްދުގެ ބަދަލުގައި ރިސޯޓުގައި އެ ހާދިސާ ހިނގި ސަރަހައްދުގައި އޭނާ އެރޭ އުޅެފައިވުމަކީ ކުށްކުރަން ފުރުސަތު ލިބުނު ގަރީނާއެއް ކަމަށް ވެސް ފަނޑިޔާރު ވިދާޅުވި އެވެ.
ފަނޑިޔާރު ސުއޫދުގެ އިތުރުން އެ މައްސަލަ ބެއްލެވި ބެންޗުގައި ދެން ތިއްބެވީ ފަނޑިޔާރު އަޒްމިރަލްދާ ޒާހިރު އަދި ފަނޑިޔާރު މަހާޒް އަލީ ޒާހިރެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޙިނި
16 February 2022
ރޭޕުގަ ބައިވެރިވި 3 މީހުންގެ ތެރެއިން އެކަކައް ކުއްސާބިތުވީމަ ކިހުނެއްބާ މީ ބޮޑު ނިންމުމަކައް ވަނީ. އަދި ކުރިމިނަލް ކޯޓު އެ 3 މީހުންވެސް ވަނީ ފޮރެންސިކް އެވިޑެންސް ހުރެ ކުއްސާބިތު ނުވެ ދޫކޮއްލާފަ، ދެން ކޮބާ ތޯ ތިބުނާ ރޭޕްގެ ސާބިތުވުމާ ގުޅޭ ވަރުގަދަ އުސޫލުތަކަކީ؟
އަދުހަމް2
15 February 2022
މިފަހަކަށްއައިސް ސުޕްރީމް ކޯޓުން ކުރި އެންމެ ޕްރެގްމެޓިކް އެއް ހުކުމް. ވަރަށް ރަނގަޅު. މިކަހަލަ ވިސްނުންތެރި އިލްމީ ހުކުމް މިހާރު ފެންނާތީ ޝަރުއީ ދާއިރާއާ ދޭތެރޭ އޮންނަ އިތުބާރު ވަރަށް ބޮޑަށް އިތުރުވޭ. މީގެ ކުރިން ހައިކޯޓުން ވެސް މެރިޓަލް ރޭޕް މައްސަލައިގަ ކުރީ ވަރަށް ފުހިހަމަ ހުކުމެއް. ކުރިމަގަށްޓަކައި ކުރެވޭ އުންމީދު އެބަ ރަނގަޅުވޭ. އުންމީދުކުރަނީ މަސްތުވާ ތަކެއްޗާ ކޮރަޕްޝަން މައްސަލަތަކުގަވެސް މިކހަލަ ހުކުމްތައް ފެންނާނެކަމަށް.
ޑރ ހަބީބު
15 February 2022
ފަނޑިޔާރު ޑރ އަޒްމިރަލްދާ ޒާހިރު އިނގޭތޯ!
ބަސްއަހާ
15 February 2022
މަސްތުވާތަކެތީގެ މައްސަލައެއްނަމަ ބަލާނީ އޭނާ އެވަގުތު އެތާހުރުމަކީ އަދި މައްސަލައެއް ނޫންކަމަށް. އަދި އޭނާގެ ފިންގަޕްރިންޓް ހުރުމަކީ އެއީ އޭނާގެ އެއްޗެއްކަން ނުބެލެވޭނެ ކަމަށް. ހަމަ އަޖައިބެއް ފަދަ ކަމެއް.
މުސްކާނު
15 February 2022
ސްޕުރިމކޯޓުގެ ހުކުމަކީ ރަނގަޅު ކުކުމެއް.
އަވަހަށް
15 February 2022
ރޭޕަކީ ނުބާ ޖަރީމާއެއް. މުޑުދާރު ކުށެއް. މި ކުށް ސާބިތު ކުރުމަށް ސްޕުރިމް ކޯޓުން ތިޔަ ފައިސަލާ ކުރެއްވި ފަދަ ހަމަތަކެއް، ހަމަ މިފަދަ ނުބާ އެހެން ކުށްކުށަށްވެސް ކަނޑައަޅުވާ ދެއްވާ. މަސްތުވާ ތަކެތި ކިލޯއިން ޓަަނުން ބޮކްސާތެެރެއިން ނަގާއިރުވެސް ކޮޮންމެވެސް އެއްޗެއް ހަމަނުވެގެން ބޮޑޮތި މުޖުރިމުން މިރާއްޖޭގައި ކޯޓުތަކުން އެހެރަ ދެމިގަނެގެން ދަނީ ލޮނދި ހިކައެއްހެން. މަސްތުވާ ތަކެއްޗަކީ ހުރިހާ ނުބައިކަމެއްގެ ތަޅުދަނޑި. ފުރަތަމަ އަވަހަށް މިކަން ހުއްްޓުވާ
މާމާ
15 February 2022
ތިހުކުމާދޭތެރޭ ސަލަފް ހިންހަމަ ޖެހޭނެބާ
އަހުމަދުވގަރު
15 February 2022
ގެރެންޓީ ނުޖެހޭނެކަން.
ބޮޑުމީޙާ
15 February 2022
ރަގަޅު ނިންމުމެއް. ތިހެން މަސްުތުވާތަކެއްޗާއި ކޮރަޕްޝަނާއި ދެކޮޅަށްވެސް ހުކުމްތައް ކުރަން އެބަޖެހޭ. ޖީބުން ބޮކްސާތެރެއިން މަސްތުވާތަކެތި ފެނުނަސް ސާބިތެއް ނުވޭ. ކޮރަޕްޝަން ހިންގައިގެން ނުހައްގު މުއްސަދިކަން ހޯދާއިރު ސާބިތުނުވޭ
ޝަމީލް - އުަސްތާޒް
15 February 2022
ހިތައްއަރާ ޕްރޮސްޓިޓިއުޓަކުވެސް ފިރިހެންމީހާ އަށް ވަރުގަދަ ލަނޑެއްދޭން ބޭނުން ވަންޏާ، ރޭޕްގެ އިލްޒާމު ބޮލުގަ އަޅުވާ، ވަރަށް ފަސޭހައިން މިގޮތަށް ސާބިތުކޮށް ދެވިދާނެޔޭ. ސީޔާސީ ވާދަވެރިން ފަދަ ފަރާތްތަކުން މިއުޞޫލުގެ ނާޖާއިޒު ފައިދާ ނުނަގާނެބާ؟ ރީޒަނަބްލް ޑައުޓެއް މީގަ ނެތްބާ؟
ޕްރޮސްޓިޓިއުޓް
15 February 2022
ޕުރޮސްޓިޓިއުޓުން ގާތަށް ވަންނަން ޖެހޭތަ؟ ނުވަންނަ މީހަގެ ސްޕާމް ހެޑުން ޑީއެންއޭ ސާބިތުވޭތަ؟ މީހަކާ އިނދެގެން އެކަން ކުރަން އޮންނަ ގޮތަށް ކުރީމަކަމުނުދަނީތަ؟
ހެއްވާ ކަމެއް
15 February 2022
ޕްރޮސްޓިޓިއުސަން ހުއްދަވީ ކޮން އިރަކުބާ؟ ފިރިހެންމީހާ ހިތުން ރުހުމުން ހަރާމްކަމެއް ކުރާއިރު ބިރުގަންނަންވީ ސިޔާސީ ވާދަވެރިންނާ ދޭތެރޭއެއްނޫން. އެއަށްވުރެ އަޒާބު ވަރުގަދަ
އަލިކޮއި
15 February 2022
މިކަމާ އެންމެ ބިރުން އުޅޭނީ ޕްރޮސްޓިޓިއުޓުން ކައިރިއަށްދާ މީހުނާއި، ވަގު ބިޓުން ގެންގުޅޭކަހަލަ ފިޑިން. ފުރަތަމަ ހުކުމް ކިޔާލަބަލަ. ކަލޭމެން ޕްރޮސްޓިޓިއުޓުން ކައިރިއަށްދާ މީހުންގެ ހައްގު ހޯދާތީ ރޭޕް ވިކްޓިމްސް މިވީ ހައްޕުކިޔައިގެން ތިބެން؟ ކެތްތެރިކަމެއް، އީމާންތެރިކަމެއް، ވަފާތެރިކަމެއް ނެތީތަ؟
ފޭރޭ
15 February 2022
ޕްރޮސްޓިއުޓުން ކައިރިއަށް ނުދަންވީ އިތުރު ސަބަބެއްނު...
އަލިކޮއި
15 February 2022
މަރުހަބާ ސުޕްރީމް ކޯޓު. އިންސާފުވެރި ނިންމުމެއް އަދި ކުރިމަގަށް އެޅުނު ރަގަޅު ފިޔަވަޅެއްވެސްމެ. ސުއޫދު ފަދަ ގާބިލު މީހުން އަދިވެސް އިތުރަށް ބޭނުން! ރޭޕް އަދި ގަދަކަމުން މިފަދަ އަމަލުތައް ހިންގަނީ ފިޑި އަދި ނާތަހުޒީބު މީހުން.