ސްޕެޝަލިސްޓް ޑޮކްޓަރުން ތަމްރީނުކުރަން ސަރުކާރުގެ ފުލީ ފަންޑެޑް ސްކޮލަޝިޕެއް ތައާރަފްކޮށް، އެ ސްކީމަށް ކުރިމަތިލާން އިއްޔެ ހުޅުވާލައިފި އެވެ.
ހަޔަ އެޑިއުކޭޝަން މިނިސްޓްރީން ބުނީ ސަރުކާރުގެ އިދާރާތަކުގެ ތިން އަހަރުގެ ޓްރެއިނިން ނީޑްސް އަށް ބެލުމަށް ފަހު ހުޅުވާލި ސްކޮލަޝިޕްގެ 15 ފުރުސަތަށް އަންނަ މަހުގެ ހަތް ވަނަ ދުވަހާ ހަމައަށް ކުރިމަތިލެވޭނެ ކަމަށެވެ.
ސްޕެޝަލިސްޓް ޑޮކްޓަރުން ތަމްރީނުކުރަން ނިންމާފައިވަނީ ހުޅުމާލެ ހޮސްޕިޓަލާއި އައްޑޫ އިކުއިޓޯރިއަލް ހޮސްޕިޓަލާއި ކުޅުދުއްފުށީ ރީޖަނަލް ހޮސްޕިޓަލާއި ލ. ގަން ރީޖަނަލް ހޮސްޕިޓަލާއި ތިނަދޫ ރީޖަނަލް ހޮސްޕިޓަލާއި ރ. އުނގޫފާރު ރީޖަނަލް ހޮސްޕިޓަލް އަދި މ. މުލީ ރީޖަނަލް ރީޖަނަލް ހޮސްޕިޓަލެވެ.
މިނިސްޓްރީން ބުނީ އެ ހޮސްޕިޓަލްތަކުން ޑޮކްޓަރުން ސްޕެޝަލައިޒްވުމަށް 14 ދާއިރާއަކުން ތަމްރީނުކޮށްދިނުމަށް އެދިފައިވާ ކަމަށެވެ. އޭގެ ތެރޭޭގައި އެނަސްތީސިއޮލޮޖީ، އިންޓާނަލް މެޑިސިން، އޮތޯޕީޑިކްސް އެންޑް ޓްރޮމާ ސާޖަރީ، މެޑިކަލް އޮންކޮލޮޖީ، ގޭސްޓްރޯއެންޓްރޮލޮޖީ އެންޑް ހެޕަޓޮލޮޖީ، ޕީޑިއަޓްރިކް ނިއުރޮލޮޖީ، އޮފްތަމޮލޮޖީ، ޑާމަޓޮލޮޖީ، ނިއޯނޭޓޮލޮޖީ، ޕަލްމިނޮލޮޖީ، ނެފްރޮލޮޖީ، އެންޑްރޮކްރިނޮލޮޖީ އެންޑް ޑައިބެޓިކްސް އަދި ގައިނޮކޮލޮޖީ އެވެ.
އެ ސްކީމުން 15 ޑޮކްޓަރުން ތަމްރީނުކޮށް އެ ހޮސްޕިޓަލްތަކަށް ބޮންޑުކުރާނެ އެވެ.
ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ މި ސަރުކާރުން އެންމެ އިސްކަން ދެނީ މީހުން ބިނާކުރުމަށް ކަމަށާއި ލާމަރުކަޒީ އުސޫލު ކާމިޔާބުކުރެވޭނީ ރަށްތަށުގައި ހިދުމަތް ދޭނެ ފަންނީ ތައުލީމީ ދިވެހިން އުފައްދައިގެން ކަމަށެވެ.
