ޕޯޓުތަކުގެ މުވައްޒަފުންނަށް ހާއްސަ ކޯހެއް ހިންގައިފި

މެރިޓައިމް ޕޯޓުތަކުގެ ސެކިއުރިޓީއާ ގުޅޭ ކޯހުގެ ބައިވެރިން. މި ކޯހުގައި 11 މުވައްޒަފުން ބައިވެރިވެފައިވޭ--ފޮޓޯ:އެމްޕީއެލް

ފާތިމަތު ޝަނާ މުހައްމަދު، މިހާރު

23 މާޗް 2022 - 18:41

މެރިޓައިމް ޕޯޓުތަކުގެ ސެކިއުރިޓީ ބަލަހައްޓާ ފަރާތްތަކަށް "ޕޯޓް ފެސިލިޓީ ޑެޒިގްނޭޓެޑް ސެކިއުރިޓީ ޑިއުޓީސް" ގެ ނަމުގައި ހާއްސަ ކޯހެއް ބާއްވައިފި އެވެ.

ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީޒްގެ ފަރާތުން ކުޅުދުއްފުށި ކެމްޕަހުގައި ދެ ދުވަހުގެ މުއްދަތަށް ކުރިޔަށް ގެންދިޔަ މި ކޯހުގައި ކުޅުދުއްފުށި ރީޖަނަލް ޕޯޓުގެ 11 މުވައްޒަފެއް ބައިވެރިވި އެވެ.

މި ކޯހުން ޕޯޓުގައި މަސައްކަތް ކުރާ މީހުންނަށް، ޕޯޓު ފެސިލިޓީ ސެކިއުރިޓީ ޕްލޭނާއި އިންޓަނޭޝަނަލް ކޮންވެންޝަން ފޯ ސޭފްޓީ އެޓް ސީ ގެ މިންގަނޑުތަކާ އެއްގޮތަށް މަސައްކަތްކުރާނެ ގޮތް ކިޔައިދޭނެ އެވެ. އަދި އައިއެމްއޯ އާއި އައިއެލްއޯ މިންގަނޑަށް އަހުލުވެރިކުރުވަން ހާއްސަ ސެޝަންތަކެއް ކުރިއަށްގެންދާނެ އެވެ.

އެމްޕީއެލް އިން އަންނަނީ ކުންފުނީގެ ރީޖަނަލް ޕޯޓުތަކުގައި މަސައްކަތް ކުރާ މުވައްޒަފުން ތަމްރީން ކުރުމަށްޓަކައި ހާއްސަ ޕްރޮގްރާމްތަކެއް އަހަރުގެ އެކި ދުވަސްތަކަށް ބަހާލައިގެން ހިންގަމުންނެވެ.