އައްޑޫ ހިތަދޫގައި އާޓިފިޝަލް ބީޗެއް ހަދަން ހޭޅިފަށުން ގިނަ އަދަދެއްގެ ގަސްތައް ނަގައި، އެތަނަށް ގެއްލުންދިން ކަމަށް ކުރެވޭ ތުހުމަތު އައްޑޫ ސިޓީ ކައުންސިލުން ދޮގުކޮށްފި އެވެ.
އެ މައްސަލައިގައި ސިޓީ ކައުންސިލުން އީޕީއޭ އަށް ޖަވާބުދާރީވާން ދިން މުއްދަތު އިއްޔެ އަށް ހަމަވިއިރު، އެތަނަށް އެއްވެސް ގެއްލުމެއް ނުދޭ ކަމަށް ބުނެ އެ ކައުންސިލުން ވަނީ ޖަވާބު ފޮނުވައިފަ އެވެ.
އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް މިއަދު "މިހާރު" އަށް ވިދާޅުވީ އެތަނަށް "އެއްވެސް ކަމެއް ނުކުރާ" ކަމަށް ބުނެ ސިޓީ ކައުންސިލުން އިއްޔެ ޖަވާބު ފޮނުވާފައިވާ ކަމަށެވެ. އެކަމަކު ގޫގުލް މެޕްގެ ޓައިމްލައިން ބަލާނި ނަމަވެސް، އެތަނަށް ގެނެސްފައިވާ ބޮޑެތި ބަދަލުތައް ފެންނަ އެބަހުރި ކަމަށް އޭނާ ވިދާޅުވި އެވެ.
"ސައިޓް ވިޒިޓެއް ކޮށްފައި، ދެ ފަރާތުން ތިބެގެން ބަލައިފައި އަޅަން ޖެހޭ ފިޔަވަޅެއް އަޅާނަން،" ނައީމް ވިދާޅުވި އެވެ.
އީޕީއޭއިން ކުރިން ބުނި ގޮތުގައި، ހިތަދޫ ކުނިކޮށީގެ ދެކުނުން އޮތް ސަރަހައްދުގައި އެއްގަމާއި މޫދު ކޮނެ، ހޭޅިފަށުން ގަސްތައް ނަގައި، އެ ހިސާބުގެ އާނުގަނޑު ވެސް ނަގައި ހަލާކުކޮށްފައިވާ ކަމުގެ މައުލޫމާތު އެ އެޖެންސީ އަށް ލިބިފައިވާ ކަމަށެވެ. އަދި އެއީ އީޕީއޭގެ ހުއްދަ ނެތި ހިންގާފައިވާ އަމަލެއް ކަމަށެވެ.
އެހެންވެ އީޕީއޭ އިން ކައުންސިލްގައި އެދުނީ އެ މަސައްކަތުގެ ތަފުސީލާއި ބޭނުމާއި އެ މަސައްކަތް ކުރި ތާރީހާއި އަދި މަސައްކަތުގައި އިސްކޮށް ޝާމިލުވި ފަރާތްތަކުގެ މައުލޫމާތު އެ އެޖެންސީ އަށް ހުށަހަޅައިދިނުމަށެވެ.
އެކަމާ ގުޅޭ ގޮތުން އައްޑޫ ސިޓީ ކައުންސިލްގެ ބަހެއް ހޯދަން "މިހާރު" އިން ގުޅުމުން މޭޔާރައި ޑެޕީއުޓީ މޭޔަރު ވެސް ފޯނަށް ޖަވާބެއް ނުދެއްވަ އެވެ.