މި އަހަރު ރާއްޖެއިން ހައްޖަށް ދާ މީހުންގެ ފުރަތަމަ ގްރޫޕް މިރޭ ފުރައިފި އެވެ.
މި އަހަރު ރާއްޖެއިން 453 މީހުން ހައްޖަށް ދާއިރު، ސައޫދީ އެއާލައިންސުން މިރޭ ފުރީ އޭގެތެރެއިން 157 މީހެކެވެ. ހައްޖާޖީން ފުރަން ހަމަޖެހިފައި ވަނީ މިއަދާއި އަންނަ ބުދަ ދުވަހާއި ހޮނިހިރު ދުވަހު އެވެ.
މިފަހަރު ލިބުނު ކޯޓާ މަދުވުމުންނާއި އިންތިޒާމްތަކަށް އެކަށީގެންވާ ވަގުތު ނެތުމާ އެކު ހައްޖަށް މީހުން ގެންދަނީ ހައްޖު ކޯޕަރޭޝަނުން އެކަންޏެވެ.
ހައްޖާޖީން ފުރާ ތިން ދުވަހު މާލޭގެ ޓްރެފިކް މެނޭޖުކުރުމުގެ ގޮތުން ފުލުހުން ވަނީ ރޭގަނޑު 7 އިން 8 އަށް މަޖީދީމަގާއި އަމީނީމަގު އަދި އޯކިޑްމަގުން އެއްކޮޅަށް ދުއްވޭ ގޮތަށް ޓްރެފިކަށް ބަދަލު ގެނެސްފަ އެވެ. އެ ގަޑީގައި އެ މަގުތަކުގައި ދުއްވޭނީ ހުޅަނގުން އިރަށް އެކަންޏެވެ.
ހައްޖަށް ދާ މީހުންނާ އެކު އެ މީހުންގެ އާއިލާތަކުން ގިނަ ބަޔަކު މިރޭ އެއާޕޯޓަށް ފުރުވަން ދިޔަ އެވެ.
މާލެ އާއި ހުޅުމާލެ އިން ހައްޖާޖީންނާއި އެ މީހުންގެ އާއިލާތަކަށް ބަހުގައި ވެލާނާ އިންޓަނޭޝަނަލް އެއާޕޯޓަށް ދެވޭނެ އިންތިޒާމު އިސްލާމިކް މިނިސްޓްރީން އޮތީ ހަމަޖައްސައިފަ އެވެ.
ކޮވިޑްގެ ބަލިމަޑުކަމުގެ ދެ އަހަރަށް ފަހު، ފުރަތަމަ ފަހަރަށް ބޭރު ގައުމުތަކުގެ މީހުންނަށް ހައްޖަށް ދިއުމުގެ ފުރުސަތު ސައުދީން މި އަހަރު ހުޅުވާލިއިރު، ރައްކާތެރިކަމުގެ ފިޔަވަޅެއްގެ ގޮތުން ހުރިހާ ގައުމަކަށް ވެސް ކޯޓާ ދިނީ ކުރިއަށް ވުރެ މަދުންނެވެ.
ރާއްޖެ އަށް މި އަހަރު ލިބުނީ 453 ކޯޓާ އެވެ. އިތުރު ކޯޓާ ހޯދުމަށް ސަރުކާރުން މަސައްކަތް ކުރި ނަމަވެސް އެ ފުރުސަތެއް އަދި ނުލިބެ އެވެ.
ރާއްޖެ އަށް ލިބުނު ކޯޓާގެ ތެރެއިން 100 ކޯޓާ ގުރުއަތުން ދިނީ އާންމުންނަށެވެ. އަދި ބާކީ 353 ޖާގަ ދީފައި ވަނީ ހައްޖު ކޯޕަރޭޝަނަށް ކުރިން ފައިސާ ދައްކައިގެން ކިއުގައި ތިބި މީހުންނަށެވެ. އެ ކުންފުނީގެ ކިއުގައި މިހާރު ވެސް 3،500 މީހުން އެބަ ތިއްބެވެ.
މި އަހަރުގެ ހައްޖު ދުވަސް ދިމާވަނީ އަންނަ ޖުލައި މަހުގެ އަށް ވަނަ ދުވަހަށެވެ.