ހުޅުމާލޭގައި ހަދާ ބައެއް ފްލެޓްތައް މެއި މަހަށް ނިމޭނެ: ހައުސިން މިނިސްޓްރީ

މި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހުޅުމާލޭގައި މިހާރު ހަދަމުން އަންނަ ބައެއް ފްލެޓްތައް ނިންމައި، އަންނަ އަހަރުގެ މެއި މަހު އެ ތަންތަނުގައި މީހުންނަށް ދިރިއުޅެން ފެށޭވަރުވާނެ ކަމަށް ހައުސިން މިނިސްޓްރީން މިއަދު ބުނެފި އެވެ.

އެ މިނިސްޓްރީން އެހެން ބުނީ، ސަރުކާރުން ހުޅުމާލޭގެ ދެ ފިޔަވަހީގައި ހަދަމުން އަންނަ ބައެއް ފްލެޓްތަކުގެ މަސައްކަތް ގޮސްފައިވާ ހިސާބު އެޗްޑީސީ އާއި ފަހި ދިރިއުޅުން ކޯޕަރޭޝަން ގުޅިގެން ނޫސްވެރިންނަށް ދައްކާލުމަށް ފަހު އެވެ.

މިނިސްޓްރީން ދިން މައުލޫމާތު ޝީޓުގައިވާ ގޮތުން އެކި ކުންފުނިތަކާ ހަވާލުކޮށްގެން ސަރުކާރުން މާލެ ސަރަހައްދުގައި މިހާރު 6،175 ފްލެޓް އިމާރާތް ކުރުމުގެ މަސައްކަތް އަންނަނީ ކުރަމުންނެވެ. އޭގެ ތެރެއިން 4،000 ފްލެޓަކީ މި ސަރުކާރުން އިއުލާންކޮށްފައިވާ "ގެދޮވެރިޔާ" ސްކީމްގެ ދަށުން ދޫކުރާ ތަންތަނެވެ. އެ ހުރިހާ ޕްރޮޖެކްޓެއްގެ މަސައްކަތް ފަށާފައި ވާއިރު، އަމަލީ މަސައްކަތް ނުފެށި ވަނީ ވަރަށް މަދު ފްލެޓެއްގެ އެވެ.

އެ އިވެންޓަށް ފަހު ނޫސްވެރިންނާ ވާހަކަ ދައްކަވަމުން ހައުސިން މިނިސްޓްރީން ސީނިއާ އެގްޒެކެޓިވް ޑައިރެކްޓަރު މުހައްމަދު އާރިފް ވިދާޅުވީ، މި ސަރުކާރުން ކުންފުނިތަކާ ހަވާލުކޮށްގެން މާލެ އާއި ހުޅުމާލޭގައި 54 ޓަވަރެއް ހެދުމުގެ މަސައްކަތް އެކި މަރުހަލާތަކުގައި މިހާރު ކުރިއަށް ގެންދާ ކަމަށެވެ.

އޭގެ ތެރެއިން 23 ޓަވަރެއްގެ މަސައްކަތް މިއަދު ނޫސްވެރިންނަށް ދައްކާލި އެވެ. ގިނަ ތަންތަނުގެ ފުރަތަމަ މަރުހަލާ، ފައުންޑޭޝަން އެޅުމުގެ މަސައްކަތް ހުރީ ފަށައިފަ އެވެ. ބައެއް ތަންތަން ބުރިބުރިއަށް ނެގުމުގެ މަސައްކަތް ވެސް ކުރަމުންދެ އެވެ.

"ޔަގީން، ހަމަގައިމު ވެސް އަޅުގަނޑުމެން އަންނަ އަހަރު މެއި މަހާ ހިސާބަށް ދާއިރު މީގެ ތެރެއިން ބައެއް ޓަވަރުތަކަށް މީހުން ވެއްދޭނެ. އަޅުގަނޑުމެންނަށް ކޮންޓްރެކްޓަރުން އެ ވަރުގެ ޔަގީންކަން ދެއްވާ،" އާރިފް ވިދާޅުވި އެވެ.

"ހަމަ އެގޮތަށް 54 ޓަވަރުގެ ތެރެއިން ވެސް ވަރަށް ގިނަ ޓަވަރުގެ މަސައްކަތް ނިމޭނެ. ހަމަގައިމު ވެސް އަޅުގަނޑުމެން ގަބޫލުކުރަނީ ހައުސިން މަޝްރޫއުތަކުގެ ތެރެއިން ބޮޑު ޕަސެންޓޭޖެއް ނިމޭނެ ކަމަށް."

އާރިފް ވިދާޅުވި ގޮތުގައި މި ސަރުކާރުގެ އަމާޒަކީ މުޖުތަމައުގެ ހުރިހާ ފަންތިއެއްގެ މީހުންނަށް ވެސް އަތްފޯރާއަގެއްގައި ފްލެޓް ލިބޭނެ ގޮތަށް ހައުސިން މަޝްރޫއުތައް ހިންގުމެވެ. ކުންފުނިތަކާ ހަވާލުކޮށްގެން ކުރިއަށް ގެންދާ މި މަޝްރޫއުތަކުގެ އަގު ކޮންޓްރޯލްކުރާނެ ކަމަށާއި އެ ފެލްޓްތައް ދިނުމުގައި އަލަށް ފެލްޓް ގަންނަ މީހުންނަށް އިސްކަންދިނުމަށް ޝަރުތު ވެސް ކޮށްފައިވާނެ ކަމަށް އޭނާ ވިދާޅުވި އެވެ.

މިދިޔަ ސަރުކާރުތަކުގައި ވެރިކަމުގެ ފަހު އަހަރަށް ދިއުމުން ނޫނީ ބޯހިޔާވަހިކަމުގެ މަޝްރޫއުތަކުގެ ބިންގާ އަޅާ ތަން ވެސް ނުފެންނަ ކަމަށާއި އެކަމަކު މިއަދު ނޫސްވެރިންނަށް ދެއްކި ފްލެޓްތަކަކީ މި ސަރުކާރުން ބޯހިޔާވަހިކަމުގެ މަޝްރޫއުތަކަށް އިސްކަންދޭވަރު ފެންނާނެ މަސައްކަތްތަކެއް ކަމަށް ވެސް އާރިފް ވިދާޅުވި އެވެ.

"މީގެ ކުރީގައި އަޅުގަނޑަކަށް ގަބޫލެއް ނުކުރެވޭ، ވެރިކަމުގެ ފަހު އަހަރާ ހަމަ އަށް ނޫނީ [ހައުސިން މަޝްރޫއުތަކުގެ] ބިންގާ އެޅުނު ތަނެއް ފެނިފައެއް ނެތް. ނަމަވެސް އަޅުގަނޑުމެން 2020 އިން ފެށިގެން މާލެ އާއި އަތޮޅު ތެރޭގައި ހައުސިން މަޝްރޫއުތައް މި އަންނަނީ ހިންގަމުން،" އޭނާ ވިދާޅުވި އެވެ.

ހައުސިން މިނިސްޓްރީން ބުނީ އެ ހުރިހާ ފްލެޓްތަކުގެ މަސައްކަތް 2024 އަށް ނިމެނޭ ކަމަށެވެ.

ގެދޮރުވެރިޔާ ސްކީމްގެ ފްލެޓްތަކުގެ ތަފުސީލު

ފަހި ދިރިއުޅުން ކޯޕަރޭޝަންގެ ބިޒްނަސް ޑިވެލޮޕްމަންޓް އެންޑް ކޯޕަރޭޓް އެފެއާޒް މެނޭޖަރު އަހްމަދު ޝަމޫލް އަބްދުﷲ ވިދާޅުވި ގޮތުގައި، މި ސަރުކާރުގެ ދޮރުވެރިޔާ ސްކީމްގެ ދަށުން ދޫކުރަން ނިންމާފައިވާ 4،000 ފްލެޓްގެ މަސައްކަތް ކުރަނީ ދެ ކުންފުންޏަކާ ހަވާލުކޮށްގެންނެވެ. އިންޑިއާގެ ޖޭއެމްސީ އާއި އެންބީސީސީ ކުންފުންޏާ ހަވާލުކޮށްފައިވާ އެ މަޝްރޫއުގެ ދަށުން ކޮންމެ ކުންފުންޏަކުން އަޅައިދެނީ 2،000 ޕްލެޓް ކަމަށް އޭނާ ވިދާޅުވި އެވެ.

ޝަމޫލް ވިދާޅުވި ގޮތުގައި މިދިޔަ އަހަރު ޑިސެމްބަރު 8 ގައި ޖޭއެމްސީން ހަދަން ފެށި ފްލެޓްތަކުގެ 16 ޕަސެންޓް މަސައްކަތް ހުރީ ނިމިފަ އެވެ. މި އަހަރު ޖެނުއަރީ 18 ގައި އެންބީސީސީން ހަދަން ފެށި ފްލެޓްތަކުގެ 13.5 ޕަސެންޓް ވަނީ ނިމިފަ އެވެ.

"މުޅި ޕްރޮޖެކްޓުގެ ކޮންސްޓްރަކްޝަން ފޭސް ވެސް ކުރިއަށް މި ގެންދަނީ ދެ ބަޔަކަށް ބަހާލައިގެން. އޭގައި މި ދިމާވާ ކަމަކީ މި ވަރުގެ ބޮޑު މަޝްރޫއެއް އެއްފަހަރާ ތަރައްގީކުރަން ބަލާއިރު ބޭނުންވާ މެޓީރިއަލްސް ސްޓޯކުރަން ޖާގަ ބޭނުންވޭ. އެހެންވެ، ޓެމްޕޮރަރީ ސައިޓަކާއި މެޓީރިއަލްސް ސްޓޯރޭޖަށް ބައެއް ސައިޓްތައް މި ވަގުތު ޔޫޓިލައިޒްކުރަމުން މިދަނީ،" އޭނާ ވިދާޅުވި އެވެ.

އެކަމަކު އަމާޒުކޮށްފައިވާ މުއްދަތަށް މަސައްކަތް ނިންމާލެވޭނެ ކަމަށް ޝަމޫލް ވިދާޅުވި އެވެ.

• އެ މަޝްރޫއުގެ ދަށުން ޖުމްލަ 17-18 ބުރީގެ 32 ޓަވަރު ހަދާނެ.

• ދެ ކޮޓަރީގެ 1،200 ފްލެޓް (650 އަކަފޫޓް).

• ތިން ކޮޓަރީގެ 2،800 ޕްލެޓް (900 އަކަފޫޓް).

• ކޮންމެ ޓަވަރެއްގެ ފުރަތަމަ ބުރީގައި ޕާކިން ޒޯނެއް ހުންނާނެ.

• ކޮންމެ ޓަވަރެއްގެ ފުރަތަމަ އަދި ދެވަނަ ބުރީގައި ކޮމާޝަނަލް ބޭނުންތަކަށް ދޫކުރާނެ ތަންތަން ހުންނާނެ.

• ކޮންމެ ޓަވަރެއްގައި ދިރިއުޅޭނެ ކަމަށް އަންދާޒާކުރާ އާބާދީ އަކީ 750 މީހުން.

ބޯހިޔާވަހިކަމަށް ކުރިމަތިލާން ހުޅުވާލި މުއްދަތު މިދިޔަ މަހަށް ހަމަވިއިރު 4،000 ފްލެޓަށް، 20,697 ފޯމު ހުށަހަޅާފައިވެ އެވެ. މި ދައުރު ނިމުމުގެ ކުރިން އެ ހުރިހާ ފްލެޓެއްގެ މަސައްކަތް ނުނިމުނަސް، ރަޖިސްޓްރީ ހަވާލުކުރެވޭނެ ކަމަށް ހައުސިން މިނިސްޓްރީން ކުރިން ބުނެފައިވެ އެވެ.

މިއަދުގެ އިވެންޓްގައި ސަރުކާރުން އަމިއްލަ އެހެން ބައެއް ކުންފުނިތަކާ ހަވާލުކޮށްގެން ހަދަމުން އަންނަ ފްލެޓްތަކުގެ މަސައްކަތް ގޮސްފައިވާ ހިސާބު ދައްކާލި އެވެ. އޭގެ ތެރޭގައި ރަޝީދު ކާޕެންޓްރީ ކޮންސްޓްރަކްޝަން (އާރުސީސީ)، އެޕޯލޯ ހޯލްޑިންގްސް، އެސްޖޭ ކޮންސްޓްރަކްޝަން، ސާސީ ގްލަޓް ޖޮއިންޓް ވެންޗާ، ފެޑޯ ޕްރައިވެޓް ލިމިޑެޓް، ސެލިޓެއާ، ރެއިންބޯ މެގަ އަދި ނިއުމާކް ޕްރައިވެޓް ލިމިޓެޑުން ހަދަމުން އަންނަ ފްލެޓްތައް ހިމެނެ އެވެ.

މާލޭގައި ކުރީގެ އޯޑިއޯން ސިނަމާ އަދި ކުރީގެ ނާދީ ހުރި ބިމުގައި ލަގްޒަރީ ފްލެޓް އިމާރާތްކުރުމުގެ މަސައްކަތް އިންޑިއާގެ ޓާޓާ ކުންފުނިން ވަރަށް ބާރަށް ކުރަމުން އަންނަ ކަމަށް ވެސް ހައުސިން މިނިސްޓްރީން ބުންޏެވެ.