ދަބަހުގައި ބޮމެއް އޮތް ކަމަށް ބުނި މީހަކު ހުޅުމާލެ އިން ހައްޔަރުކޮށްފި

ހުޅުމާލޭގެ ބީޗް ކްލަބަށް ވަދެ ދަބަހުގައި ބޮމެއް އޮތް ކަމަށް ރޭ ބުނި މީހަކު ހައްޔަރުކޮށްފި އެވެ.

ފުލުހުން ބުނީ އުމުރުން 38 އަހަރުގެ އެ ދިވެހި ފިރިހެންމީހާގެ ދަބަހުގައި ބޮމެއް އޮތް ކަމަށް ބުނެ އިންޒާރު ދިނުމުން އެކަން ރިޕޯޓު ކުރީ އެ ވަގުތު އެ ކެފޭގައި ތިބި އާންމުންގެ ބަޔަކު ކަމަށެވެ.

"މި ކަމާ ގުޅިގެން ބަލަންޖެހޭ ކަންކަން ފުލުހުން ދަނީ ބަލަމުން،" ފުލުހުންގެ މީޑިއާ އޮފިޝަލް ވިދާޅުވި އެވެ.

އެ މައްސަލަ ފުލުހުން ބަލަމުން އަންނައިރު، މި މަހު ފުލުހުން ވަނީ ޓެރަރިޒަމާ ދެކޮޅަށް މާލެ އާއި އައްޑޫ އަދި ކ. ގުރައިދޫގައި އޮފަރޭޝަނެއް ހިންގައި 14 މީހަކު ހައްޔަރުކޮށްފަ އެވެ. ނުރައްކާތެރި ގޮއްވުންތަކަށް ބޭނުންކުރާ ތަކެތި އެ އޮޕަރޭޝަންގައި އަތުލައިގަނެފައިވާ ކަމަށް ވެސް ފުލުހުން ވަނީ ބުނެފަ އެވެ.

އައްޑޫގައި އިއްޔެ އޮތް ރަސްމިއްޔާތެއްގައި ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވީ، ސިފައިންނާއި ފުލުހުން ގުޅިގެން މާލެ އާއި އައްޑޫ އަދި ގުރައިދޫގައި ހިންގި ޓެރަރިޒަމްގެ އޮޕަރޭޝަނަކީ މިހާތަނަށް ނާކާމިޔާބު ކޮށްލެވުނު އެންމެ ނުރައްކާތެރި އެއް ޓެރަރިޒަމްގެ ރޭވުން ކަމަށެވެ.

ފުލުހުން ބުނެފައި ވަނީ އެ ހަމަލަ ރޭވި މީހުން އުޅުނީ އައިސިސްއާ ގުޅިގެން ތަންތަން ގޮއްވަން ކަމަށެވެ. އޭގެ ބޭނުމަކީ "ގިނަ ބަޔަކު މަރުވާ ގޮތަށް އެއްޗެއް ގޮއްވާލަން" ކަމަށް މި މަހުގެ 14 ގައި ބޭއްވި މީޑިއާ ބްރީފިންގައި ފުލުހުން ބުނެފައި ވެ އެވެ.

"މި ހަމަލާ ރާވަމުން ދިޔައީ ގޮވާ ތަކެތި ބޭނުންކޮށްގެން ދިވެހިރާއްޖޭގެ ތަންތަނަށް ހަމަލާދީ، ގިނަ ބައެއްގެ ފުރާނަ އަށް ނުރައްކާވާ ފަދަ ހަމަލާއެއް ދިނުމަށް ކަން ފާހަގަކުރެވިފައިވޭ. މި އޮޕަރޭޝަންގެ މަގުސަދަކީ އާންމުންގެ ފުރާނަ އަށް ނުރައްކާވާ ގޮތަށް ރާވަމުން ދިޔަ ހަމަލާ ނާކާމިޔާބު ކޮށްލުން،" ޓެރަރިޒަމް އެންޑް ވަޔަލެންޓް އެކްސްޓްރިމިޒަމް ޔުނިޓްގެ ހެޑް، އިންސްޕެކްޓަ އޮފް ޕޮލިސް އުސްވަތު އަހުމަދު ވިދާޅުވެފައި ވެ އެވެ.

Breaking: Hayyaru kuri meehun ulhunee ISIS aa gulhigen gina bayaku maran

The most trusted news source in the Maldives

Mihaaru

ގޮވާ އެއްޗެއް އޮތް ކަމަށް ބުނެ އިންޒާރު ދިނުމަކީ ގާނޫނީ ކުށެކެވެ. ޓެރަރިޒަމްގެ ގާނޫނު ބުނާގޮތުން ޓެރަރިޒަމްގެ އަމަލެއްގެ ބިރެއް ނުވަތަ އިންޒާރެއް ދިނުމަކީ ހަތަރު އަހަރާއި ހަ އަހަރާ ދެމެދުގެ މުއްދަތަށް ޖަލަށްލެވޭނެ ކުށެކެވެ. އެއީ އަނގަބަހުން ނުވަތަ ލިޔުމުން ނުވަތަ އެހެން ވެސް ވަސީލަތެއް ބޭނުންކޮށްގެން އިންޒާރު ދިނުން ވެސް ހިމެނޭ ގޮތުންނެވެ.

އެފަދަ އިންޒާރު ދިނުން ބޮޑު ކުށަކަށް ބައެއް ގައުމުތަކުގައި ހަދާފައިވަނީ އެކަމުގެ ސަބަބުން އެތައް ބަޔަކު ނުރައްކަލަށް ހުށައެޅުމުގެ ފުރުސަތު އޮތުމުންނެވެ.