ރިލްވާންގެ މަރުުގައި އިހުމާލުވި މީހުންނަށް އަވަހަށް ފިޔަވަޅު އަޅަން ޖެހޭ: އާއިލާ

ނޫސްވެރިޔާ އަހްމަދު ރިލްވާން ވަގަށް ނަގައި ކަރުބުރިކޮށްލައި ކަނޑު ފައްތާލި މީހުންގެ އިތުރަށް އޭނާއަށް ނުރައްކާ އޮތް ކަން އެނގި ތިބެ ފިޔަވަޅު ނާޅާއި އިހުމާލުވި އެންމެންނާއި މަރުވުމުން އެކަން ފޮރުވަން މަސައްކަތްކުރި އެންމެންނާ ދޭތެރޭގައި ވެސް އަވަހަށް ފިޔަވަޅު އަޅަން ޖެހޭ ކަަމަށް އާއިލާ އިން މިއަދު ބުނެފި އެވެ.

މީގެ 8 އަހަރު ކުރިން ވަގަށް ނެގި ރިލްވާނަށް ވީ ގޮތެއް ހޯދަން މި ސަރުކާރުގައި އުފެއްދި ކޮމިޝަނުގެ ތަހުގީގަށް ފަހު މިދިޔަ ބުރާސްފަތި ދުވަހު ވަނީ ރިޕޯޓުގެ މުހިއްމުގެ ބައިތައް އާއްމުކޮށްފަ އެވެ. ކޮމިޝަނުން ބުނި ގޮތުގައި ރިލްވާނަށް ފާރަލާތާ އެތައް ދުވަހެއް ފަހުން ދިރިއުޅޭ އެޕާޓްމަންޓް ކައިރިން ވަގަށް ނަގައިގެން ގެންދިޔައީ ކަނޑު މައްޗަށެވެ.

ގިނަ ބަޔަކު ތިބި ކަންނެލި ދޯންޏެއްގައި އޭނާގެ ކަރު ބުރިކޮށްލައި ކަނޑު ފެއްތީ ކަމަށާއި އެކަމުގައި އަމަލީ ގޮތުން ބައިވެރިވި ހަ މީހަކު ސީރިއާ އަށް ގޮސްފައިވާ ކަމަށް ކޮމިޝަނުން ބުންޏެވެ. އެކަމަކު އެ މީހުން މަރުވި ކަމެއް ރަސްމީ އިދާރާއަކުން ކަށަވަރެއް ނުވެ އެވެ.

ރިލްވާނަށް އިންޒާރުދިން ކަން އެނގޭ އިރު މުއައްސަސާތަކުން އަޅާނުލުމާއި އެކަން ފޮރުވައި ތުހުމަތު ކުރެވޭ މީހުންނަށް ހިމާޔަތްދޭން ދައުލަތުގެ ތެރޭގައި ގިނަ ކަންތައްތަކެއް ހިނގި ކަމަށް މަރު ކޮމިޝަނުން ބުންޏެވެ. އޭގެ ތެރޭގައި މަރުގެ އިންޒާރުދޭ ކަން އެނގި ތިބެ އަޅާނުލުމާއި ރިލްވާންގެ ފޯނު އިންޓަސެޕްޓް ކުރުމާއި އޭނާ ފުރައިގެން ދިޔައީ ކަމަށް ދައްކަން ފޭކު ޕާސްޕޯޓެއް ހަދައި މަރު ފޮރުވަން މަސައްކަތް ކުރި ބަޔަކު ހިމެނޭ ކަމަށް ކޮމިޝަނުން ބުންޏެވެ.

ރިލްވާންގެ ފޯނު އަޑު އެހުމަށް ނެރުނު ކޯޓު އަމުރުގައި އޮތީ އެ ހުއްދަ ދިނީ އޭނާގެ މައްޗަށް ކުރި ތުހުމަތަކާ ގުޅިގެން ކަމަށެވެ.

ކޮމިޝަނުގެ ރިޕޯޓާ ގުޅިގެން އާއިލާގެ ފަރާތުން ރިލްވާންގެ ދައްތަ، ފާތުމަތު ޝެހެނާޒް ބުނީ ރިލްވާނަށް އިންސާފު ހޯދައިދޭން ކޮމިޝަނުން މަސައްކަތްތަކެއް ކޮށްފައިވާ ކަމަށް އާއިލާ އިން ގަބޫލުކުރާ ކަމަށެވެ. ރިލްވާނަށް ފާރަލައި އަމަލީ ގޮތުން މަރުގައި ބައިވެރިވި ތިން މީހަކު ޖަލުގައި ތިބުމަކީ އޭގެ ހެއްކެއް ކަމަށް އޭނާ ބުންޏެވެ.

ރިލްވާންގެ މަރުގެ ތުހުމަތުގައި ދައުވާ އުފުލާފައި ވަނީ މ. ލެގޫން، އިސްމާއިލް އަބްދުއްރަހީމް އާދަމް (އިސޫ) އާއި މއ. ފާގަފިލާގެ، އަހުމަދު އިސްމާއިލް އާއި އަހުމަދު މުއާޒް (ގަޓް މުއާ) ގެ މައްޗަށެވެ.

ސީރިއާއަށް ދިޔަ ހަ މީހުން

ހ. ހިލްޓަން އަޒްލިފް ރައޫފް

ސ. މީދޫ, އިރާކް, މުހައްމަދު ހާމިދު

ސ. ހުޅުދޫ, އަތިރިއާގެ, މުހައްމަދު ސުއައިދު

ޏ. ފުވައްމުލައް ދަނޑިމަގު, ދަނޑު ފީށި އިސްމާއިލް ސަބީހް

ހއ. ދިއްދޫ ސޯސަނީގެ, އިބްރާހިމް ސޮލާހް

ތ. އޮމަދޫ ނަރުގިސްވިލާ, މުހައްމަދު މުނާޒް

ކޮމިޝަނުން ބުނި ގޮތުގައި ރިލްވާނަށް ނުރައްކާ އޮތް ކަން ސަމާލުކަމަށް އައިސްފައި އޮތުމުން ފުލުހުންނަށް އޭނާގެ މަރު ހުއްޓުވެން އޮތެވެ. އޭނާ ގެއްލުވާލި ފަހުން އެކަމުގައި ތުހުމަތު ކުރެވޭ މީހުން ސިޔާސީ ބޭފުޅުންގެ ނުފޫޒާ އެކު ކޯޓުތަކުން މިނިވަން ކޮށްފައިވާ ކަމުގެ ކަންބޮޑުވުން ކޮމިޝަނުގެ ރިޕޯޓުގައި ފާޅުކޮށްފައިވެ އެވެ.

ޝެހެނާޒް ބުނި ގޮތުގައި އެ މަރުގައި ފެންނަން އޮތް ވަށައިގެން ހުރި އިހުމާލުތައް ދޫކޮށްލާކަށް އާއިލާ އިން ނޭދެ އެވެ. އެކަން ނިޒާމުގެ ތެރޭގައި ވެސް އިތުރަށް ތަކުރާރުވިޔަ ނުދޭން ފިޔަވަޅު އަޅަން ޖެހޭ ކަމަށް ބުންޏެވެ.

"ރިޕޯޓް ރައީސަށް އެރުވުމާ ގުޅިގެން ރިޕޯޓްގައި ހުރި ކަންތައްތަކަށް ރިއާޔަތްކޮށް ރައީސް އިބްރާހިމް މުހައްމަދު ސޯލިހް މި މައްސަލައިގައި ފިޔަވަޅު އަޅަންޖެހޭ ފަރާތްތަކާ މެދު ފިޔަވަޅު އަޅުއްވާނެ ކަމަށް އުއްމީދުކުރަން،" އޭނާ ބުންޏެވެ.

"އަޅުގަނޑުމެން އެދެނީ މި މައްސަލަ ވީހާ ވެސް އަވަހަކަށް ނިންމައި އާއިލާ އަށް އިންސާފު ހޯދައިދިނުން."

މަރު ކޮމިޝަނުން ބުނެފައިވަނީ މާލޭގައި ހަރަކާތްތެރިވާ ހަރުކަށި ގޭންގުތަކަށް ނިސްބަތްވާ ބަޔަކު ގްރޫޕް ހަދައިގެން ނުކުމެ ސޯޝަލް މީޑިއާގައި ހަރަކާތްތެރިވަމުން ދިޔަ ބަޔަކަށް ބިރު ދައްކައި އިންޒާރުދީ އަނިޔާކުރިއިރު ޓާގެޓަކަށް ރިލްވާން ވެފައިވާ ކަމަށެވެ. އެކަން އޮތީ ފުލުހުންގެ ސަމާލުކަމަށް އައިސްފައި ކަމަށް ވެސް ކޮމިޝަނުން ބުންޏެވެ.

ތަހުގީގާ ގުޅޭ ގޮތުން ކޮމިޝަނުން އާއްމުކުރީ ރިޕޯޓުގެ މުހިއްމު ބައިތަކެވެ. ޝަރީއަތަށް ހުރަސްއެޅިދާނެތީ މުޅި ރިޕޯޓް އާއްމެއް ނުކުރެ އެވެ.