މުއިއްޒުގެ ރައްދު: ފައިސާ ބޭނުންކުރީ މިސްކިތްތަކުގެ މަރާމާތަށް، މިނިސްޓަރު ހައްދަވަނީ އިތުރުފުޅު

މާލޭގެ މިސްކިތްތަކުގެ މަރާމާތަށް ސަރުކާރުން ސިޓީ ކައުންސިލަށް ދިން ފައިސާ ބޭނުން ކުރީ ސީދާ އެކަމަށް ކަމަށާއި ރިޕޯޓު ވެސް އިސްލާމިކް މިނިސްޓްރީ އަށް ހުށަހަޅާފައިވާނެ ކަމަށް ވިދާޅުވެ މާލޭގެ މޭޔަރު ޑރ. މުހައްމަދު މުއިއްޒު އިސްލާމިކް މިނިސްޓަރު ޑރ. އަހުމަދު ޒާހިރަށް މިއަދު ރައްދު ދެއްވައިފި އެވެ.

މޭޔަރުގެ ރައްދު ކުއްލި ގޮތަކަށް މި އައީ ކުރިއަށް އޮތް ރޯދަމަހަށް މިސްކިތްތައް މަރާމާތުކޮށް، އާބާތުރަ ފިލުވުމަށް "ޗާލު މިސްކިތް" ނަމުގައި ފަންޑް ރައިޒިން ހަރަކާތެއް މިދިޔަ ހަފުތާ ބަންދުގައި ބޭއްވުމުން އިސްލާމިކް މިނިސްޓަރު ކަންބޮޑުވުން ފާޅުކުރެއްވުމުންނެވެ.

ޑރ. ޒާހިރު ވިދާޅުވީ 2020 ވަނަ އަހަރު ވެސް އެއް މިލިއަން ރުފިޔާ ސިޓީ ކައުންސިލަށް ދޫކޮށް، އެ ފައިސާ ބޭނުންކުރާ ގޮތުގެ ރިޕޯޓު ހުށަހެޅުމަށް އެންގި ނަމަވެސް އެ ރިޕޯޓް ކައުންސިލުން ނުފޮނުވާ ކަމަށެވެ. އެ ފައިސާ ކައުންސިލުގައި ހުރި ކަމަށް ފަހުން ކައުންސިލުން ބުނެފައިވާ ކަމަށް އޭނާ ވިދާޅުވި އެވެ.

"ކައުންސިލުން ބުނަނީ އެ އެއްމިލިއަން ރުފިޔާ ހުރި ކަމަށް. އެ ބޭނުން ނުކުރާ ކަމަށް. އަޅުގަނޑުމެން މި އަހަނީ އެ ފައިސާ ހުރިއްޔާ ކީއްވެހޭ އިތުރު ފައިސާ ހޯދަނީ. އެ ފައިސާ ބޭނުން ކޮށްގެންތާ ރިޕޯޓު ވެސް ހުށަހެޅޭނީ،" މިނިސްޓަރު ވިދާޅުވި އެވެ.

މިދިޔަ އަހަރަށް ވެސް ދެ މިލިއަަން ރުފިޔާ އެކަމަށް ބަޖެޓުކޮށް، ސިޓީ ކައުންސިލަށް އެކަން އެންގި ކަމަށް މިނިސްޓަރު ވިދާޅުވި އެވެ. އެކަމަކު، ފައިސާ ދޫނުކޮށް، ހިނގާ ހަރަދުތަކުގެ ބިލްތައް ފޮނުވުމުން ފައިސާ ހަމަޖެހޭނެ ކަމަށް އެންގި ނަމަވެސް، އެ ފަހަރު ވެސް މިނިސްޓްރީއާ އެކަމާ ގުޅިގެން މުއާމަލާތެއް ނުކުރާ ކަމަށް ޑރ. ޒާހިރު މީޑިއާގައި ވިދާޅުވި އެވެ.

ނަމަވެސް އޭނާގެ އެ ވާހަކަތައް ޑރ. މުއިއްޒު މިއަދު ދޮގުކުރެއްވި އެވެ. ވިދާޅުވީ 2020-2022 ގެ ނިޔަލަށް މިސްކިތްތަކުގެ މަރާމާތަށް އިސްލާމިކް މިނިސްޓްރީން ދިނީ އެއް މިލިއަން ރުފިޔާ ކަމަށެވެ. އެ ފައިސާ އިން ހުރިހާ މިސްކިތްތަކުގެ މަސައްކަތް ނުނިންމޭނެ ކަމަށް މިނިސްޓްރީ އަށް އަންގާފައިވާނެ ކަމަށާއި މިހާރު ކޮށްފައިވާ ހަރަދު ތަކުގެ ރިޕޯޓު ވެސް ހުށަހަޅާފައި ވާނެ ކަމަށް މުއިއްޒު ވިދާޅުވި އެވެ.

އިސްލާމިކް މިނިސްޓަރުގެ ވާހަކަތަކާ ގުޅިގެން، ހަގީގަތް ސާފުކޮށްދިނުމަށް ކައުންސިލުން މިއަދު ވަނީ މިސްކިތްތައް މަރާމާތު ކުރުމަށް ހިނގާފައިވާ ހަރަދުތަކުގެ ތަފްސީލު ވެސް ސޯޝަލް މީޑިއާގައި އާންމުކޮށްފަ އެވެ.

އޭގެ ބޭރުން ވެސް ސިޓީ ކައުންސިލުގެ އާމްދަނީ ބަޖެޓުން 10 މިލިއަން ރުފިޔާ މިސްކިތްތަކުގެ މަރާމާތަށް ހަރަދު ކުރަން ޖެހުނު ކަމަށް ކައުންސިލުން ބުންޏެވެ.

"މިނިސްޓަރު އެ ހައްދަވަނީ ކަނޑައެޅިގެން އިތުރުފުޅެއް. އަޅުގަނޑުމެން ވާނެ އެ ފައިސާ ބޭނުން ކޮށްފައިވާ ގޮތުގެ ރިޕޯޓެއް މިދިޔަ އަހަރު ހުށަހަޅާފައި. އެ ފައިސާ ބޭނުން ކޮށްގެން އެ ހުސްވީމާ އަޅުގަނޑުމެން އާމްދަނީ ހޯދާ ފައިސާ އިން އިތުރު 10 މިލިއަން ހަރަދުވި ވާހަކަ މި ދައްކަނީ،" ޑރ. މުއިއްޒު ވިދާޅުވި އެވެ.

އޭނާ ވިދާޅުވިގޮތުގައި، ދައުލަތުގެ މި އަހަރުގެ ބަޖެޓުގައި ކަނޑައަޅާފައިވާ ދެ މިލިއަން ޖަމާކޮށްދިނުމަށް ތަކުރާރުކޮށް ސިޓީ ކައުންސިލުން ވަނީ އިސްލާމިކް މިނިސްޓްރީގައި އެދިފަ އެވެ. އެކަމަކު، އެ މިނިސްޓްރީން އެ ފައިސާ ކައުންސިލާ ހަވާލުކޮށްފައި ނުވާކަމަށް މޭޔަރު ވިދާޅުވި އެވެ.

Miskiythah maraamaathu kurumah councilun hulhuvi fund ah 7 lakka ahvure gina Rufiyaa

The most trusted news source in the Maldives

Mihaaru

ދެ ދުވަހުގެ ނިޔަލަށް މިސްކިތްތަކުގެ މަރާމާތަށް ބޭނުންވާ ފައިސާ ހޯދަން ކައުންސިލުން މިދިޔަ ހަފުތާ ބަންދުގައި ބޭއްވި ހަރަކާތުން އާންމުން ވަނީ ހަތް ލައްކަ އަށް ވުރެ ގިނަ ރުފިޔާ ދީފަ އެވެ.