ސަރުކާރުން ގއ. ވިލިގިނލީގައި ހަދާ 50 ފްލެޓްގެ ބިންގާ މިއަދު އަޅައިފި އެވެ.
އެ ރަށުގައި މިއަދު ބޭއްވި ހާއްސަ ރަސްމިއްޔާތުގައި ފްލެޓްތަކުގެ ބިންގާ އަޅުއްވައި ދެއްވީ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އާއި ވިލިނގިލި ދާއިރާގެ މެމްބަރު ސައުދު ހުސައިން އަދިި އެ ރަށު ކައުންސިލުގެ މެމްބަރުންނެވެ.
ޑިޒައިން އެންޑް ބިލްޑް އުސޫލުން ވިލިގިނލީގައި 700 އަކަފޫޓުގެ 50 ފްލެޓް އިމާރާތްކުރުމުގެ މަސައްކަތް މިދިޔަ އަހަރު ޖޫން މަހު ހަވާލުކުރީ ދޮންބޭޒް ޕްރައިވެޓް ލިމިޓެޑްއާ އެވެ.
ސަރުކާރުގެ ޕީއެސްއައިޕީ ބަޖެޓުން ހަރަދުކުރަން ނިންމާފައިވާ މި މަޝްރޫއުގެ އަގަކީ 48 މިލިއަން ރުފިޔާ އެވެ.
އެތަނުގައި ތިން ކޮޓަރި، ތިން ފާހަނާ، ސިޓިން ރޫމް، ކާގެ، ބަދިގެ، ލޯންޑްރީ އަދި ގުދަނެއް ވެސް ހުންނާނެ އެވެ. އަދި ކޮންމެ ފްލެޓެއްގައި ބެލްކަންޏެއް ވެސް ލާނެ އެވެ. މި ފްލެޓް އިމާރާތްތައް ހަދަނީ ރޯހައުސް ގޮތަށް، ދެ ބުރިއަށެވެ.
ފްލެޓްތައް އަޅާ ސަރަހައްދުގައި ޕާކަކާއި ވެހިކަލް ޕާކުކުރާނެ ސަރަހައްދެއް ވެސް އެ މަޝްރޫއުގެ ދަށުން ހަދަން ވަނީ ހަމަޖެހިފަ އެވެ.