އިސްލާމީ ފަތުވާ ދޭ އެންމެ މަތީ މަޖިލީހުގެ ރައީސްގެ މަގާމަށް، ކުރީގެ އުއްތަމަ ފަނޑިޔާރު އައްޝައިޚް މުހައްމަދު ރަޝީދު އިބްރާހީމް މިއަދު އައްޔަން ކުރައްވައިފި އެވެ.
ރައީސް އޮފީހުން ނެރުނު ބަޔާނެއްގައި ބުނީ އިސްލާމިކް މިނިސްޓަރުގެ އެޑްވައިޒަރު އަދި ކުރީގެ ފިގުހު އެކަޑެމީގެ ރައީސްކަން ވެސް ކުރައްވާފައިވާ ޝައިޚް ރަޝީދު، ފަތުވާ ދޭ މަތީ މަޖިލީހުގެ ރައީސަކަށް އައްޔަންކުރެއްވީ ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތް ކުރުމުގެ ގާނޫނުން ރައީސް އަބްުދުﷲ ޔާމީނަށް ލިބިވަޑައިގަންނަވާ ބާރުގެ ދަށުން ކަމަށެވެ.
ފަތުވާދޭ މަތީ މަޖިލީހުގެ ރައީސަކަށް ޝައިޚް ރަޝީދު އައްޔަން ކުރެއްވި އިރު، މިދިޔަ މަހުގެ ތެރޭގައި ރައީސް ވަނީ އެ މަޖިލީހަށް ޝައިޚް އާދަމް ޝަމީމާއި އިސްހާގު މުހައްމަދުފުޅު ވެސް އައްޔަން ކުރައްވައިފި އެވެ.
އެ މަޖިލީހަށް މެމްބަރުން އައްޔަން ކުރެއްވުމުގެ ބާރު ހަމައެކަނި ރައީސުލްޖުމްހޫރިއްޔާ އަށް ލިބިވަޑައިގަންނަވާ ގޮތަށް، ދީނީ އެއްބައިވަންތަކަން ހިމާޔަތް ކުރުމުގެ ގާނޫނަށް ރައްޔިތުންގެ މަޖިލީހުން ވަނީ މިދިޔަ އަހަރުގެ ފަހުކޮޅު އިސްލާހެއް ގެނެސްފަ އެވެ. އެ ގާނޫނުގައިވާ ގޮތުން، އިސްލާމީ ފަތުވާދޭ މަޖިލިސްގެ ނަމުގައި އޮފީހެއް ރައީސް ގާއިމް ކުރައްވަން ވެސް ޖެހިވަޑައިގަންނަވަ އެވެ. އެއީ، އިސްލާމިކް މިނިސްޓަރަށް ޖަވާބުދާރީވާ، އެ މިނިސްޓްރީގެ ދަށުން ހިންގާ ދައުލަތުގެ ވަކި އިދާރާއެކެވެ. ފަތުވާ ދޭ މަޖިލީހުގެ އޮފީސް ގާއިމްކުރުމުގެ މަސައްކަތް މިހާރު އަންނަނީ ކުރަމުންނެވެ،
ފަތުވާދޭ މަޖިލީހަކީ ރާއްޖޭގައި ދީނީ ގޮތުން ހިޔާލު ތަފާތުވުން އުފެދޭ ކަންކަމުގައި، ސަރުކާރަށާއި ރައްޔިތުންނަށް ދީނީ ފަތުވާ ފޯރުކޮށްދިނުމަށާއި ފިގްހީ އާ މައްސަލަތަކުގެ ދިރާސާތައްކޮށް އެ ކަންކަމާ ގުޅޭ ދިނީ ލަފާ ފޯރުކޮށްދިނުމަށް އުފެއްދި މަޖިލީހެކެވެ.