ރޯވެ، އަޑިއަށް ދިޔަ ދޯންޏެއްގެ ހަތަރު ފަޅުވެރިން ކަނޑުމަތިން ނަގައިފި

ލ. މާވަށު ކައިރިން މުދާ ހިފައިގެން ސަތުރުކުރި ދޯންޏެއްގައި އަލިފާން ރޯވެ، އަޑިއަށް ދިއުމުން ކަނޑުވި ހަތަރު ފަޅުވެރިން ކޯސްޓްގާޑުން މިއަދު ސަލާމަތްކޮށްފި އެވެ.

އެމްއެންޑީއެފްގެ މީޑިއާ އޮފިޝަލަކު ވިދާޅުވީ ރ. އަތޮޅުން ފުރައިގެން ގއ. އަތޮޅުގައި އޮންނަ ރޮބިންސަން އައިލެންޑް ރިސޯޓަށް ދަތުރުކުރި "ނޫރު-2" ދޯނީގައި އަލިފާން ރޯވެގެން ހެނދުނު 7:15 ހާއިރު ރިޕޯޓުކޮށްފައިވާ ކަމަށެވެ. އޭރު ދޯނި އޮތީ މާވަށު ދެކުނުން ހަތް ނޯޓިކަލް މޭލު ބޭރުގަ އެވެ.

އޭގައި އެ ވަގުތު އައްޑޫ ހުޅުދޫ މީހަކާއި ތިން ބިދޭސީން ތިއްބެވެ.

ކޯސްޓްގާޑުން އެ ތަނަށް ދިޔައިރު ދޯނި އޮތީ އަޑިއަށް ގޮސްފަ އެވެ. ނަމަވެސް، ދޯނިން ދަތުރުކުރި އެންމެން ސަލާމަތްކުރީ މާވަށުގެ ދެކުނުން ހަ ނޯޓިކަލް މޭލު ބޭރު ކަނޑުން ފެނިގެން ކޯސްޓްގާޑުންނެވެ.

އެ މީހުންނަށް ގަމު ރީޖަނަލް ހޮސްޕިޓަލުގައި އަންނަނީ ފަރުވާ ދެމުންނެވެ.

އެ ހޮސްޕިޓަލްގެ ޑެޕިއުޓީ ސީއީއޯ މުހައްމަދު ޝިޔާމް ވިދާޅުވީ އަޑިއަށް ދިޔަ ދޯނިން ސަލާމަތްކުރި ހަތަރު މީހުން ވެސް ކޮންމެ ވެސް ވަރަކަށް ފިހިފައިވާ ކަމަށެވެ. އެކަމަކު، އެ ތަނުން އެކަކު ތަންކޮޅެއް ބޮޑަށް ފިހިފައި އޮތަސް، އޭނާގެ ހާލު ވެސް ސްޓޭބަލް ކަމަށް ޝިޔާމް ވިދާޅުވި އެވެ.

"ގިނައިރު ފެތީމަ ވަރުބަލިކަން ބޮޑަށް ފާހަގަވީ. ހާލު ރަނގަޅު. ފަރުވާ ދެމުން އަންނަނީ." އޭނާ ވިދާޅުވި އެވެ.