ޔުނައިޓެޑުން އެޑިޑާސްއާ އެކު 10 އަހަރަށް ބިލިއަން ޑޮލަރުގެ އެއްބަސްވުމެއް

މެންޗެސްޓާ (އޯގަސްޓް 1) - ޖަރުމަންގެ އެޑިޑާސް ކުންފުންޏާ އެކު މެންޗެސްޓާ ޔުނައިޓެޑުން އިތުރު 10 އަހަރަށް 1.1 ބިލިއަން ޑޮލަރުގެ އެއްބަސްވުމެއްގައި ސޮއި ކޮށްފި އެވެ.

ކުޅިވަރު ސާމާނު އުފައްދާ ކުންފުންޏާ އެކު ޔުނައިޓެޑުން ކުރިން އޮތް އެއްބަސްވުން ހެދީ 2015 ގަ އެވެ. އޭގެ ކުރިން ޔުނައިޓެޑަށް ކިޓް ފޯރުކޮށް ދީނީ ނައިކީންނެވެ.

ޔުނައިޓެޑާއި އެޑިޑާސް ގުޅިގެން ނެރުނު ބަޔާނުގައި ބުނީ އާ އެއްބަސްވުމަކަށް ދިއުމަށް އެންމެ ބޮޑަށް މަގުފަހިވީ، އެ ކްލަބްގެ އަންހެން ޓީމު 2018 ވަނަ އަހަރު އަލުން ތައާރަފް ކުރި ފަހުން އެ ޓީމަށް ދޭ ސަމާލުކަން އިތުރުވެފައިވާތީ ކަމަށެވެ.

އެޑިޑާސް އާ އެކު ޔުނައިޓެޑުން ހެދި އެއްބަސްވުން ހަމަވާނީ 2035 ގަ އެވެ.

ކޯޗު އެރިކް ޓެން ހާގްގެ އިރުޝާދުގެ ދަށުން އަލުން ޗެމްޕިއަންސް ލީގުގެ ޖާގަ ހޯދި ޓީމު ކުރިއަށް އޮތް ސީޒަނުގައި ވިއްކާލަން އެ ކްލަބްގެ ވެރިން ކަމަށްވާ ގްލޭޒާ އާއިލާއިން ވިސްނަ އެވެ.

އެޑިޑާސްއާ އެކު ހަދި އެއްބަސްވުމުގެ ދަށުން ޗެމްޕިއަންސް ލީގުގައި އެ ކްލަބުން ވާދަކުރާނަމަ އަހަރަކު ދައްކަން ޖެހޭ ފައިސާގެ ބައެއް އެއާ ގުޅިފައިވާ ކަމަށް އެ ކުންފުނީގެ އެންމެ ފަހުގެ އަހަރީ ރިޕޯޓުގައި ވެ އެވެ.

އެގޮތުން ވިދިވިދިގެން ދެ ސީޒަން ނުވަތަ އެއަށް ވުރެ ގިނަ ސީޒަނުގައި ޗެމްޕިއަންސް ލީގުގައި ނުކުޅެވިއްޖެ ނަމަ އެ ކްލަބަށް އަހަރަކު ދައްކަން ޖެހޭ ފައިސާގެ 30 ޕަސެންޓް ދަށްވާނެ ކަމަށް އެއްބަސްވުމުގައި ވެ އެވެ.