ހުރިހާ ކެންޑިޑޭޓުންނަށް ހަމަހަމަ އުސޫލުން ބިން ދޫކުރާނެ: ސިޓީ ކައުންސިލް

ކާނިވާ ސަރަހައްދުގައި ކުރިން ބޭއްވި އެމްޑީޕީގެ ޖަލްސާއެއް: ރިޔާސީ އިންތިހާބުގައި ވާދަކުރާ ހުރިހާ ކެންޑިޑޭޓުންނަށް ހަމަހަމަ އުސޫލަކުން މާލޭގެ ބިންތައް ކެމްޕެއިނަށް ދޫކުރާނެ ކަމަށް ސިޓީ ކައުންސިލުން ބުނޭ --- ފޮޓޯ/މިހާރު

މުއިއްޒު އިބްރާހިމް، މިހާރު

22 އޯގަސްޓް 2023 - 18:48

2 comments

ރިޔާސީ އިންތިހާބުގެ ކެމްޕެއިނަށް މާލެއިން ބޭނުންވާ ބިންތައް ބޭނުންކުރަން ހުރިހާ ކެންޑިޑޭޓުންނަށް ވެސް ހަމަހަމަ ފުރުސަތުތައް ދޭނެ ކަމަށް މާލޭ ސިޓީ ކައުންސިލުން މިއަދު ބުނެފި އެވެ.

އެމްޑީޕީގެ ރިޔާސީ ކެންޑިޑޭޓް އަދި ރައީސް އިބްރާހިމް މުހައްމަދު ސޯލިހްގެ ކެމްޕެއިން ޖަލްސާއެއް ބާއްވަން މާލޭގެ ބައެއް ބިންތައް ހޯދަން ތަކުރާރުކޮށް އެދުމުން ވެސް އެ ހުއްދަ ސިޓީ ކައުންސިލުން ދީފައިނުވާ ކަމަށް އެމަނިކުފާނުގެ ކެމްޕެއިން ޓީމުން ވަނީ ބުނެފަ އެވެ.

ސިޓީ ކައުންސިލުން މިއަދު ކުރި ޓްވީޓެއްގައި ވަނީ ހުރިހާ ކެންޑިޑޭޓުން ވެސް ބިންތައް ހޯދަން އެދެމުންދާތީ އެކަމުގައި ހުރިހާ ފަރާތްތަކާ މަޝްވަރާކޮށް، ހުއްދަ ދިނުމުގައި ލަސްތަކެއް ކުރިމަތިވި ކަމަށެވެ. އަދި ހުރިހާ ކެންޑިޑޭޓުންނަށް ހަމަހަމަ ފުރުސަތުތައް ދިނުމަށްޓަކައި ހުއްދަތައް ދޫކުރަމުންދާ ކަމަށް އެ ޓްވީޓްގައިވެ އެވެ.

ސިޔާސީ ޙަރަކާތްތައް ހިންގުމަށް ހުއްދައަަށްއެދިފައިވާ ސިޓީތަކަށް ޖަވާބު ދިނުމަށް ވަގުތުނަގާފައިވަނީ މިއަހަރުގެ ރިޔާސީ އިންތިޚާބުގައި ވާދަކުރައްވާ ހުރިހާ ކެންޑިޑޭޓުންވެސް ސިޔާސީ ޙަރަކާތްތައްހިންގުމަށް މާލެސިޓީ ކައުންސިލްގެ ބެލުމުގެދަށުގައިވާ ސަރަޙައްދުތައް ބޭނުންވެގެން އެދިފައިވާތީ
— Malé City Council (@MaleCitymv) August 22, 2023

ސިޓީ ކައުންސިލްގެ ޓްވީޓް

ރައީސް އިބްރާހިމް މުހައްމަދު ސޯލިހްގެ ކެމްޕެއިން ޖަލްސާއެއް އަންނަ މަހު ކާނިވާ ސަރަހައްދުގައި ބޭއްވުމަށް ސިޓީ ކައުންސިލުން މިއަދު ވަނީ ހުއްދަ ދީފަ އެވެ.