ފުޓްބޯޅައިން ކުރިއަށްދާން ބްރެޒިލާއި ފްރާންސަށް ވާކަށް ނުޖެހޭ، އިންޑިއާ އަށް ވެސް ވާނެ: ވެންގާ

މުމްބާއީ (ނޮވެމްބަރު 23) - ފުޓްބޯޅަ ލެޖެންޑް އާސެން ވެންގާ، ކޯޗުކަން ކުރި ދުވަސްވަރު، ގިނަ ޒުވާން ހުނަރުވެރިންތަކެއް ފުޓްބޯޅައިގެ ތަރިންތަކަކަށް ހަދައި ދިނެވެ. މިހާރު ފީފާގެ ގްލޯބަލް ފުޓްބޯލް ޑިވެލޮޕްމަންޓްގެ އިސް ވެރިއެއްގެ ހައިސިއްޔަތުން އޭނާ މަސައްކަތް ކުރަމުންދަނީ އިންޑިއާގެ ފުޓްބޯޅައިގައި ވެސް މިފަދަ ބިންގަލެއް އެޅުމަށެވެ.

އެ ބިންގަލުގެ ފުރަތަމަ ފިޔަވަޅަކީ ފެންވަރު ރަނގަޅު ތައުލީމަށް ސަމާލުކަންދީގެން އިންޑިއާގެ ފުޓްބޯޅަ އެހެން ހަރުފަތަކަށް ގެންދިއުމުގެ މަގުސަދުގައި އަންނަ އަންގާރަ ދުވަހު ބުބަނޭޝްވާރުގައި ޓެލެންޓް އެކަޑަމީ ލޯންޗުކުރުމެވެ.

ފުޓްބޯޅަ ސްކޫލެއްގެ ގޮތަށް އިންޑިއާގައި ތަރައްގީ ކުރާ މި އެކަޑަމީގައި ކުޅުންތެރިންގެ އިތުރުން އެ އެކަޑަމީގައި މަސައްކަތް ކުރާނެ ކޯޗުން ވެސް ތަރައްގީ ކުރާނެ އެވެ. މި ޕްރޮޖެކްޓްގައި ފީފާގެ ފަރާތުން އެންމެ އިސްކޮށް ވެންގާ ލީޑް ކުރަމުން އަންނައިރު، އޭނާގެ ޓީމުގައި ހިމެނޭ އަށެއްކަ ތަޖުރިބާކާރުން އިންޑިއާގައި މަޑުކުރާނެ އެވެ. އެއީ ގްރާސްރޫޓް ޑިވެލޮޕްމަންޓަށް މަގުދައްކައި ދިނުމަށެވެ.

ވެންގާ ވަނީ ބްރެޒިލް އާއި ފްރާންސްގެ މިސާލު ބޭނުންކޮށް އެނެމެ ރަނގަޅު މަރުހަލާގައި ފުޓްބޯޅައިގެ ފުޓްބޯޅަ ތައުލީމު ދިނުމުގެ ބޭނުންތެރިކަން ފާހަގަކޮށްފަ އެވެ.

"އަހަރެން އެންމެ ސުވާލެއް ކުރާނީ ތިން ފިރިހެން ކުދިން، އެކަކު އުފަންވަނީ މުމްބާއީ އަށް، އެކަކު އުފަންވަނީ [ބްރެޒިލްގެ] ސައޮ ޕައުލޯ އަށް އަދި ތިން ވަނަ ފިރިހެން ކުއްޖާ އުފަންވަނީ [ފްރާންސްގެ] ޕެރިހަށް. އެއް ދުވަހު އުފަންވަނީ. ފުޓްބޯޅައިގެ ގޮތުން މި ތިން މީހުންގެ ތަފާތަކީ ކޮބައި ހެއްޔެވެ؟ އެއް އަހަރު ފަހުން އެ ތިން މީހުންގެ ތަފާތަކީ ކޮބައިހެއްޔެވެ؟،" މުމްބާއީގައި ބޭއްވި ޕްރެސް ކޮންފަރެންސްގައި ސުވާލު އުފައްދައި ވެންގާ ވާހަކަ ކުރިއަށްގެންދިޔަ އެވެ.

"މިހާރު 15 އަހަރަށް ފަހު ކުޅުންތެރިންގެ ފެންވަރަށް ތަފާތެއް އެބައޮތްތަ؟ އަހަރެން ބުނާނީ އާނއެކޭ. އަދި އަހަރެމެންގެ ނަޒަރުގައި ތިމާ އަށް ބޯޅަ ކޮމްޓްރޯލް ކުރެވެނީ ފްރާންސްގެ ކުއްޖެއް ކަމަށްވާތީއެއް ނޫން. އެކަމަކު އެ ކުއްޖާ އަށް ލިބުނީ ހުނަރު ތަރައްގީ ކުރަން ބޭނުންވާ ތައުލީމު."

ވެންގާ ބުނީ އޭނާގެ އަމިއްލަ ގައުމު ފްރާންސްގައި އޭނާ ކުޑަ އިރު ފުޓްބޯޅައިގެ ހަރުދަނާ ނިޒާމެއް ނެތް ކަމަށެވެ. އެކަމަކު އޭނާގެ އުމުރުން 20 އަހަރުގައި ފްރާންސްގައި ފުޓްބޯޅައިގެ ތައުލީމާ ހުނަރު ފޯރުކޮށްދޭ ނިޒާމުތަކެއް ތަރައްގީ ކުރުމުގެ މަސައްކަތް ފެށި ކަމަށެވެ.

"ފްރާންސްގައި އެ މަސައްކަތް ފެށީ 1973 ހިސާބުގައި އޭގެ ފަހުން 1984 ފައި ޔޫރަޕްގެ ޗެމްޕިއަންކަން ފްރާންސް ހޯދި އަދި އޭގެ ފަހުން 1998 ގެ ވޯލްޑް ކަޕް ޗެމްޕިއަންކަން ވެސް ހޯދި،" މިހާރު އުމުރުން 74 އަހަރުގެ ވެންގާ ބުންޏެވެ.

"ދުނިޔޭގެ ފުޓުބޯޅައިގެ އެންމެ މަތީ ގައުމުތަކުގެ އެއް ޕަސެންޓަކީ ފުޓްބޯޅައިގެ ތައުލީމީ ނިޒާމުތައް ރަނގަޅު ގައުމުތައް. ތައުލީމުގެ ފެންވަރާއި ސީނިއާ ޓީމުގެ ނަތީޖާއާ ވަރަށް ބޮޑު ގުޅުމެއް އެބައޮތް."