ރައްޔިތުންގެ މަޖިލިހުގެ މާލިއްޔަތު ކޮމިޓީގެ މެމްބަރުން މިއަދުގެ ބައްދަލުވުމުގައި: މަޖިލިހުގެ މެމްބަރުންގެ މުސާރަ އާއި އިނާޔަތްތައް ބޮޑުކުރަން އެ ކޮމިޓީން މިއަދު ފާސްކުރުމުން ފާޑުކިޔުން ވަނީ އިތުރުވެފައި.
19 ޑިސެމްބަރ 2023 - 20:34
153 comments
ރައްޔިތުންގެ މަޖިލީހުގެ މެންބަރަކަށް މުސާރަ އާއި އިނާޔަތުގެ ގޮތުގައި މަހަކު 100،000 ރުފިޔާ ލިބޭ ގޮތަށް މުސާރަ ބޮޑުކުރަން މާލިއްޔަތު ކޮމިޓީން މިއަދު ފާސްކޮށްފި އެވެ.
ރައްޔިތުންގެ މަޖިލީހުން މުސާރަ ކަނޑައަޅާ މަގާމުތަކުގެ މުސާރަ ބޮޑުކުރުމުގެ ކަންކަން މިއަދު މާލިއްޔަތު ކޮމިޓީގައި ކުރިއަށް ދިޔައިރު އެންމެ ފުރަތަމަ ހުށަހެޅީ މުސާރައިގެ ގޮތުގައި 82،000ރ. މެންބަރުންނަށް ކަނޑައެޅުމަށެވެ. އެއީ އަސާސީ މުސާރައިގެ ގޮތުގައި 57،000ރ. އާއި ލިވިން އެލަވަންސް ގޮތުގައި 82،000ރ. އެވެ.
ނަމަވެސް ކޮމިޓީގެ މެންބަރުންގެ މެދުގައި އޮފް ދަ ރެކޯޑުގައި ބައެއް މަޝްވަރާއަށް ފަހު އަސާސީ މުސާރަ ވަނީ 55،000ރ. އަށް ބަދަލުކޮށްފަ އެވެ. މި ބަދަލާ އެކު ކޮމިޓީން ފާސްކުރީ މެންބަރުންނަށް 80،000ރ. ގެ މުސާރައެކެވެ.
މި ބަދަލާއެކު ކޮމިޓީ އެލަވަންސްތައް ކުރިއެކޭ އެއްގޮތަށް ވެސް ލިބޭނެ ކަމަށް ކޮމިޓީގެ މުގައްރިރު ވިދާޅުވި އެވެ. ކޮމިޓީ އެލަވަންސްގެ ގޮތުގައި މެންބަރުންނަށް 20،000ރ. ގެ އެލަވަންސް ލިބޭއިރު ބޮޑުކުރި މުސާރައާ އެކު މަހަކު 100،000ރ. ގެ މުސާރައެއް މެމްބަރުންނަށް ލިބިވަޑައިގަންނަވާނެ އެވެ.
ރައްޔިތުންގެ މަޖިލީހުން ކަނޑައަޅަންޖެހޭ މުސާރައާއި ޢިނާޔަތްތައް، ރައްޔިތުންގެ މަޖިލީހުގެ މާލިއްޔަތު ކޮމިޓީއިން މުރާޖާކުރުން pic.twitter.com/kytDyZxfxI
— People's Majlis (@mvpeoplesmajlis) December 19, 2023
މަޖިލިސް މެންބަރުންގެ މުސާރަ ބޮޑުކުރުމުގެ މަޝްވަރާގައި ބައެއް މެންބަރުން ވަނީ އަންނަ ދައުރުން ފެށިގެން މި ބަދަލަށް އަމަލުކުރަން ހުށަހަޅުއްވައިފަ އެވެ.
ފޮނަދޫ ދާއިރާގެ މެންބަރު މޫސާ ސިރާޖު ވިދާޅުވީ، އެ މަޖިލީހަކުން އަމިއްލަ މުސާރަ ބޮޑުކުރުމަކީ ނުބައި ޕްރެކްޓިސްއަކަށް ވެދާނެ ކަމަށާއި ބާކީ އޮތް ހަ ވަރަކަށް މަސް ދުވަހު ބޮޑު ނުކުރުމަށް އޭނާ ހުށަހެޅުއްވި އެވެ.
އެ ކަމަށް ދެކޮޅު ހައްދަވައި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވީ، ދައުރު ނިމެން ކުޑަތަން ވެފައިވަނިކޮށް މުސާރަ ބޮޑުކުރަނީ އަންނަ ދައުރުގެ މެންބަރުންނަށް ކަމަށެވެ.
"މަޖިލިސް މެންބަރުން މުސާރަ [މި ދައުރުގައި] ބޮޑުނުކުރާ ވާހަކަ އެބަ ދައްކަވާ. އެއީ ހަގީގަތެއް ނޫން، އެ ބޭފުޅުން ވެސް ބޭނުންވޭ މުސާރަ ބޮޑުވާން،" އޭނާ ވިދާޅުވި އެވެ.
އޭނާ ވިދާޅުވީ، ބޮޑުކުރަނީ ވަކި ބަޔަކަށް އަމާޒުކޮށްގެން ނޫން ކަމަށާއި މަޖިލީހުން މުސާރަ ކަނޑައަޅާ ހުރިހާ މަގާމުތައް ކަމަށެވެ.
މަޖިލިސް މެންބަރުންނަށް ކުރިން ލިބެނީ ކޮމިޓީ އެލަވަންސާއެކު 80،000ރ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ތުއްތުކަލޯ
09 April 2024
މިޤައުމަށް ކުރިމަތިވެފައި އޮތް ބޮޑު ވަބާއެއް. ތިޔަ ޖެއްސުން ކުރެވެނީ ސަރުކާރަކަށް ނޫން. ތީ ރައްޔިތުންނަށް ކުރާ ޖެއްސުމެއް. އާދޭސްކޮށްފަ ބުނަން، ރައްޔިތުންގެ މަޖިލީހުގެ އިންތިޚާބުގައި އެމްޑީޕީ އަށް ވޯޓު ނުދީ.
ތުއްތުކޮއި
05 February 2024
ލޮބުވެތި ދިވެހި ދަރިންނޭވެ. ޤައުމަށް ހެޔޮއެދޭ ލޮބުވެތި ދިވެހި ދަރިންނޭވެ. ރައްޔިތުންގެ މަޖިލީހުގެ ކުރިއަށް އޮތް މިއޮތް އިންތިޚާބުގައި މީން އެއްވެސް މެންބަރަކަށް ވޯޓު ނުދިނުމަށް އާދޭހާއެކު އެދެމެވެ. ދިވެހި ޤައުމާއި ރައްޔިތުންގެ ޙައްޤުގައެވެ.
އަލިކަލޯ
05 February 2024
ކުރިމަތިވެފައިވާ މުޞީބާތުން މިޤައުމު މިންޖުކޮށް ދެއްވާންދޭވެ.
ގޫބައްޑާ
20 December 2023
ރައީސުލް ޖުމްހޫރިއްޔާ އަށް މަޖްލިސް އުވާލުމުގެ ބާރު ލިބިގެންވެއެވެ.ބޭނުން އެއްޗެއް ހެދޭނީ ގޭ ކޮޓަރީގައި އޮވެގެންނެވެ.
މަޢުލޫމާތު
21 December 2023
އެއްވެސް މީހަކަށް ރައްޔިތުންގެ މަޖްލިސް އުވައެއް ނުލެވޭނެ. މަޖްލީހަކަށްވެސް މަޖްލިސް އުވައެއް ނުލެވޭނެ
ވަރަ
20 December 2023
ތިޔައީ ވަރަށް ރަނގަޅު ކަމެއް. ދެން މެންބަރު އަހަރެންނަށް އިތުރަށް ދޭނެ.
ކޮރަލް
20 December 2023
މިމީހުންނަށް އިތުރު ދައުރަކަށް ވޯޓް އެއް ނުދޭނަމެވެ.
ލިވިންގއެލަވަންސް
20 December 2023
އިއްޒަތްތެރި މެމްބަރުން ދުނިޔޭގަ ބައިތިއްބަން އެބަ ލިވިންގ އެލަވަންސެއް ދޭންޖެހޭ. އެހާވެސް ގައުމަށް ބޭނުންތެރި ބައެއް. އެއް ޕާޓީން އަނެއް ޕާޓީއަށް ޖެއްސުންކުރުން ނޫންކަމެއް ނޯވޭ ކުރާކަށް. ފަހަރަކު ވެރިއަކު އަރާ ގައުމު ކުރިން އޮތްވަރަށްވުރެ އިތުރަށް ދަރުވާލާއިރު އަމިއްލަ ޕާޓީ ރައީސްވިއްޔާ ނޯވޭ ޗެކެއްޖަހާލުމެއް. އެހެން ޕާޓީއެއްގެ ރައީސަކު އަރައިފިއްޔާ ބޮޑުވާބިއްލޫރި އަޅައިގެން ބަޖެޓަށް ބަލާފަ އެބަ ކަނޑާލާ. ދެން ޖެއްސުންކުރަން މުސާރަބޮޑުކުރަނީ.
ޓެކްސް ޕޭޔަރ
20 December 2023
ގާތްގަނޑަކަށް 100 މިލިއަން ރުފިޔާ 5 އަހަރުގެ ދައުރަކަށް ބަލާފިއްޔާ ތި ބޮޑުކުރެވެނީ. ހަމަ ހައްގުތަ ތި މީހުންނަށް ތިވަރަށް ދޭން؟ ތިޔައްވުރެން ހައްގުކަން ބޮޑު ކަމެއް ނެތް މި 5 އަހަރު ތެރޭ 100 މިލިއަން ހަރަދު ކުރަން؟ ހެޔޮނުވާނެ ރައްޔިތުން އަތުން ނަގާ ފައިސާއިން ތިހާ ބޮޑު އިސްރާފެއް ކުރަން
8585
20 December 2023
ދެން މެންބަރުކަން ނުލިބޭނެތި ގޭގަ ތިބެގެން ކުރިން ލިބެމުން ދިޔަ ފައިސާ ނަގާނެ ގޮތެއް ހަދާލީ. ރައްޔިތުންގެ ވަކީލުންނޯ މިމީހުނަންކީ. އެކަމަކު ބޮޑަށް ވައްތަރީ ފޭރޭ ބަޔަކާ.ހ
ލުތުފީ
20 December 2023
މަޖިލީހުގެ މެންބަރުންގެ މުސާރަ ޖެހެނީ ކުޑަކުރަން. ޕޭކަމިޝަން ގެ ބޭނުމަކީ ކޮބާ!
ކިނބޫ
20 December 2023
އެވެސް އުވާލަންވީ ތަނެއް.