އަބްދުއްރަހީމް: ސަރުކާރު ނުހުއްޓުވޭނެ ކަމަށާއި ބަލިކަށްޓެއް ނުވާނެ ކަމަށް ވިދާޅުވި - ފޮޓޯ: ނިޝާން އަލީ / މިހާރު
25 ޖެނުއަރީ 2024 - 15:42
އިދިކޮޅު އެމްޑީޕީ އަދި ދަ ޑިމޮކްރެޓްސް އިން އެކުވެގެން އުޅެނީ ސަރުކާރު ހުއްޓުވައި ބަލިކަށިކޮށްލުމުގެ ނިޔަތުގައި ކަމަށާއި ނަމަވެސް މިހާރު އޮތީ ބަލިކަށި ކުރެވޭނެ ސަރުކާރެއް ނޫން ކަމަށް ޕީއެންސީގެ ޗެއާމަން އަދި ރައީސް ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ތެރެއިން ސަރުކާރު ޒިންމާދާރު ކުރަން އެކުގައި މަސައްކަތް ކުރަން އެއްބަސްވެ އެކަން އިދިކޮޅު އެމްޑީޕީ އަދި އެ ޕާޓީއާ ހިޔާލު ތަފާތުވެގެން ވަކިވެގެން ގޮސް އުފެއްދި ދަ ޑިމޮކްރެޓްސް އިން އިއްޔެ ވަނީ ހާމަކޮށްފަ އެވެ.
އެ ދެ ޕާޓީން ވަނީ ގާނޫނުއަސާސީއަށާއި ގާނޫނުތަކަށް ބޮޑެތި އިސްލާހުތަކެއް ހުށަހަޅަން ނިންމައިފަ އެވެ. އަދި މިނިސްޓަރުންނަށް ރުހުން ދިނުމުގައި ވެސް އެއް ވިސްނުމެއްގައި މަސައްކަތް ކުރަން ނިންމައި، ސަރުކާރުގެ ބައެއް ސިޔާސަތުތަކާ ދެކޮޅަށް މަސައްކަތް ކުރަން އެމްޑީޕީ އާއި ޑިމޮކްރެޓްސް އިން އެއްބަސްވި އެވެ.
ޕީއެންސީ އިން މިއަދު ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ، އެމްޑީޕީ އާއި ޑިމޮކްރެޓްސް އިން އުޅެނީ ސަރުކާރު ހުއްޓުވަން ކަމަށާއި އިދިކޮޅުން ހީކޮށްގެން އުޅެނީ ސަރުކާރަކީ ވަރަށް ބަލިކަށި ސަރުކާރެއް ކަމަށް ކަމަށެވެ.
"މި ސަރުކާރު ހުއްޓުމަކަށް ނުގެނެވޭނެ. ރައްޔިތުން މި ސަރުކާރު އިންތިހާބުކުރީ ވަރަށް ތަނަވަސް އަޣުލަބިއްޔަތަކުން. ރައްޔިތުންގެ ނިންމުމާ ދެކޮޅަށް އެއްވެސް ކަމެއް ނުކުރެވޭނެ،" އަބްދުއްރަހީމް ވިދާޅުވި އެވެ.
އެމްޑީޕީ އާއި ޑިމޮކްރެޓްސް އިން ވަނީ ސަރުކާރުގެ ސިޔާސީ މަގާމުތައް ވަކި ވަރެއްގައި ހިފެހެއްޓުމަށް ގާނޫނުއަސާސީ އަށް އިސްލާހު ހުށަހަޅަން ވެސް ނިންމައިފަ އެވެ. އަބްދުއްރަހީމް ވިދާޅުވީ ސިޔާސީ މަގާމުތައް އައްޔަން ކުރުމަކީ ރައީސަށް ލިބިދޭ އިހުތިޔާރެއް ކަމަށާއި އެއީ ސަރުކާރު ހިންގުމަށް މުހިންމު ކަމެއް ކަމަށެވެ.
"ކީއްވެގެންތޯ އެ ބޭފުޅުން ސަރުކާރުގައި ތިބިއިރު އަތުގައި ސުޕަ މެޖޯރިޓީ އޮވެ އެ ބަދަލު ނުގެނައީ، 1،300 އަށް ދަންދެން ސިޔާސީ މަގާމުތައް އިތުރު ކުރީ ކީއްކުރަންތޯ؟ އަޅުގަނޑުމެންގެ ރައީސް ވިދާޅުވީ 700 އަށް ވުރެ ސިޔާސީ މަގާމުތައް އިތުރު ނުކުރާނެ ކަމަށް. އަދި މިހާތަނަށް އައިއިރު އެހާ ތަނާ ކައިރި ވެސް ނުވޭ،" އަބްދުއްރަހީމް ވިދާޅުވި އެވެ.
އޭނާ ވިދާޅުވީ ރައީސް ޑރ. މުއިއްޒު ސަރުކާރާ ހަވާލުވެވަޑައިގަތީ ވަރަށް ގިނަ ވައުދުތަކާ އެކު ކަމަށާއި ސިޔާސީ މަގާމުތަކަށް ބޭފުޅުން އައްޔަން ކުރައްވަނީ އެކަންކަން ހާސިލް ކުރައްވަން ކަމަށެވެ.
"އަޅުގަނޑުމެން ވަރަށް ސާބިތުކަމާ އެކު މި ދަންނަވަނީ، މި ސަރުކާރު ބަލިކަށި ކުރަން ހުއްޓުވަން ފުރުސަތެއް ނުދޭނަން، އެކަމެއް ނުކުރެވޭނެ،" އަބްދުއްރަހީމް ވިދާޅުވި އެވެ.
"އިންތިހާބު ކޮށްފައިވާ ރައީސަކު އަތް ބަންނަން ކުރާ މަސައްކަތަކަށް އަޅުގަނޑުމެން ތާއީދެއް ނުކުރާނަން."
އަންނަ އާދިއްތަ ދުވަހު ދައުރުން ބޭރުން ރައްޔިތުންގެ މަޖިލީހުގެ ހާއްސަ ޖަލްސާއެއް ބާއްވައި މިނިސްޓަރުންނަށް ރުހުން ދިނުމުގެ މައްސަލަ ވެސް ވަނީ އެޖެންޑާ ކޮށްފަ އެވެ. އިއްޔެ އިދިކޮޅުން ބޭއްވި ނޫސްވެރިންގެ ބައްދަލުވުމުގައި ބައެއް މިނިސްޓަރުންނަށް ރުހުން ނުދިނުމާ މެދު މަޝްވަރާ ކުރަމުންދާ ކަން ހާމަކުރި އެވެ.
އަބްދުއްރަހީމް ވިދާޅުވިގޮތުގައި، މިނިސްޓަރުންނަށް ރުހުން ނުދޭން އިދިކޮޅުން އުޅޭތީ ވެސް ހާމަވަނީ އެ ބޭފުޅުންގެ ޒިންމާދާރު ކަމެއް ނެތުމެވެ. މީގެ ކުރީގެ ހުރިހާ ސަރުކާރުތަކެއްގެ މިނިސްޓަރުންނަށް ވެސް އިދިކޮޅުން ރުހުން ދިން ކަމަށާއި މިހާރު އިދިކޮޅުން މިނިސްޓަރުންނަށް ރުހުން ނުދީ ހިފަހައްޓާ ހިފެހެއްޓުމަކީ ވަރަށް ޒިންމާދާރު ކުޑަ ކަމެއް ކަމަށް އޭނާ ވިދާޅުވި އެވެ.
"އެ ބޭފުޅުން ރުހުން ނުދީ ހިފަހައްޓަން ބޭނުންވާ ކަމަށްވާ ނަމަ، ފުރުސަތު އެ ބޭފުޅުންގެ އަތުގައި އެބައޮތް. އެކަމަކު ހީނުކުރާތި ސަރުކާރު ހުއްޓުވާލެވިދާނެ ކަމަށް. އެކަމެއް ނުވާނެ. އެކަމެއް ނުވާނެ. މިސާލަކަށް މާދަމާ ސައީދަށް [އިކޮނޮމިކް މިނިސްޓަރު] ރުހުން ނުދިނީ، އޭގެ އަނެއް ދުވަހު ހަމަ އެ މަގާމަށް ސައީދު އައްޔަން ކުރުމުގެ ބާރު ރައީސްއަށް އޮވޭ،" އަބްދުއްރަހީމް ވިދާޅުވި އެވެ.
"އެހެންވީމާ އެއީ ސަރުކާރު ހުއްޓުވާލެވިދާނެ ކަމެއް ނޫން."
Copyright © 2024 Mihaaru · Terms and Conditions · Privacy Policy
ކޮމެންޓްތައް
ތޮލާލް
27 January 2024
ސަރުކާރު ވެއްޓޭއިރުވެސް އަދުރޭ އަގަޔަކުން ދެރައެއްނުވާނެ. އަހަރެމެން އެއޮއްވަރުން ގެނައި ސަރުކާރު އިތުބާރު ބެއްލިގެން މިދަނީ އަދުރޭޔާހެދި.
ހޯޙޯ ފުދިއްޖެ
26 January 2024
މާބާރައްނުތެޅުއްވާ ދެންއެންމެއަވަހައް އޮއްނައިންތިހާބުގަ ރައްޔިތުންގެ ޖަވާބުދޭނެ އިސްލާމުނައްވެތިބެ ހެދި ދޮގާ އޮޅުވާލި އޮޅުވާލުމާ ރައްޔިތުނައް ހެދިހާމަކަރު ގެ ނަތީޖާ ދިވެހިރައްޔިތުން ދައްކާނެ ރ ޔާމިނުގެނަން ބޭނުންކޮއް ވީ ވައުދުތައްވެސް ރައްޔިތުން ހަދާންނުނެތެ الله ދެނެވޮޑިގައްނަވާކަން ހަދާންކޮއްދޭނެ ދިވެހިރައްޔިތުން އަދުރޭމެއްނައް
ގެދޮރުވެރިޔާ
26 January 2024
ރަނގަޅުވާހަކަ އެއް. ނުހުއްޓާނެ ނުވެސް ހުއްޓުވޭނެ. ސަރުކާރުގައި ހުރިހާ ބާރެއް އޮންނާނީ. އެހެންވީމާ ދެންތިބި މީހުން ކުދި ކިޔާލަ ކިޔާލަ ތިބެން ޖެހޭނީ. ހަނދާން ބަހައްޓަވާތި ވެއްޓޭ ދުވަހެއް އަންނާނެ. ނިކަން ރީތިކޮށް، ވެއްޓި ބާރަކަށް ޖެހެންވެސް ޖެހޭނެ. ގަދަބަސް ބުނެ އެކަކަށް ލަނޑުދީ ދެވަަނަ މީހަކަށް ލަނޑުދީފަ ތި އުޅެނީ. ބޯގޯސް
ޑާނސް.
26 January 2024
މިސަރުކާރަށް 5އަހަރު ފުރިހަމަ ކުރެވިދާނެކަމަށް ރާޑަރަށް ނާރަ .. މަށަށް މިފެންނަތަންތަނާ އަޑު ރަހިންބޭމެނަށް ރޭކާވެސް ނުލާތީ އިސް މައްޗަށްނަގާ ދެޖީބަށްއަތްޖަހާފަ މޭދިއްްކޮށްގެން ތިހުންނަނީ،
ސިކުނޑި
26 January 2024
ރައްޔިތުންގެ ތަނަވަސް އަޣުލަބިއްޔަތު ލިބުނީ ހުސް ގޮނޑިއަކަށް!
ކޭކަދުރޭ
25 January 2024
ބޮކުބާރު ދައްކާ ފުއްޕަ ފުއްޕާ ތިއްބާ މިފަހަރު ސައިޒްކުރާނެ
ޓެރޭސް
25 January 2024
ބަލަން މިތިބީ މަޖްލިސް އިންތިހާބު ފަހުން ވާއެއްޗެއް.
މަށޭމީ
25 January 2024
ގަދަ ބަސް ބުނެ އުޅުނު މީގެ މާކުރީ ޒަމާނުގަވެސް މީހުން. ނިމުން އިންގެނޭ އެންމެނަށްވެސް.
ބަލި
25 January 2024
ބަލި ވެއްޖެ. ވަރަށް ބަލި ވެއްޖެ. ހެދީ ހުސް ދޮގުކަން އެންމެނަށް އެނގިއްޖެ. ރައްޔިތުން ތި ސަރުކާރު ދެކެ ފޫހިވެއްޖެ. ގަބޫލު ކުރިޔަށް ނުކުރިޔަސް ހެޔޯ
ރައްޔިތ
25 January 2024
އަހަރެމެން ފޫއްސެއް ނުވޭ.
އައްބެ
25 January 2024
އިންޑިޔާގެ އަޅުންގެ ގޮތުގައި ތިބީމައި ޖެހޭނީ އެމީހުންބުނާހާގޮތެއް ހަދަން. އެހެންވެ އެބޭފުޅުންނަށް މަޖުބޫރު ސަރުކާރަށް ހުރަސްއަޅަން.