އިންޑިއާ ސިފައިން ދޯނިތަކަށް އެރި ސަބަބު ލިޔުމަކުން ދޭން ދިވެހި ސަރުކާރުން އެދިއްޖެ

ރާއްޖޭގެ ކަނޑުގެ ސަރަހައްދުގައި މިދިޔަ ބުދަ ދުވަހު މަސްވެރިކަން ކުރަމުން ދިޔަ ދޯނިތަކަކަށް އިންޑިއާގެ ކޯސްޓްގާޑުގެ ސިފައިން އަރައި އެ ދޯނީގައި ހަރަކާތްތެރިވި ސަބަބު ލިޔުމަކުން ދޭން ދިވެހި ސަރުކާރުން ރަސްމީކޮށް އިންޑިއާ ސަރުކާރުގައި ލިޔުމުން އެދިއްޖެ އެވެ.

"އެއީ ކިހިނެއް ވީ ކަމެއްތޯ އަންގައި ދިނުމަށް ލިޔުމަކުން އަޅުގަނޑުމެން އަދި މި އެދުނީ. ކަން ވީ ގޮތް ސާފުކޮށްދޭން،" ދިވެހި ސަރުކާރުގެ އިސް އޮފިޝަލަކު "މިހާރު" އަށް ވިދާޅުވި އެވެ.

އެކަމާ ގުޅޭ ގޮތުން ދިވެހި ސަރުކާރުން ރަސްމީކޮށް އަދި ވާހަކަ ނުދެއްކި ނަމަވެސް އެނގިފައިވާ ގޮތުގައި އެ މައްސަލަ އެމްއެންޑީއެފުން އަންނަނީ ތަހުގީގު ކުރަމުންނެވެ.

ރާއްޖޭގެ އުތުރުގައި ރާއްޖޭގެ ސަރަހައްދުގައި މަސްވެރިކަން ކުރަމުން ދިޔަ ތިން ދޯންޏަކަށް އިންޑިއާގެ ހަތިޔާރު އެޅި ސިފައިންތަކެއް އެރީ މިދިޔަ ބުދަ ދުވަހުގެ ހަވީރުގެ ވަގުތެއްގަ އެވެ. އެ ދޯނީގައި ތިބި މީހުންނާ އިންޑިއާގެ ކޯސްޓު ގާޑުގެ ސިފައިން މުއާމަލާތުކުރި ގޮތް އެނގޭ މީހަކު ބުނީ އިންޑިއާގެ ސިފައިން ބޭނުންވީ އެ ދޯނިތަކުގައި ބޭނުންކުރި ސެޓެލައިޓް ފޯނުގެ ނަމްބަރު ކަމަށެވެ. އެކަމަކު، އެ ވަގުތު އެމްއެންޑީއެފް ކޯސްޓް ގާޑަށް ބައެއް ދޯނިތަކުގެ މަސްވެރިން ގުޅުމުން ދިވެހި ސިފައިންގެ އިރުޝާދުގެ މަތިން ސެޓެލައިޓް ފޯނުތަކުގެ ނަމްބަރު ނުދިނެވެ.

ހަތިޔާރާ އެކު އިންޑިއާގެ ކޯސްޓްގާޑުގެ ސިފައިން ރާއްޖޭގެ އިގުތިސާދީ ސަރަހައްދަށް ވަދެ، ތިން މަސްދޯންޏަކަށް އެރި މައްސަލަ ބޮޑުވެފައި ވަނިކޮށް، އެ ސިފައިންގެ ހަރަކާތްތައް ފެންނަ ވީޑިއޯތަކެއް ވެސް ވަނީ މިއަދު ސޯޝަލް މީޑިއާ އަށް ދޫކޮށްލައިފަ އެވެ. އެ ވީޑިއޯތަކުން ފެންނަނީ ދޯނިތަކުގެ ތައްޓު މައްޗަށް ފަޅުވެރިން ޖަމާކޮށް، އެ މީހުންނާ އިންޑިއާގެ ސިފައިން ސުވާލުކުރާ ތަނެވެ.

އާންމުކުރި ވީޑިއޯއަކުން ފެންނަ ގޮތުގައި އިންޑިއާ ސިފައިން ހަތިޔާރާ އެކު ދޯނީގައި ތިބި އިރު ހުރިހާ ފަޅުވެރިން ތިބީ ދޯނީގެ ކޮޅަށް ނެރެ ބައިތިއްބައިފަ އެވެ. އަދި ތިން ދޯނީގެ ފަޅުވެރިން ވެސް ތިބީ އެގޮތަށް ބޭރަށް ނެރެފަ އެވެ.

އެ ވަގުތު ވެސް ބައެއް ދޯނިތަކުގެ ފަޅުވެރިން ގެންދިޔައީ އިންޑިއާގެ ސިފައިންނާ ދެކޮޅަށް އިރުޝާދު ދެމުންނެވެ.

"އެ މީހުން [އިންޑިއާގެ ސިފައިން] ކައިރީގައި ބުނޭ ރާއްޖޭގެ ކޯސްޓްގާޑުން ބުންޏޭ ކަލޭމެން ތިޔަ ތިބީ ގަވާއިދާ ހިލާފަށޭ ދޯންޏަށް އަރައި. އަހަރެމެންގެ ދޯންޏަށް ނޭރޭނެއޭ އަހަރެމެންގެ ހުއްދަ ނެތި ރާއްޖޭގެ ސަރަހައްދުގައި އޮއްވައެއް. ފުރަތަމަ ބުނޭ ގަވާއިދާ ހިލާފަށޭ ދޯންޏަށް އަރައި ތިޔަ ތިބީ،" އާންމުކުރި އެއް އެއް ވީޑިއޯ އިން މަސްވެރިއަކު އެހެން ދޯންޏެއްގެ ފަޅުވެރިންނަށް ގޮވައި އިރުޝާދު ދޭ އަޑު އިވެ އެވެ.

ރާއްޖޭގެ ފިޝަރީޒް މިނިސްޓްރީގެ ވެސަލް މޮނީޓަރިން ސިސްޓަމް އިން ކަށަވަރުވާ ގޮތުން ވެސް އިންޑިއާގެ ސިފައިން އެރި ދޯނިތައް އޮތީ ރާއްޖޭގެ އިގްތިސޯދީ ސަރަހައްދުގަ އެވެ.

ރާއްޖޭގެ މަސްދޯނިތަކަށް އެރި އިންޑިއާގެ ސިފައިން ވަނީ މަސްވެރިންގެ ފޯނުތައް އަތުލައި ހެކިތައް ނައްތައިލި ކަމަށް ވެސް "މިހާރު" އަށް އެނގިފައި ވެ އެވެ. އިންޑިއާ ސިފައިން ދިވެހި މަސްވެރިންނާ ސުވާލުކުރަނިކޮށް، މަސްވެރިން ފޮޓޯތައް ނެގުމުން، އެ މީހުންނަށް މަޖުބޫރުކޮށް، ހުރިހާ ހެއްކެއް އިންޑިއާ ސިފައިން ފޮހެލި ކަމަށް "މިހާރު" އާ ވާހަކަ ދެއްކި މީހާ ބުންޏެވެ.

ބޮޑުކަންނެލި މަސްވެރިންގެ ޔޫނިއަނުން "މިހާރު" އަށް ބުނީ، އިންޑިއާގެ ސިފައިން "އަސުރުމާ 3" އާއި "ނެރު 7" އަދި "މާހޯރަ 3" އެވެ.

އެ ތިން ދޯނީގެ ތެރެއިން އަސުރުމާ ދޯނީގެ ކެޔޮޅާ ހަވާލާދީ މަސްވެރިންގެ ޔޫނިއަންގެ ރައީސް ހުސައިން ނަޝީދު ވިދާޅުވީ އިންޑިއާގެ ކޯސްޓްގާޑުން ދޯނި ކައިރިއަށް އެންމެ ފުރަތަމަ ފޮނުވީ ޑްރޯންއެއް ކަމަށެވެ. އިންޑިއާގެ ކޯސްޓްގާޑުގެ ދެ ބޯޓު އެ ސަރަހައްދުގައި އޮތް ކަމަށާއި އެ ތަނުން އެއް ބޯޓު ދޯންޏާ ކައިރިކުރީ ޑްރޯން ފޮނުވައިގެން ބެލުމަށް ފަހު ކަމަށް އޭނާ ވިދާޅުވި އެވެ.

"އެމީހުން ސުވާލުކުރަމުން ދިޔައީ ސެޓްލައިޓް ފޯނުގެ ނަންބަރު ހޯދަން ކަމަށް ކެޔޮޅު ބުނަނީ. އެ ނަންބަރު ނުދީގެން އަސްލު ހިފެހެއްޓީ. ކެޔޮޅު ދިޔައީ ރާއްޖޭގެ ކޯސްޓްގާޑާ ވެސް ވާހަކަދައްކަމުން. އެމީހުންނަށް ދޯނީގެ ސެޓްލައިޓް ފޯނު ނަންބަރު ދޭންޖެހޭ އެއްވެސް ހައިސިއްޔަތެއް ނޯންނާނެ ދެއްތޯ. އެހެންވެ ނަންބަރެއް ނުދޭ،" ނަޝީދު ވިދާޅުވި އެވެ.