އަބްދުއްރަހްމާންގެ ގުލްޒާރުގައި ނުފޮޅޭ އެންމެ މަލެއް ވެސް ނެތް!

ކޮންމެ ގަހެއް ދައްކަމުން އޭގެ ނަންތައް އޭނާ ކިޔަމުން ގެންދިޔަ އެވެ. ގަހުގެ ވައްތަރުތައް ގިނަކަމުން މިހާރު އޭނާގެ ހަނދާނުގައި ވެސް ބައެއް ނަންތަކެއް ނެތެވެ. އެހާ ވެސް ބައިވަރު ގަހެވެ. އަބްދުއްރަހުމާން ހަސަންގެ ބަގީޗާގައި ނަންހުސްކޮށް އޮތީ ރީތި ގަސްތަކެވެ.

ދަނޑުވެރިކަމަށް ރާއްޖޭގެ އުތުރުގައި އެންމެ މަޝްހޫރު ށ. ފީވަކުގައި އަބްދުއްރަހުމާންގެ ހަތަރު ދަނޑު އެބައޮތެވެ. މި ހުރިހާ ދަނޑެއްގައި ވެސް ހުރީ އެކި ވައްތަރުގެ ރީތި މާ ގަސްތަކާއި ބަގީޗާ ގަސްތައް ހައްދައި ފުރާލައިފަ އެވެ.

ކޮންމެ ދުވަހަކު އަސުރު ނަމާދުން ފައިބައިގެން އައިސް އޭނާ ކުރާ މަސައްކަތަކީ މި އެވެ. އިރުއޮއްސެންދެން އުޅެނީ މި ދަނޑުތަކުގަ އެވެ.

އޭނާ ކުރިން ތަރުކާރީ އާއި މޭވާ ވެސް ހެއްދި އެވެ. ނަމަވެސް، އެ މަސައްކަތް މީގެ ދިހަ ވަރަކަށް އަހަރު ކުރިން ދޫކޮށްލައި ފެށީ މި ތަފާތު ދަނޑުވެރިކަމެވެ. މި ރަށުގައި ގިނަ ބަޔަކު ތަރުކާރީ އާއި މޭވާ ހައްދާތީ ތަފާތު ކަމެއް ކުރަން އޭނާ ބޭނުންވެގެންނެވެ.

އަބްދުއްރަހްމާން ބުނާ ގޮތުން ނަމަ، އޭނާ އަކީ މިހާރު ބަގީޗާ ވިޔަފާރިވެރިއެކެވެ. އެކި ވައްތަރުގެ މާ ގަހާއި ބަގީޗާ ގަސްތައް ހައްދައިގެން ވިއްކަނީ އެވެ.

"ރާއްޖޭގެ ޓޫރިޒަމްގައި ފެހިކުރާ ރަށްތަކަށް މި މަސައްކަތަކީ ރަނގަޅު ވިޔަފާރިއަކަށް ވާތީ މި މަސައްކަތް ފެށީ. ރަނގަޅު އާމްދަނީއެއް ނުވަތަ ނަތީޖާއެއް ނުކުންނާނެ ކަމަށް ބަލައިފައި،" މި މަސައްކަތް ފެށުނު ގޮތް އޭނާ ކިޔައިދިނެވެ.

"ރަނގަޅު ވިޔަފާރިއެއް މިއީ ކުރަން. ވިޔަފާރި ކުރެއްވިއްޖެ ކަމަށް ވަންޏާ މީގެން ފުދޭވަރެއްގެ އާމްދަނީއެއް ލިބޭ."

އަބްދުއްރަހްމާން މި މަސައްކަތް ފެށީ އިންޑިއާ އަދި ސްރީލަންކާ ކަހަލަ ތަންތަނުން މުޑުވައް ގެނެސްގެންނެވެ.

"އަޅުގަނޑު އަތުގައި އެބަ އުޅޭ ޑްރެސީނިއާނާގެ އެކި ވައްތަރުތައް. ޑްރެސީނިއާނާ ސެންރިއާނާ، ޑްރެސީނިއާނާ އޮބްރިއާނާ، ޑްރެސީނިއާނާ މަސަންޖީލިއާ، ޑްރެސީނިއާނާ ސޯންގް އޮފް އިންޑިއާ،" އެ ގަހުގެ ވައްތަރު އޭނާ ކިޔެވެ.

މި ދަނޑުތަކުގައި ސައިމަލާއި ތައުސަންޑް ފްލާވާ އާއި ސެލްވިއާ އާއި ބޯގަންވިލާ އާއި ކޮސްޓެސީއާ، އަދިވެސް އިތުރު ވައްތަރުގެ މާ ގަސްތައް އެބަހުއްޓެވެ. އެކި ނަން ކިޔާ ކުދިކުދި ރުކާއި ތަފާތު ވައްތަރުގެ ބަގީޗާ ގަސްތައް ވެސް ހައްދާފައިވެ އެވެ. މި އެއްޗެހި ހައްދައި ރުވާފައި ހުންނަނީ އެކި ސައިޒުގެ ޕޮޓުގަ އެވެ.

ހުރިހާ ދަނޑެއްގައި 40 އަށް ވުރެ ގިނަ ވައްތަރުގެ ގަސް އުޅޭނެ ކަމަށް އޭނާ ބުންޏެވެ.

"ހުރިހާ އެއްޗެއްގެ ނަމެއް ވެސް އަޅުގަނޑު ހަނދާނުގައި ނެތް. އެހާ ބައިވަރު އެބައޮތް،" އަބްދުއްރަހްމާން ބުންޏެވެ.

"ކާނާ އަޅައިގެނެއް ނޫން ހައްދަނީކީ ވެސް. ގަސްތަކުގެ މައްޗަށް ޖަހަނީ ބޭސް، ގަސްތައް ރީތިކުރަން ވެއްޖެއްޔާ. ކޮންމެހެން ކާނާ އަޅަން މި ރަށުގައި ނުޖެހޭނެ."

އޭނާގެ އެންމެ ބޮޑު މާކެޓަކީ ރިސޯޓުތަކެވެ. އެކަމަކު އޭނާ ބުނި ގޮތުގައި، މި ގަސްތައް ވިއްކުމަކީ ވަރަށް އުނދަގޫ ކަމެކެވެ.

"ރިސޯޓުތަކަށް އަޅުގަނޑުމެންނަށް މި މާކެޓް ކުރެވޭނެ ގޮތެއް ނެތީ، އަޅުގަނޑުމެންނަކީ ކިޔަވައިގެން ތިބޭ ބަޔަކަށް ނުވާތީ. އެހެންވެ މީގެ ތެރެއަށް ވަންނަން ނޭނގިގެން މި އުޅެނީ،" އޭނާގެ ކަންބޮޑުވުންތައް ހިއްސާކުރަމުން ބުންޏެވެ.

މި މަސައްކަތް ފުޅާކުރެވޭތޯ އަމިއްލަ ކުންފުންޏެއް ހަދައި ކުންފުނީގެ ޕްރޮފައިލް ވެސް އޭނާ ތައްޔާރުކުރި އެވެ. އެކަމަކު ލިބުނު މާ ބޮޑު ކުރިއެރުމެއް ނެތެވެ. އޭނާގެ ތަޖުރިބާގައި މި ކަމަކީ ރަނގަޅަށް މާކެޓް ނުކުރެވި ކުރަން ވަރަށް އުނދަގޫ މަސައްކަތެކެވެ.

"މިހާރު ވެސް ތިން ރިސޯޓަކަށް ކޯޓޭޝަން ހުށަހަޅައިފިން. އެއްގޮތަކަށް ވެސް މިކަން ކުރިއަށް ގެންދެވޭނެ ގޮތެއް އަޅުގަނޑަކަށް ނޭނގުނު،" އޭނާ ބުންޏެވެ.

ރިސޯޓަކުން އޯޑަރެއް ލިބޭ ފަހަރަކު ވިއްޔާ އޭނާ 7،000 ނުވަތަ 8،000 ގަސް އޭނާ ނުފޮނުވާ ފަހަރެއް މަދެވެ. އެއީ އެކި ވައްތަރުގެ ގަސްތަކުންނެވެ.

އަބްދުއްރަހްމާން ބުނީ މާލޭގެ އިރުމަތީފަރާތުގައި އޮންނަ ލޮނުޒިޔާރަތް ޕާކު ހަދަން ވެސް އޭނާ އަތުން ގަސް ގަނެގެން ގެންދިޔަ ކަމަށެވެ. އެ ފަހަރު ސައިމަލާއި ފަރުދާބަގީޗާ ހިމެނޭހެން 8،000 ގަސް ވިއްކި ކަމަށް އޭނާ ބުންޏެވެ.

މާކެޓް ހޯދަން ދަތިވިޔަސް އަބްދުއްރަހުމާން ބުނި ގޮތުގައި، އޭނާ އަށް މި މަސައްކަތާ ދުރަށް ނުދެވިގެން އުޅެނީ މިކަމުން ލިބޭ ހިތްހަމަޖެހުން ބޮޑުކަމުންނެވެ. މި ގަސްތައް ބަލަހައްޓާއި ދަނޑުތަކުގެ ތެރޭގައި އުޅުމަށް އޭނާ ލޯބިކުރެ އެވެ. އަދި ކަމެއް ނުކޮށް ހުރުމުގެ ބަދަލުގައި މަސައްކަތެއް ކޮށް، ލިބޭ މިންވަރަކުން ފުއްދާލައިގެން ދިރިއުޅެން އޭނާ ބޭނުންވާތީ އެވެ.