ތޮއްޑޫގައި ކޮޅިގަނޑެއްގައި ޖެހުނު ކުދިންތަކެއް ސްޓެލްކޯގެ މުވައްޒަފުން ސަލާމަތްކޮށްދީފި

ރާއްޖެއަށް މިހާރު ކުރަމުންދާ ވިއްސާރައިގައި މިއަދު ހަވީރު އއ. ތޮއްޑޫއަށް އައި ކޮޅިގަނޑެއްގައި އެ ރަށުގެ ރައްޔިތުންނަށް ސްޓެލްކޯގެ މުވައްޒަފުން އެހީތެރިކަން ފޯރުކޮށްދީފި އެވެ.

ސްޓެލްކޯއިން ބުނީ، މިއަދު ހަވީރު ކޮޅިގަނޑު އައި ވަގުތު އެ ރަށުގައި މޫދަށް އެރި ތިބި ކުދިންތަކެއް ސަލާމަތްކޮށްދިނީ އެ ކުންފުނީގެ މުވައްޒަފުންގެ މަސައްކަތުން ކަމަށެވެ.

އެ ކުދިން ކޮޅިގަނޑުގައި ޖެހި އެއްގަމަށް ނާދެވި އުޅުމުން އެ ކުދިން ސަލާމަތްކޮށްދީ އެއްގަމަށް ގެނައީ އެ ވަގުތު އެ ތަނުގައި ތިބި ސްޓެލްކޯގެ މުވައްޒަފުންތަކެކެވެ.

މީގެ އިތުރުން ކޮޅިގަނޑުގައި އެ ރަށަށް ލިބުނު ބައެއް ގެއްލުންތައް ސަލާމަތް ކުރަން ވެސް މުވައްޒަފުން އެހީތެރިކަން ފޯރުކޮށްދީފައިވާ ކަމަށް ސްޓެލްކޯއިން ބުންޏެވެ.

"ކޮޅިގަނޑުގެ ސަބަބުން ބިންދައިގެންދިޔަ ބައެއް ގަސްގަހުގެ ބައިތައް ގޭގޭގެ ފުރާޅަށް ވެއްޓުމާ ގުޅިގެން ލިބުނު ގެއްލުންތަކުން ސަލާމަތް ކުރުމަށް ވެސް މި ކުންފުނީގެ ހީވާގި މުވައްޒަފުން ވަނީ އެހީތެރިކަން ފޯރުކޮށްދީފައި،" ސްޓެލްކޯއިން ބުންޏެވެ.

އިޖުތިމާއީ ކަންކަމުގައި އަބަދުވެސް އެހީތެރިކަން ފޯރުކޮށްދޭ ސްޓެލްކޯއިން ބުނީ، ރައްޔިތުންނަށް ދިމާވާ މިފަދަ ކޮންމެ ކަމެއްގައި އެ ކުންފުނީގެ މުވައްޒަފުން އަބަދުވެސް ރައްޔިތުންގެ ހިދުމަތުގައި ތިބޭނެ ކަމަށެވެ.

ކުރިއަށް އޮތް ތިން ދުވަހު ރާއްޖޭގެ މޫސުން ގޯސް ވާނެ ކަމަށް ލަފާކޮށްފައިވާއިރު، މެދު ރާއްޖެތެރޭގެ އަތޮޅުތަކަށް މޫސުން ވަރަށް ގޯހެވެ. މިއަދު ހަވީރުން ފެށިގެން މިރެއާ ހަމައަށް ބ. އަތޮޅުން ފެށިގެން މ. އަތޮޅާ ހަމައަށް އޮރެންޖު އެލާޓު ވެސް އޮތީ ނެރެފަ އެވެ.

އޮރެންޖު އެލާޓް ނެރެފައިވަނީ ގަޑިއަކު 36 މޭލާއި 42 މޭލަށް ދެމެދުގައި އަދި ވިލާގަނޑުގައި ގަޑިއަކު 60 މޭލުގެ ބާރުމިނަށް ވައިގަދަވެ، ކަނޑުތައް ވަރަށް ގަދަ ވާނެ ކަމަށް ލަފާކޮށެވެ.

މިދުވަސްވަރު މޫސުމަށް ރައްކާތެރިވެ، ސަމާލުވުމަށް އިދާރާތަކުން އިލްތިމާސް ކުރެ އެވެ.