ދަރަނި ބިލުގެ ބަހުސް: ގައުމު ބަނގުރޫޓު ކޮށްފައިވާ ކަމުގެ ތުހުމަތާއި މެނޭޖްކުރަން ނޭނގޭ ކަމުގެ އަރައިރުން!

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރާއި މި ސަރުކާރުގެ މާލީ ސިޔާސަތުތަކާ ގުޅޭ ގޮތުން އެއް ބަޔަކު އަނެއް ބަޔަކަށް ތުހުމަތު އަޅުވައި ސަރުކާރު ހިންގާ ޕީއެންސީ އާއި އިދިކޮޅު އެމްޑީޕީއާ ދެމެދު ހޫނު ބަހުސެއް މިއަދު ރައްޔިތުންގެ މަޖިލީހުގައި ކުރިއަށް ގެންގޮސްފި އެވެ.

ސަރުކާރުގެ ފަރާތުން ހުށަހެޅި ދައުލަތުގެ ދަރަންޏާ ބެހޭ ބިލުގެ ބަހުސްގައި ޕީއެންސީގެ މެމްބަރުން ވިދާޅުވީ، އެމްޑީޕީގެ ފަސް އަހަރުގެ ތެރޭގައި މި ގައުމު ދަރަނިވެރިކޮށް، އަނދަވަޅަކަށް ވައްޓާލާފައިވާ ކަމަށެވެ. މި ހާލަތު ގައުމަށް ދިމާވީ ފަސް އަހަރުގެ ތެރޭގައި ފައިސާ ޗާޕްކޮށްގެން ކަމަށް ވެސް މެމްބަރުން ވިދާޅުވި އެވެ.

އެމްޑީޕީގެ މެމްބަރުން ވިދާޅުވީ ދަރަނި ނެގީ މަޝްރޫއުތައް ހިންގަން ކަމަށާއި މިހާރު ދިމާވެގެން އުޅެނީ މި ސަރުކާރަށް އިގްތިސާދީ ހާލަތު މެނޭޖްކުރަން ނޭނގޭ މައްސަލައެއް ކަމަށެވެ.

މަޖިލީހަށް ބިލް ހުށަހެޅުއްވި ފުނަދޫ ދާއިރާގެ ޕީއެންސީގެ މެންބަރު މުހައްމަދު މަމްދޫހް ވާހަކަ ފައްޓަވަމުން ވިދާޅުވީ، ބައެއް ސަރުކާރުތަކުން 40 އަހަރާ ނުބައްދަލު ދަރަނި އެންމެ ފަސް އަހަރު ތެރޭގައި ނަގައި ވެރިންގެ ޖީބުތައް ފުރަމުން ދިޔަ ކަމަށެވެ.

ދަރަނި މެނޭޖްކުރުމުގެ ގާނޫނެއް ގެނައުމުގެ ފުރުސަތު އެމްޑީޕީ ސަރުކާރަށް އޮތް ނަމަވެސް އެފަދަ ގާނޫނީ ބާރުވެރިކަމެއް ނުގެނެސް ދައުލަތް ހަލާކާ ދިމާލަށް ގެންދިޔަ ކަމަށް އޭނާ ވިދާޅުވި އެވެ.

"މާ ކުރިން ފެށިގެން އައިއެމްއެފް އިން ދެމުން ދިޔަ ހުރިހާ އިންޒާރަކަށް ބީރު ކަންފަތެއް ދިނުމުގެ ސަބަބުން ރާއްޖެ މި ދާ މިސްރާބުން ގޮސްފައި މިއޮތީ،" މަމްދޫހް ވިދާޅުވި އެވެ.

އެ މައްސަލާގައި ވާހަކަ ދައްކަވަމުން ހިތަދޫ މެދު ދާއިރާގެ ޕީއެންސީގެ މެންބަރު އަހުމަދު އަޒާން ވިދާޅުވީ ސަރުކާރުން ހުށަހެޅި ބިލުގައި ދައުލަތުގެ ދަރަނި ނެގޭނެ ގޮތުގެ ތަފްސީލާއި މެނޭޖްކުރެވޭނެ ފަދަ ވަރަށް ގިނަ ކަންކަން ހިމަނާފައިވާ ކަމަށެވެ.

އޭގެ އިތުރުން ފުރަތަމަ ފަހަރަށް ދަރަނި މެނޭޖް ކުރާނެ އޮފީހެއް އުފެއްދުމަށް ސަރުކާރުން ހުށަހަޅާފައިވާ ކަމަށާއި އެ އޮފީހާ އެކު، ދައުލަތުގެ ދަރަންޏާ ގުޅޭ ސާފު މައުލޫމާތު އާންމުންނާއި ބޭރުގެ ފަރާތްތަކަށް ލިބޭނެ ކަމަށް އޭނާ ވިދާޅުވި އެވެ.

"އޭގެ އެންމެ ބޮޑު ފައިދާ އަކަށް ވާނީ ބޭރުގެ ބައިނަލްއަގުވާމީ ކެޕިޓަލް މޭކެޓްތަކުން ރާއްޖެ އަށް ފައިސާ ހޯދުމުގައި އިތުރު ފަސޭހަތަކެއް ލިބިގެންދާނެ." އަޒާން ވިދާޅުވި އެވެ.

އަޒާން ވިދާޅުވީ ދައުލަތުގެ ދަރަނި އޮތީ އަތް ނުފޯރާ ފަށަށް ގޮސް 120 ބިލިއަން ރުފިޔާ އިން ދަރާފައިވާ ކަމަށާއި އެއީ މި ސަރުކާރުން އުފެއްދި ހާލަތެއް ނޫން ކަމަށެވެ.

ދަރަނި ނަގަން ޖެހޭނީ އާމްދަނީ ލިބޭ ފަދަ އިތުރު ކަންތައްތަކެއް އެ ފައިސާ އިން ކުރުމަށް ކަމަށާއި އޭގެ ބަދަލުގައި ކުރީ ސަރުކާރުން މައިގަނޑު ގޮތެއްގައި އެ ފައިސާ ހަރަދު ކޮށްފައި ވަނީ ރިކަރަންޓް ހަރަދު އިތުރުމާއި އިގްިތސާދަށް ފައިދާ ނުވާ މަސައްކަތްތަކެއް ކުރުމަށް ކަމަށް އަޒާން ވިދާޅުވި އެވެ.

"މިސާލަކަށް ފެނަކަ އިން ޒަމާނީ އިންޖީނުގެ ނަމުގައި ބޮޑެތި ބިލްޑިންތަކެއް އަޅައި އަސްލު އަގާ ނުބައްދަލު އަގުތަކެއް ކިޔައި ބަޔަކު މުއްސަނދިވިތަން ފެނުނު. އެކި ރަށްރަށުގައި މަލްޓި ޕާޕަސް ހޯލް ނަމުގައި ކޮރަޕްޓު ކަންކަން ހިންގިތަން ފެނުނީ." އޭނާ ވިދާޅުވި އެވެ.

ފޭދޫ ދެކުނު ދާއިރާގެ ޕީއެންސީގެ މެންބަރު އިބްރާހިމް ދީދީ (އައިބީ) ވިދާޅުވީ ކުރީ ސަރުކާރުގެ މެޖޯރިޓީ މަޖިލީހުގައި އޮތް އިރު މިފަދަ ވާހަކަ ނުދައްކާ މިއަދު މި މައްސަލަ އަށް ފާޑު ކިޔަން އެ ޕާޓީގެ މެންބަރުން ލަދުގަންނަން ޖެހޭ ކަމަށެވެ.

ކުރީ ސަރުކާރުން "ރާއްޖޭގައި ފޮތް ޗާޕު ނުކުރާ ވަރަށް" ފައިސާ ޗާޕު ކުރަމުން ދިޔަ ކަމަށާއި އިންޓަނޭޝަނަލް މަނިޓަރީ ފަންޑް (އައިއެމްއެފް) އާއި ވޯލްޑް ބޭންކުން ދިން އިންޒާރުތަކަަށް ބެލުމެއް ނެތި މަޖިލީހުގެ މެޖޯރިޓީ ބޭނުން ކޮށްގެން ޑިސެމްބަރު 2023 އާ ހަމައަށް ފައިސާ ޗާޕު ކުރެވޭ ގޮތް ހެދި ކަމަށް އައިބީ ވިދާޅުވި އެވެ.

"ތިބޭފުޅުންގެ ވެރިކަމުގައި މިދިޔަ ފަސް އަހަރު މި ގައުމު ބަނގުރޫޓު ކޮށްލާފައި ދިޔައީ،" އޭނާ ވިދާޅުވި އެވެ.

ބާރަށު ދާއިރާގެ މެންބަރު ޕީއެންސީގެ އިބްރާހިމް ޝުޖާއު ވެސް ވިދާޅުވީ މި ގައުމު ކުރިޔަށް ގެންދަންވީ ގޮތާ މެދު އެމްޑީޕީން މި ސަރުކާރަށް ފިލާވަޅު ނަގައިދޭނަމަ ގައުމު ދާނީ އިތުރަށް ހަލާކުވެގެން ކަމަށެވެ. ރައީސް ޑރ. މުހައްމަދު މުއިއްޒު މިފަދަ ބިލެއް މަޖިލީހަށް ފޮނުވަން ޖެހުނީ ރައީސް އިބްރާހިމް މުހައްމަދު ސޯލިހު ފަދަ ވެރިއަކު ގައުމުގެ ވެރިކަމަށް އަނެއްކާވެސް އައިސްދާނެތީ އެކަމުގެ ބިރަށް ކަމަށް ޝުޖާއު ވިދާޅުވި އެވެ.

ރައީސް އިބްރާހިމް މުހައްމަދު ސޯލިހުގެ ކުރިން ރާއްޖޭގައި ހަތަރު ރައީސަކު ވެރިކަން ކުރި އިރު ދަރަނި ހުރީ 56 ބިލިއަން ގައި ކަމަށާއި އެ މުއްދަތުގައި ތަރައްގީގެ މަޝްރުއުތަކާއި ރައްޔިތުންނަށް ބޭނުންވާ ހުރިހާ ކަންކަން ރަނގަޅަށް ފުއްދެމުން އައި ކަމަށް ޝުޖާއު ވިދާޅުވި އެވެ.

ނަމަވެސް އެމްޑީޕީގެ ވެރިކަމުގައި އެކަނި ދައުލަތް 120 ބިލިއަނުން ދަރުވާލި ކަމަށާއި 1400 އަށް ވުރެ ގިނަ ސިޔާސީ މަގާމްތައް އުފައްދައިގެން ރައްޔިތުންނަށް ފައިދާ އެއް ނުކުރާ ބޭކާރު ހަރަދުތައް ކުރަމުން ދިޔަ ކަމަށް ޝުޖާއު ވިދާޅުވި އެވެ. އޭގެ އިތުރުން ގައުމުގެ މާލީ ހާލަތާ ގުޅޭ ގޮތުން އޭރު ތިބި މިނިސްޓަރުން ރައްޔިތުންނަށް އޮޅުވާލަމުން ދިޔަ. ކަމަށް ވެސް އޭނާ ވިދާޅުވި އެވެ.

"މި ސަރުކާރުގައި ވައުދުވީ 700 ސިޔާސީ މަގާމަށް ވުރެ އިތުރު ނުކުރާން. އެއަށް ވުރެ އިތުރެއް ނުވާނެ. އެއަށް ވުރެ ވެސް މަދު ކުރަން މިހާރު މަސައްކަތް މި ކުރަނީ." ޝުޖާއު ވިދާޅުވި އެވެ. "މިއީ ނުނިދާ ހޭލާ ތިބެގެން ނިންމަން ޖެހޭ ބިލެއް. މި ގައުމުގެ މާލިއްޔަތު ސަލާމަތް ކުރުމުގެ މަސައްކަތް ރައީސް ވަރަށް ހާއްސަ އިސްކަމެއް ދީގެން ކުރަމުން އެބަގެންދަވާ،"

ސަރުކާރު ހިންގާ ޕާޓީ، ޕީއެންސީގެ މެންބަރުން މާ ބޮޑަށް ބިލުގެ ތަފްސީލްތަކަށް ވަޑައިނުގަންނަވައި ކުރީގެ ސަރުކާރަށް ފާޑު ވިދާޅުވަމުން ދިޔަ އިރު އެމްޑީޕީގެ ފަރާތުން ވާހަކަ ދެއްކެވި މެންބަރުން ވެސް ދިޔައީ ދަރަންޏާ ގުޅޭ ގޮތުން މި ސަރުކާރަށް ފާޑު ވިދާޅުވަމުންނެވެ.

ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމް ވިދާޅުވީ 2019 އިން 2023 އަށް ރާއްޖޭގެ ތާރީހުގައި ވެސް ނުދައްކާ ވަރަށް ދައުލަތުން ދަރަނި ދައްކަން ފައިސާ ހޭދަ ކޮށްފައިވާ ކަމަށެވެ.

އޭގެ ތެރޭގައި ޕީޕީއެމްގެ ސަރުކާރުން ވާރުތަކުރި 24.7 ބިލިއަން ރުފިޔާ ވެސް ހިމެނޭ ކަމަށް މީކާއިލް ވިދާޅުވި އެވެ.

"ރައީސް ޔާމީން ޕީޕީއެމް ދޫކުރައްވައި، އާ ޕާޓީއެއް އުފެއްދެވުމަކީ 2013 އިން 2018 އަށް ޕީޕީއެމް ވެރިކަން ނުކުރާ ކަމަކަށް ވާނެ ކަމެއް ނޫން،" މީކާއިލް ވިދާޅުވި އެވެ.

މީކާއިލް ވިދާޅުވީ ރައީސް ޑރ. މުއިއްޒު ވެރިކަމަށް ވަޑައިގެން މުލީއާގެ މަރާމާތު ކުރަން 21 މިލިއަން ރުފިޔާ ހަރަދު ކޮށްފައިވާ ކަމަށެވެ. އަދި އަދަދު ނޭނގޭ ވަރަށް ސިޔާސީ މުވައްޒަފުން ނަގާފައިވާ ކަމަށް ވެސް އޭނާ ވިދާޅުވި އެވެ.

އެ މަނިކުފާނު އެކަން ކުރެއްވީ ރާއްޖޭގެ މާލީ ހާލަތު އެނގިވަޑައިނުގެންތޯ ނުވަތަ ގަސްދުގައި ރާއްޖޭގެ ހާލަތު އަނދަވަޅަކަށް ވައްޓާލުމަށްޓޯ މީކާއިލް ސުވާލު ކުރެއްވި އެވެ.

ކެންދޫ ދާއިރާގެ އެމްޑީޕީގެ މެންބަރު މައުރޫފް ޒާކިރު ވިދާޅުވީ، ދަރަންޏަށް ޒިންމާވާ ބިލަކީ ކުރީގެ ސަރުކާރުން ޑްރާފްޓުކޮށް އެއް ފަހަރު މަޖިލީހަށް ހުށަހަޅައި އަދި އޭގެ ފަހުން ދައުރު ނިމުމުން މި ސަރުކާރުން އަލުން ހުށަހަޅައިގެން ކުރިޔަށް ގެންދާ ބިލެއް ކަމަށެވެ.

މި ބިލު ކުރީގެ ސަރުކާރުން ޑްރާފްޓް ކުރި ގޮތަށް ފާސް ކޮށްފި ނަމަ ދަރަނިތައް އަދާ ކުރުމާއި މި މި ސަރުކާރުގެ ޕްލޭންތަކާ އެއް ގޮތަކަށް ކަންކަން ކުރަން ދަތި ވެދާނެ ކަމަށާއި މި ސަރުކާރުގެ ސިޔާސަތާ އެއްގޮތަށް ބިލު ބަދަލު ކުރަން ޖެހޭ ކަމަށް އޭނާ ވިދާޅުވި އެވެ.

ސަބަބަކީ މައުރޫފް ވިދާޅުވި ގޮތުގައި މި ސަރުކާރުން ވަނީ ކުރީ ސަރުކާރުން ލޯނު ނަގައިގެން ފެއްޓި ގިނަ މަޝްރޫއުތައް ހުއްޓާލައިފަ އެވެ.

އޭނާ ވިދާޅުވީ އާރުޓީއެލް މަޝްރޫއު އާއި އައްޑޫ މަގު ހެދުމުގެ މަޝްރޫއު އާއި މިފްކޯ އެކްސްޓެކްޝަން މަޝްރޫ އާއި ގަން އެއާޕޯޓާއި ހަނިމާދޫ އެއާޕޯޓުގެ މަސައްކަތާއި ގުޅިފަޅު ހިއްކުމުގެ މަޝްރޫއު ހުއްޓާލާފައިވާ ކަމަށެވެ.

"އަޅުގަނޑުމެންގެ ސަރުކާރުން ލޯނު ނެގީ މި ދެންނެވި މަޝްރޫއުތައް ކުރިޔަށް ގެންދަން." މައުރޫފު ވިދާޅުވި އެވެ.

މި ސަރުކާރުން ހާލަތާ ނުބައްދަލު އެތައް ފިޔަވަޅުތައް އަޅަމުންދާ ކަމަށާއި ރިކަރަންޓު ހަރަދުތައް ބޮޑުވެ ފިސްކަލް ރިފޯމް އެޖެންޑާ ފަހަތު ފަޔަށް ބުރަވަމުންދާ ކަމަށް މައުރޫފް ވިދާޅުވި އެވެ. ގިނަ މަޝްރޫއުތައް ހުއްޓިފައިވާ އިރު ވެރިންގެ ބަސްތަކުގެ ސަބަބުން އިގްތިސާދަށް ވަރަށް ބޮޑަށް ގެއްލުންވެ ހިޔަނި އެޅިފައިވާ ކަމަށް ވެސް އޭނާ ވިދާޅުވި އެވެ.

އޭނާ ތުހުމަތު ކުރެއްވި ގޮތުގައި މި ސަރުކާރަށް ބޭރު ގައުމުތަކުން ލޯނެއް ނުދިނެވެ. އަދި ފައިސާއެއް ނުވަތަ ބަޖެޓް ސަޕޯޓެއް ވެސް ނުދިން ކަމަށާއި މި އަހަރުގެ އިގްތިސާދު ކުރި އަރާނެ އަންދާޒާ ދަށްވެފައިވާ ކަމަށް އޭނާ ވިދާޅުވި އެވެ.

މައުރޫފް ވިދާޅުވި ގޮތުގައި ފިޗުގެ ރޭޓު ދަށްވެފައިވާ އިރު ބަޖެޓް ފާއިނޭންސް ކުރަން ސަރުކާރުން ވަނީ ނުކުޅެދިފަ އެވެ.

"އާސަންދަ ކަނޑާލައިގެން ނުވާނެ، ޓެކްސް ބޮޑު ކޮށްގެން ނުވާނެ. ރައްޔިތުންނަށް ދޭ އަސާސީ ހިދުމަތްތައް ކަނޑާލައިގެން ގައުމު ހިންގާކަށް ނޫން ރައްޔިތުން މި ސަރުކާރާ ވެރިކަން ހަވާލުކުރީ،" މައުރޫފް ވިދާޅުވި އެވެ.