އެފްއޭއެމްގެ މައްސަލާގައި ފީފާގެ ލަފައަކަށް ސަރުކާރުން އެދެނީ

އެފްއޭއެމަށް މިހާރު ކުރިމަތިވެފައި އޮތް ހާލަތުގައި އަމަލު ކުރާނެ ގޮތަކާ މެދު ފީފާގެ ލަފައަކަށް މިއަދު އެދޭނެ ކަމަށް ސްޕޯޓްސް ކޮމިޝަނާ މުހައްމަދު ތޮލާލް ވިދާޅުވެއްޖެ އެވެ.

އެފްއޭއެމްގެ ހިންގާ ކޮމިޓީގެ ދައުރު މިދިޔަ ހޯމަ ދުވަހު ވަނީ ހަމަވެފަ އެވެ. އޭގެ ފަހުން އެފްއޭއެމްގައި ވެރިޔަކު ނެތް ނަމަވެސް އެ އެސޯސިއޭޝަންގެ އެކްޓިން ޖެނަރަލް ސެކްރެޓަރީ މުހައްމަދު ޖައުޝަން ޝަރީފް ވިދާޅުވެފައިވަނީ ފީފާއިން އަންގާ ކަމެއް ކުރަން އޭނާއާ މަސްއޫލިއްޔަތު ހަވާލުކޮށްފައިވާ ކަމަށެވެ.

ނަމަވެސް އެކަން އެންގީ ލިޔުމަކުން ނޫން ކަމަށް ޖައުޝަން ވިދާޅުވެފައިވެ އެވެ.

ހިންގާ ކޮމިޓީގެ ދައުރު ހަމަވުމުން ބައެއް ފަރާތްތަކުން ސިފަކުރާ ގޮތުގައި މި ވަގުތު އެފްއޭއެމް އޮތީ ހަރަކާތެއް ނުކުރެވި. ޕެރަލައިޒްވެފަ އެވެ. އެހެންކަމުން މިހާލަތުގައި އަމަލުކުރާނެ ގޮތަކާ މެދު ފީފާގެ ލަފައެއް ހޯދަން މިއަދު ފީފާއަށް ސިޓީ ފޮނުވާނެ ކަމަށް ސްޕޯޓްސް ކޮމިޝަނާ ތޮލާލް "މިހާރު" އަށް ވިދާޅުވި އެވެ.

"މިހާރުގެ ހާލަތުގައި ކަންކަން ކުރިއަށް ގެންދާނެ ގޮތެއްގެ ލަފަޔަކަށް، ފީފާގެ އެޑްވައިސްއެއް ހޯދަން އަޅުގަނޑުމެން އެދޭނަން،" ތޮލާލް ވިދާޅުވި އެވެ.

އެފްއޭއެމްގެ މެންބަރު ކްލަބްތަކުގެ އިތުރުން މިހާރު އެފްއޭއެމްގައި ތިއްބެވި ބޭފުޅުން ވެސް އެ އެސޯސިއޭޝަންގެ ކަންކަން ރަނގަޅުކޮށް ހަރުދަނާ ކުރުމުގެ ރޫހެއްގައި މަސައްކަތް ކުރަމުންދާ ތަން ފެންނަ ކަމަށް ތޮލާލް ވިދާޅުވި އެވެ. އަދި އެ ޔަގީންކަން ސްޕޯޓްސް މިނިސްޓަރު އަބްދުﷲ ރާފިއުއާ އެކު ބޭއްވި ބައްދަލުވުމުގައި ވެސް އެ މެމްބަރުން ދީފައިވާ ކަމަށް ތޮލާލް ވިދާޅުވި އެވެ.

އެހެންވެ، އޭނާ ވިދާޅުވި ގޮތުގައި ފުޓްބޯޅައިގެ ކުރިމަގު ފެންނަނީ އުޖާލާކޮށެވެ.

އޭނާ ވިދާޅުވީ އެފްއޭއެމުން އެންމެ ފަހުން ބޭއްވި 19 އަހަރުން ދަށުގެ މުބާރާތާއި އިއްޔެ ނިމުނު ސޮކަ ވެޓަރަންސްގެ އެކަޑަމީ މުބާރާތުން ވެސް ފުޓްބޯޅައިގެ ފޯރި އޮތްތަން ފެނިގެން ދިޔަ ކަމަށެވެ.

"ކުލަބުތަކުގެ އިތުރުން އެފްއޭއެމްގައި ތިއްބެވި ބޭފުޅުން ވެސް އަދި އެހެނިހެން ސްޓޭކް ހޯލްޑާސްއިން ވެސް ފުޓުބޯޅަ ރަނގަޅު ކުރުމުގެ ރޫހުގައި ގުޅިގެން މަސައްކަތް ކުރާކަމީ ފުޓުބޯޅަ ހިންގުން ހަރުދަނާ ކުރެވޭނެ އަދި ފުޓުބޯޅައިގެ ފޯރި އަނބުރާ ގެނެވޭނެ ކަމުގެ ހެއްކެއް." ތޮލާލް ވިދާޅުވި އެވެ.

"އެކަން ކުރުމަށް އެންމެން ގުޅިގެން ކުރަންޖެހޭ ހުރިހާ މަސައްކަތެއް އަޅުގަނޑުމެން ކުރާނަން."

އޭޕްރީލް މަހު ރާއްޖެއަށް ޒިޔާރަތް ކުރި ފީފާގެ ވަފުދާ، ތޮލާލް ވެސް ބައްދަލު ކުރެއްވި އެވެ. މެއި މަހު ބޭއްވި ޕްރެސް ކޮންފަރެންސްގައި އެ ބައްދަލުވުމާ ބެހޭގޮތުން ވާހަކަ ދައްކަމުން އޭނާ ވިދާޅުވެފައިވަނީ އެފްއޭއެމާ މެދު ފީފާއިން ގޮތެއް ނިންމާނެ ކަމަށް ވަފުދުގެ ބޭފުޅުން ވިދާޅުވެފައިވާތީ އެކަމުގައި ސަރުކާރުން ފިޔަވަޅެއް ނާޅާނެ ކަމަށެވެ.

މިއަދު ވެސް އޭނާ ވިދާޅުވީ ފީފާ އާއި އޭއެފްސީއާ ގުޅިގެން ނަގާ ކޮންމެ ނިންމުމެއް ސަރުކާރުން ބަލައިގަންނާނެ ކަމަށެވެ.

"ފީފާ އަދި އޭއެފްސީ އިން ރާއްޖެ ޒިޔާރަތް ކުރި ޓީމާއެކު އޮތް ބައްދަލުވުމުގައިވެސް ބުނެފައި ވާނެ، ފީފާ އޭއެފްސީ ގުޅިގެން ނަގާ ކޮންމެ ޑިސިޝަނެއް އަޅުގަނޑުމެން ބަލައިގަންނާނެ ވާހަކަ. އަދި ނިންމާ ކޮންމެ ގޮތެއްގައި އެއްބާރުލުން ދޭނެ ވާހަކަ ވެސް ދަންނަވާފައި ވާނީ،" ތޮލާލް ވިދާޅުވި އެވެ.

"އެފަރާތުގެ [ފީފާގެ] ޑިސެޝަނެއް ކުރިއަށް އޮތް މަދު ދުވަސްތަކެއްގެ ތެރޭގައި ލިބޭނެ ކަމަށް އުންމީދު ކުރެވޭ."

އެފްއޭއެމްގެ އެކްސްކޯގެ ދައުރު ހަމަވީރު އިރު ވެސް ފީފާ އިން އެކަމުގައި ފިޔަވަޅެއް އަޅާފައި ނުވަނީ ކީއްވެގެންތޯ ސުވާލު ކުރުމުން ފީފާއިން "މިހާރު" އަށް ފޮނުވި އީމެއިލްގައި ބުނީ އެފްއޭއެމްގެ ހާލަތު އޭއެފްސީއާ ގުޅިގެން ގާތުން ބަލަމުންދާ ކަމަށެވެ.