ފީތައް ބޮޑުކޮށް، ބިދޭސީންނަށް ނުތިބެވޭ ގޮތަށް ފައިސާ މާރުކުރުމާ ގުޅޭ އާ ގަވައިދެއް

ފީތައް ބޮޑުކޮށް، މަނީ ޗޭންޖިން ވިޔަފާރިއާ ބެހޭ ގަވާއިދެއް މަރުކަޒީ ބޭންކް އެމްއެމްއޭ އިން ގެޒެޓުކޮށްފި އެވެ.

އަލަށް އަމަލު ކުރަން ފެށި ގަވައިދާ އެކު، އެމްއެމްއޭ އިން މާޗް 1، 1987 ވަނަ އަހަރު އެކުލަވައިލާފައިވާ "މަނީ ޗޭންޖާ ކަމުގެ ލައިސެންސް ލިބިގެން ބޭރު ފައިސާ ގަނެ ވިއްކާ ފަރާތްތަކުން ކަންކަން ކުރަންވީ ގަވައިދު" ވަނީ މިހާރު އުވާލައިފަ އެވެ.

އާ ގަވައިދުގައިވާ ގޮތުން ދެ ޓިއާއެއްގެ ދަށުން ލައިސަންސް ދޫކުރާނެ އެވެ. ޓިއާ 1 އަކީ ބޭރު ފައިސާ ގަތުމާއި ވިއްކުމުގެ ވިޔަފާރިކުރުމުގެ ލައިސެންސް އެވެ. ޓިއާ 2 އަކީ ބޭރު ފައިސާ ވިއްކުމުގެ ވިޔަފާރިކުރުމުގެ ލައިސެންސް އެވެ.

ޓިއަ 1 ގެ ދަށުން ލައިސެންސް ދޭނީ ކުންފުނީގެ ގާނޫނުގެ ދަށުން ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމަށް އުފައްދާފައިވާ ކުންފުންޏަށް ކަމަށް އެމްއެމްއޭގެ އާ ގަވައިދުގައި ވެ އެވެ. އެ ކުންފުނީގެ ވެރިފަރާތަަކަށް ވާން ޖެހޭނީ ދިވެހިން ކަމަށް ގަވައިދުގައި ބުނެފައިވެ އެވެ. ޓިއަ 1 ގެ ދަށުން ލައިސަންސް ދެނީ ފަސް އަހަރުގެ މުއްދަތަކަށެވެ. އެ ވިޔަފާރީގައި ހަރަކާތްތެރިވާ ހުރިހާ މުވައްޒަފުން ވެސް ވާން ޖެހެނީ ދިވެހިންނަށެވެ.

މަނީ ޗޭންޖިން ލައިސެންސް. ދެ ކެޓަގަރީ އެއްގެ ލައިސެންސް އެމްއެމްއޭ އިން ދޫކުރަން ވަނީ ނިންމާފައި -- ފޮޓޯ: މިހާރު

ޓިއަ 1 ގެ ދަށުން އެޕްލިކޭޝަން ފީގެ ގޮތުގައި 20،000ރ. ދައްކަން ޖެހެ އެވެ. ލައިސަންސް އަހަރީ ފީގެ ގޮތުގައި 24،000ރ. ދައްކަން ޖެހެ އެވެ. ދުވާލެއްގެ މައްޗަށް އެއް ކަސްޓަމަރަކަށް ނަގުދު ފައިސާއިން އެންމެ ގިނަވެގެން މުއާމަލާތް ކުރެވޭނީ 50،000ރ. ނުވަތަ އެ އަށް ޖެހޭ ބޭރު ފައިސާގެ އަދަދަކަށް ވާން ޖެހޭނެ ކަމަށް އެ ގަވައިދުގައި ވެ އެވެ.

މި ގަވާއިދުގެ ދަށުން ޓިއަ 2 ގައި ހިމެނެން ޖެހޭނީ ޓޫރިޒަމާ ބެހޭ ގާނޫނުގެ ދަށުން ޓޫރިސްޓުން ރިސޯޓު ހިންގަން ހުއްދަ ނުވަތަ ލައިސެންސް ލިބިފައިވާ ކުންފުނިތަކަށެވެ. ޓިއަ 2 ގެ ދަށުން ލައިސެންސް އެޕްލިކޭޝަން ފީގެ ގޮތުގައި ދައްކަން ޖެހޭނީ 1،300 ޑޮލަރެވެ. އަދި ލައިސެންސް އަހަރީ ފީގެ ގޮތުގައި 1،800 ޑޮލަރެވެ.

ޓިއަ 2ގައި ހިމެނޭ ފަރާތްތަކުން ބޭރު ފައިސާ ވިއްކުމުގެ މުއާމަލާތް ކުރަންވާނީ ބޭންކެއް މެދުވެރިކޮށް ނުވަތަ ޓިއަ 1 ގައި ހިމެނޭ ފަރާތަކާ އެކު އެވެ. ލައިސެންސް ލިބިފައިވާ ކޮންމެ ފަރާތަކުން ވެސް ސެކިއުރިޓީ ޑިޕޮސިޓްގެ ގޮތުގައި 50،000 ޑޮލަރު ބަހައްޓަން ޖެހެ އެވެ.

މަނީ އެކްސްޗޭން ކުރާ ތަނެއް. މިވަގުތު އެމްއެމްއޭގައި 221 ތަނެއް މަނީ ޗޭންޖަރުންގެ ގޮތުގައި ރަޖިސްޓާކޮށްފައިވޭ -- ފޮޓޯ: ނިޝާން އަލީ / މިހާރު

އެމްއެމްއޭ އިން ބުނީ މަނީ ޗޭންޖިން ވިޔަފާރިކުރުމަށް ލައިސަންސް ދޫކުރުމުގެ އުސޫލަށް އެ ގަވާއިދުގެ ތެރެއިން ގެނެސްފައިވާ ބަދަލުތަކުގެ ސަބަބުން އެ ވިޔަފާރިތައް ހިންގުން ހަރުދަނާވެ ކަމަށެވެ. އަދި ވިޔަފާރިތައް ސުޕަވައިޒް ކުރުމަށް އިތުރަށް ފަސޭހަވާނެ ކަމަށް އެ އޮތޯރިޓީން ބުންޏެވެ.

މިވަގުތު އެމްއެމްއޭ އިން މަނީ ޗޭންޖަރުންގެ ގޮތުގައި 221 ފަރާތެއް ރަޖިސްޓާކޮށްފައި އެބަ އޮތެވެ. އެ ގަވައިދުގައިވާ ގޮތުން ކުރިން ލައިސެންސް އޮތް ފަރާތްތަކަށް އާ ގަވައިދުގެ ދަށުން ލައިސެންސަށް އެދި ހުށަހަޅައި އެއާ މެދު އޮތޯރިޓީން ވަކި ގޮތެއް ނިންމައި އަންގަން ދެން ކުރީގެ ލައިސެންސްގެ ދަށުން ވިޔަފާރި ކުރިއަށް ގެންދެވޭނެ އެވެ. އަދި ދެ މަސް ދުވަހުގެ ތެރޭގައި އާ ގަވައިދުގެ ތެރެއިން ލައިސެންސްއަށް ހުށަހަޅަން ވާނެ ކަމަށް ގަވައިދުގައިވެ އެވެ. ހުށަނާޅާ ފަރާތްތަކުގެ ކުރީގެ ލައިސެންސް ދެ މަހަށް ފަހު ބާތިލް ވާނެ ކަމަށް ވެސް އާ ގަވައިދުގައި ބުނެފައިވެ އެވެ.