ދަނޑުވެރިންގެ އުފެއްދުންތައް އުފުލުމަށް "އެގްރި ބޯޓް"

ދަނޑުވެރިންގެ އުފެއްދުންތައް ތާޒާކަމާ އެކު އެއް ރަށުން އަނެއް ރަށަށް އުފުލަން ފަރުމާކުރި ހާއްސަ އުޅަނދު "އެގްރި ބޯޓް" އިއްޔެ އިފްތިތާހުކޮށްފި އެވެ.

"އެގްރި ބޯޓް" އިފްތިތާހުކުރުމަށް އިއްޔެ ހަވީރު ހުޅުމާލެ ބަނދަރުގައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ލޯކަލް ގަވަނަންސް މިނިސްޓަރު އާދަމް ޝަރީފް އުމަރެވެ. ޖަޕާނުގެ ސަފީރު ތަކެއުޗި މިދޮރި ވެސް އެ ރަސްމިއްޔާތުގައި ބައިވެރިވެޑައިގަތެވެ.

މި ބޯޓަކީ ޖަޕާނު ސަރުކާރުގެ މާލީ އެހީތެރިކަމާ އެކު ޔޫއެންޑީޕީ މޯލްޑިވްސްގެ ޕީޑީއެސްއޭއީ އިން ބަން ހާއްސަ އުޅަނދެކެވެ. މި ބޯޓު އޮޕަރޭޓްކުރަނީ އެގްރޯ ނެޓުންނެވެ.

"އެގްރި ބޯޓް" އިފްތިތާހުކުރުމަށް ބޭއްވި ރަސްމިއްޔާތުގައި މިނިސްޓަރު އާދަމް ޝަރީފާއި ޖަޕާނުގެ ސަފީރު ތަކެއޮޗި މިދޮރި އާއި ޔޫއެންޑީޕީގެ ބައެއް އިސްވެރިން.-- ފޮޓޯ: ޔޫއެންޑީޕީ

"އެގްރި ބޯޓް" ފަރުމާކުރީ ފުލުހުންގެ މެރިން ޕޮލިސްއިންނެވެ. އަދި މި މަސައްކަތަށް އިކޮނޮމިކް މިނިސްޓްރީ އާއި ދަނޑުވެރިކަމާ ބެހޭ މިނިސްޓްރީގެ އެހީތެރިކަން ދީފައިވެ އެވެ.

މި ބޯޓަކީ ދަނޑުވެރިކަމުގެ އުފެއްދުންތައް އުފުލޭ ގޮތަށް ހާއްސަކޮށް ބަނދެފައިވާ ބޯޓެކެވެ. މި ސްޕީޑް ބޯޓް ފަރުމާކޮށްފައި ވަނީ މޫސުން ގޯސް، ކަނޑުގަދަ ދުވަސްތަކުގައި ވެސް އެއްވެސް ދަތިކަމެއް ނެތި ދަތުރުކުރެވޭނެ ގޮތަށެވެ.

މި ބޯޓަކީ ތިމާވެއްޓަށް ލިބޭނެ ގެއްލުން ވެސް ކުޑަވާނެ ގޮތަށް ފަރުމާކޮށްފައިވާ އުޅަނދެކެވެ.

ދަނޑުވެރިންގެ އުފެއްދުންތައް އުފުލުމަށް ބަން "އެގްރި ބޯޓް" ހުޅުމާލެ ބަނދަރުގައި.-- ފޮޓޯ: އެޗްޑީސީ

މި ބޯޓުގައި ދަނޑުވެރިކަމުގެ އުފެއްދުންތައް ތާޒާކަން މަތީގައި އުފުލޭނެ ގޮތް ހެދުމަށްޓަކައި ހަމައެކަނި ސޯލާ ހަކަތައިގެ ބާރުގައި އޮޕަރޭޓްކުރާނެ ކޯލްޑް އެންޑް ޑްރައި ސްޓޯރޭޖް ފެސިލިޓީއެއް ވެސް ހުރެ އެވެ. އަދި ފަޅުވެރިން އަރާމުކޮށްލަން ތިބެވޭނެ ކޮޓަރިތައް ވެސް ވަނީ ހަދައިފަ އެވެ.

"އެގްރި ބޯޓް" ދަތުރުކުރާނީ މާލެ އާއި ލ. އަތޮޅާ ދެމެދުގަ އެވެ.

"އެގްރި ބޯޓް" އިފްތިތާހުކުރުމަށް ހުޅުމާލޭގެ ބަނދަރުގައި ބޭއްވި ރަސްމިއްޔާތު.-- ފޮޓޯ: ޔޫއެންޑީޕީ

ޔޫއެންޑީޕީން ބުނި ގޮތުގައި، 1978 ވަނަ އަހަރު ރާއްޖެއަށް އިންޖީނު އެޅި ދޯނި ތައާރަފުކުރުމުގައި ވެސް އެ ޖަމިއްޔާގެ ދައުރު ބޮޑެވެ. އޭގެ 45 އަހަރުން ފަހުން މިއަދު، ރާއްޖޭގައި ސޯލާ ހަކަތައިގެ ބޭނުންކުރާ އަދި ތިމާވެއްޓާ މާ ރައްޓެހި ބޯޓެއް ފުރަތަމަ ފަހަރަށް ބަނދެ، ތައާރަފުކުރުމަކީ އެ ޖަމިއްޔާއަށް ލިބުނު ފަހުރެކެވެ.

އެގްރޯ ނެޓުން މި ބޯޓު ބަނުމުގެ މަސައްކަތް ހަވާލުކުރީ ފިކްސްއިން މެރިން ޕްރައިވެޓް ލިމިޓެޑާ އެވެ. މީގެ އިތުރު ބޯޓެއް ބަނުމުގެ މަސައްކަތް ވެސް އެ ކުންފުންޏާ މިހާރު ވަނީ ހަވާލުކޮށްފަ އެވެ.

އިއްޔެ ބޭއްވި ރަސްމިއްޔާތުގައި މިނިސްޓަރު އާދަމް ޝަރީފް ވިދާޅުވީ އެގްރި ބޯޓުގެ ހިދުމަތާ އެކު ދަނޑުވެރިކަމުގެ ސިނާއަތަށް އިތުރު ކުރިއެރުން ލިބޭނެ ކަމަށާއި މިއީ ވަރަށް ތާރީހީ ކާމިޔާބީއެއް ކަމަށެވެ. އަދި ކާބޯތަކެތީގެ ރައްކާތެރިކަން ވެސް އިތުރަށް ކަށަވަރުވާނެ ކަމަށް އޭނާ ވިދާޅުވި އެވެ.