މިދިޔަ އަހަރު އެކަނިވެސް ރާއްޖެ އަށް 15،551 ސައިކަލް އެތެރެ ކޮށްފައިވާ ކަމަށް ކަސްޓަމްސްގެ ތަފާސްހިސާބުތަކުން ދައްކައިފި އެވެ.
މި އަހަރުގެ "ސްޓެޓިސްޓިކްސް ޑޭ" އާ ގުޅިގެން އެކްސްގައި ކުރި ޕޯސްޓެއްގައި ކަސްޓަމްސް އިން މިރޭ ބުނީ މިދިޔަ އަހަރު 15،551 ސައިކަލް އަދި 1،347 ކާރު ރާއްޖެ އަށް އެތެރެ ކޮށްފައިވާ ކަމަށެވެ.
އެކަމަކު، ރާއްޖޭގައި އެންމެ އާބާދީ ބޮޑު އަދި ވެހިކަލްތަކުން ތޮއްޖެހިފައިވާ މާލޭގައި ދުއްވަނީ އޭގެ ތެރެއިން ކިހާ ވެހިކަލް ކަމެއް ސާފެއް ނޫނެވެ.
މީގެ ކުރީގެ ތަފާސްހިސާބުތަކަށް ބަލާއިރު ކޮންމެ އަހަރަކު ވެސް 10،000 އަށް ވުރެ ގިނަ އެއްގަމު އުޅަނދު ރާއްޖޭގައި އަލަށް ރަޖިސްޓަރީކުރެ އެވެ. އެ އުޅަނދުތަކުގެ ތެރެއިން 90 ޕަސެންޓަކީ ސައިކަލެވެ. ރާއްޖެ އެތެރެކުރާ އުޅަނދުތަކުގެ ތެރެއިން ގިނަ އުޅަނުތައް ދުއްވަނީ ވެސް މާލެ ސަރަހައްދުގަ އެވެ.
ވެހިކަލްތަކުން މާލެ ތޮއްޖެހި، އެ މައްސަލަ ހައްލުކުރުމަށް ވެހިކަލް އެތެރެކުރެވޭ އަދަދު ކޮންޓްރޯލް ކުރުމަށް އެކި ފަހަރު މަތިން ކަމާ ގުޅޭ އިދާރާތަކުން އެކި ސަރުކާރުތަކުގައި މަޝްވަރާ ކޮށްފައި ވެ އެވެ. ތޮއްޖެހުމުގެ ސަބަބުން ދިމާވާ ގޮންޖެހުންތައް ހައްލުކުރަން އެޅިދާނެ ފިޔަވަޅުތައް ދެނެގަތުމަށް ޓްރާންސްޕޯޓް މިނިސްޓްރީން ވަނީ މިދިޔަ އަހަރުގެ ޑިސެމްބަރުގައި ހާއްސަ ކޮމިޓީއެއް ވެސް އުފައްދައިފަ އެވެ.