އަދުލުގެ ނިޒާމުގެ ފައިދާ ރައްޔިތުންނަށް ލިބޭނީ ވަސީލަތްތައް ލިބިގެން: އިސް ފަނޑިޔާރު

އަދުލު އިންސާފުގެ ނިޒާމުގެ މަންފާ ރައްޔިތުންނަށް ފޯރުކޮށްދެވޭނީ އިންސާނީ އަދި އުމްރާނީ ވަސީލަތްތައް ހަމަހަމަ އުސޫލަކުން ދައުލަތުގެ ހުރިހާ ބާރަކަށް ލިބިގެން ކަމަށް ހައި ކޯޓުގެ އިސް ފަނޑިޔާރު ހުސައިން ޝަހީދު ވިދާޅުވެއްޖެ އެވެ.

ހައި ކޯޓުގެ 44 ވަނަ އަހަރީ ދުވަސް ފާހަގަ ކުރުމަށް ސީއެޗްއެސްއީގައި ބޭއްވި ހަފުލާގައި ވާހަކަ ދައްކަވަމުން އިސް ފަނޑިޔާރު ވިދާޅުވީ ގާނޫނުތަކަށް ގެންނަ ބަދަލުތަކުގެ ސަބަބުން ބައެއް ފަހަރު ގޮންޖެހުންތަކާ ކުރިމަތިލާންޖެހޭ ކަމަށެވެ. ބައެއް ގާނޫނުތަކުން ކަންކަން ނިންމުމަށް ކޯޓުތަކުގެ މައްޗަށް މުއްދަތުތަކެއް ލާޒިމުކޮށް ގާނޫނުތައް ފަރުމާ ކުރާއިރު، އެކަންކަން އެ މަގަށް ކުރެވޭނެ ވަސީލަތްތައް ކޯޓުތަކުގައި ގާއިމުވެފައި ނުހުންނަ ކަމަށް އޭނާ ވިދާޅުވި އެވެ.

"މިފަދަ ގާނޫނުތައް އެކުލަވާލައްވާއިރު، ކޯޓުތަކުގެ ހާލަތު ދެނެގަނެ، ކޯޓުތަކުގެ ހިޔާލާ މަޝްވަރާ ހޯއްދަވާނެ ނަމައޭ ކިތަންމެ ފަހަރަކު އަޅުގަނޑުގެ ހިތައް އަރާ،" ފަނޑިޔާރު ވިދާޅުވި އެވެ.

ޝަހީދު ވިދާޅުވީ ގާނޫނު އަސާސީ އާއި ގާނޫނުތަކުން ހައި ކޯޓަށް މަތިކޮށްފައިވާ ގާނޫނީ ޒިންމާތައް އަދާކުރުމުގެ ގޮތުން ހައި ކޯޓު އިދާރީ ހިންގުމުގެ ގޮތުންނާއި ބަޖެޓްގެ ގޮތުން މިނިވަން މުސްތަގިއްލު ތަނަކަށް ވާންޖެހޭ ކަމަށެވެ. އަދި ލިބިފައިވާ ކުޑަ ބަޖެޓާއެކު ވެސް ދުވަހުން ދުވަހަށް ބޭނުންވާ އެންމެ ޒަރޫރީ ކަންކަން ކުރުމަށް އެހެން އިދާރާއެއްގެ ދޮރުގައި ޓަކި ނުޖަހާ އަމިއްލައަށް އެކަންކުރެވޭ ބަޔަކަށް ވާން ޖެހޭ ކަމަށް އޭނާ ވިދާޅުވި އެވެ.

ރައީސް ޑރ. މުހައްމަދު މުއިއްޒުއާ އެކު ހައި ކޯޓުގެ އިސް ފަނޑިޔާރު ޝަހީދު

ހައި ކޯޓަކީ 187 މެޖިސްޓްރޭޓް ކޯޓާއި ފަސް ސުޕީރިއާ ކޯޓާއި ޓްރައިބިއުނަލްތަކުން ނިންމާ ހުރިހާ ބާވަތެއްގެ މައްސަލަތައް ފުރަތަމަ މަރުހަލާގަ އިސްތިއުނާފް ކުރާ ކޯޓެވެ. އަދި ބައެއް ބާވަތުގެ މައްސަލަތައް ބެލުމުގެ ފުރަތަމަ މަރުހަލާގެ ކޯޓަކީ ވެސް ހައި ކޯޓެވެ.

"..މި ހުރިހާ މައްސަލަތަކެއް ހިންގުމަށް މިވަގުތު އަޅުގަނޑުމެންނަށް ލިބިފައިވަނީ މީގެ 15 އަހަރު ކުރިން ފެށިގެން ވަގުތީ ގޮތުން ކޯޓު ހިންގުމަށް ހަމަޖެއްސެވި ކުރީގެ "ރިޔާސީ ގަނޑުވަރު. ފަހަރެއްގައި ވެސް ކޯޓު އިމާރާތެއް ނޫން،" ފަނޑިޔާރު ވިދާޅުވި އެވެ.

ފަނޑިޔާރު ވިދާޅުވި ގޮތުގައި އެ އިމާރާތުގައި 11 ފަނޑިޔާރުން ޝަރީއަތް ކުރުމަށް ލިބިފައިވަނީ އެންމެ ދެ ކޯޓު ރޫމެވެ. އެހެންވެ، ކޮންމެ ފަނޑިޔާރަކަށް މައްސަލަ ތާވަލްކުރަން މަހެއްގެ މައްޗަށް ލިބެނީ ގާތްގަނޑަކަށް 12 ވަރަކަށް ފުރުސަތެވެ.

މީގެ ތެރެއިން އެކި ސަބަބުތަކާ ހުރެ ކެންސަލްވާ މައްސަލަތަކާއެކު ޝަރީއަތް ކުރުމަށް ފުރުސަތު ލިބެނީ ގާތްގަނޑަކަށް ހަތް މައްސަލަ ކަމަށް ފަނޑިޔާރު ވިދާޅުވި އެވެ. އަދި އެ އިމާރާތަކީ މަސައްކަތަށް ރައްކާތެރި އިމާރާތެއް ނޫން ކަމަށް 2018 ވަނަ އަހަރު އެކުލަވާލި ރިޕޯޓެއްގައި ވެސް ބުނެފައިވާ ކަމަށް ވިދާޅުވި އެވެ.

ހައި ކޯޓުގެ އިސް ފަނޑިޔާރު ޝަހީދު: ކޯޓުގައި ވަސީލަތްތައް މަދުވުމާއި ޖާގައިގެ ދަތިކަމާ ގުޅިގެން ކަންބޮޑުވުން ފާޅު ކުރެއްވި

"ހައި ކޯޓަށް ހުށަހެޅޭ މައްސަލަތަކާ ކުރަންޖެހޭ މަސައްކަތާ ބަލާއިރު ފަނޑިޔާރުންނާ މުވައްޒަފުން މަދުކަން ފާހަގަ ކުރަން. އަދި މަސައްކަތަށް ބޭނުންވާ މާއްދީ ވަސީލަތްތަކާ ބަޖެޓުގެ ދަތިކަން ނުހަނު ބޮޑުކަން ވެސް ފާހަގަ ކުރަން،" ފަނޑިޔާރު ވިދާޅުވި އެވެ.

ރޭގެ ހަފުލާގައި، ހައި ކޯޓުގައި ހިދުމަތް ކުރެއްވި ފަނޑިޔާރުންގެ އަގު ވަޒަން ކުރުމުގެ ގޮތުން ވަނީ އެވޯޑު ދީފަ އެވެ. އެގޮތުން ކުރީގެ އުއްތަމަ ފަނޑިޔާރު ޝެއިހް މުހައްމަދު ރަޝީދު އިބްރާހިމާއި ކުރީގެ އުއްތަމަ ފަނޑިޔާރު އަހުމަދު ފާއިޒް ހުސައިން ހިމެނިވަޑައިގަންވާ ގޮތަށް 29 ބޭފުޅަކަށް އެވޯޑް ދީފައިވެ އެވެ.

މީގެ އިތުރުން ރައީސް ޑރ. މުހައްމަދު މުއިއްޒުގެ ބައްޕާފުޅު ޝައިހް ހުސައިން އަބްދުއްރަހްމާން ހައި ކޯޓުގެ ފަނޑިޔާރެއްގެ ގޮތުގައި ކުރެއްވި ހިދުމަތުގެ އަގު ވަޒަން ކުރުމުގެ އެވޯޑެއްގެ ގޮތުން ފަނޑިޔާރުންގެ ގައުނުކޮޅެއް ވަނީ އަރުވައިފަ އެވެ.